等樓跌菁英 vs 龜息理財法?#907

諗SIR,你好!

本人現況:

年紀: 26歲

月入: 47K (半年後月入加到 80K)

女友月入: 13K

現金: 2M

每月可儲 20K

女友與我都沒有借貸,即將簽紙結婚但不會辦婚禮,不過打算動用220k一齊於年底進修。

現居於家人借出之單位,但半年後取回。

一直覺得樓市、股市快將回落所以一路都無買樓買股,現因遷出在即,倍感壓力,自以為年青可以等3,5,7年靜待股災樓災重鎚出擊,可惜由2010年等到現在還是空等。現今股市樓市牛氣沖天,人人身家一個開,自己卻苦無寸進,心情極之困擾。另外,小弟有作少許期權投機,希望還可以捕捉到未來2年的升跌大浪。

小弟有置業的需要,但等了咁耐應唔應該繼續等呢?年底應該租定買呢,雖然自知買的選擇不多,另外諗SIR可否就小弟的個案給我一些投資上的建議呢?

 

ANSWER:

 

相信讀者是一個頗聰明的人,26歲得47k人工,可見社會對其所作有認同。不少人對用薪金水平去衡量自己在社會的貢獻性十分反感,筆者看法是社會年輕人還是對工資看緊一點好,因每月所獲就是對你有否賣力幹活的反映。若在成家立室後不久便達成財務自由,那將自己精力花在同錢無關既幹活又是另一回事。可惜,聰明人反被聰明誤、大智若愚真有其道理。本案讀者應對自己有一定自信,早年看淡樓市後確切執行「死唔買樓」、可是等得3、5、7年之後自己都知咩事。更花時間作期權投資、主要是想靠期權去槓桿式倍大萬一睇中股票走勢後的利潤。其實在市場面前、好應保持謙卑同無力感。看文章後察覺讀者的投資水平、仍在只做單邊的水平,可喜是在期權運用上仍有很大進步空間。講返讀者,樓唔應該再死睇單邊看跌、宜動用自己借貸力之半作樓房購置,自身借貸力為47000/10000*50%*2.59 = 6.08mil,可用當中之60%去買樓,即約3.6百萬,計埋自己要比一成既首期、可選擇4百萬市價樓房入手。入手後可以租比人(當然是偷偷地)、租與供樓打和、動用只消40萬首期、就算計埋雜費、亦何樂而不為呢? 至於自己要住、可再租第二度、套用雙租族概念。

 

那等樓市跌返,價殘先去買唔好嗎? 假設跌市你同四叔投資成績一樣、每人身家唔見一半。四叔輸左40億、仲淨40億。你由80萬變只淨40萬,明顯是四叔有膽撈底而你無。舉此例子只想說明跌市或通賬出現既時候、富人同窮人既差距仲大。而眾人皆輸我獨贏既戰績、只是不少男仕過份自信後的幻想。各位每日7點半起身迫地鐵返工,由九點坐係位之由又whatsapp group又aastock咁去睇股票、為的是想自己財富二變四、四變八再變十六、希望可以聽日唔使做是嗎? 由於你同成班同事都係咁諗,各位在股票市場較勁得出結果係勝負不分 、大把人買成世股票最尾連個桔都賺唔到。而筆者建議做法是踏實每100萬咁儲,其本上每儲到100萬、就能為自己產出$10000每月被動收入。咁睇黎儲3個100萬都唔係極難既事、若你同老婆能夾埋月儲兩萬即12年之後就有呢舊錢,當然儲之時要免除好通賬風險,咁講起碼你每日返工既牢獄生涯都咁有個固定刑期(12年)。比起用股票或期權咁去按心水地下注,筆者自己寧願做隻每日行一步既龜。

 

讀者買樓就是搵多個租客幫自己儲錢,更有效地減免「刑期」。加上供按揭是定額的、而租金由1978年到而家大抵可算是只升不跌、所以供樓只會越供越輕鬆。希望讀者可抽20%資金行佢聰明既方法,即買股買期權咁去賺價、而80%資金收息、即市升同跌都起碼每月有租收或債基派息落袋。尤其讀者人工不俗、格局是儲樓派、根本銀行就favour呢類人。如佢想做股票或期權獨行俠咁只好祝佢好運。

 

手上2.0mil資金亦可先將1/4投入債基、年息12-15%即收息$6000/月、旨在用無年期既債基去體驗下每月有錢袋既樂趣。到得有日買一間樓開四間套房收租、就好時間每隔8日就有個租客入錢比自己、個種每星期都有5000蚊入袋既感覺、足以令人放棄花時間係鑽研股票投資。做人賺錢、目的本是令自己煩惱少一點、而不是又睇圖又睇紙咁去找麻煩。至於讀者手上應有足夠資金、極之建議簡單咁為自己舉辦場婚宴。錢用左可以賺得返、人生走過場後便唔可以返轉頭。就當有些朋友是無能力擺酒、都應該坐低同屋企人食返餐飯。












本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室