陸羽仁-二線板塊當炒

內地股市七連升,港股就唔爭氣,以美股下跌為藉口,指數全日偏軟,結果基金互認的利好影響帶來的升幅,已經跌咗七七八八。

        新華網報道,中國海關高層於「一帶一路」論壇提到,海關總署已制定出台16項支持措施,加強跨部門、跨地區以及國際海關合作,推動形成全方位、立體化、網絡化的互聯互通,全力服務「一帶一路」建設。

        軍事戰略概念炒住先

        據了解,是次出台措施主要聚焦於順暢大通道、提升大經貿、深化大合作三個方面。其中,為支持國際物流大通道建設,出台包括統籌口岸發展佈局、創新口岸管理模式等多項舉措,內地資金自然又準備炒作。

        不過,內地股市續好,恒指跟唔上,要搵食只能炒股唔炒市,由於資金未大量落嚟香港,大股好多都仲係呆呆哋,北水先頭部隊炒住啲熟悉嘅二線板塊同細股。《國家軍事戰略白皮書》發佈,軍工、航天、航空、機械、鋼鐵、核能等概念板塊繼續飆升。好似軍工股繼續有景,廣船(317)飆8.5%,造39.15元;中國航空工業國際(232)升6.2%,報1.72元。

        呢啲股份喺香港唔係主要板塊,好多股都繼續有炒作,但對指數影響唔大。至於有證券公司上調兩融保證金比例,金融股偏軟,限制大市升勢。證券金融類股市湧咗一輪,大股短期應該會唞氣,炒家會搵啲落後股出手。
        爆升新股升得唔多

        上日歐美股市大跌,恒生指數低開後沽壓都幾重,轉眼已跌超過兩百點。雖然中午收市前跌幅收窄,但午後沽盤再次增加,「質低」港股最多跌267點,低見27982點。好彩尾市又有買盤,恒指跌幅收窄至不足170點,最終兩萬八失而復得。恒生指數收造28081點,跌168點;國企指數收報14701點,跌100點,成交縮減至1575億元。

        呢排新股續上,爆飛嘅雲南水務(6839)首日掛牌,收報7.25元,較招股價5.8元,高25%;德基科技(1301)收報2.62元,較招股價2.28元,高15%,呢兩隻新股招股反應唔差,首掛股民有杯茶飲,但因為分配比率低,都唔係賺到大錢,同佢哋熱爆嘅盛況有啲匹配,呢排半新股都當炒,若然未沽可以等多陣。

        A股當旺,深圳國際(152),集團自今年2月18日至5月26日期間,合共出售約3306.55萬股南玻集團A股股份,該出售乃透過深圳證券交易所的競價系統進行,每股平均出售價格為14.999元人民幣,最高及最低出售價格分別為16.70元及13.16元。

        出售後,集團實際擁有可於深圳證券交易所自由買賣約7000萬股南玻集團A股股份,佔南玻集團已發行股本總額約3.37%。深圳國際出售南玻除咗提供利潤外,仲有簡化資產作用,呢隻股陸羽仁認為長線可以留意,如果佢跌得低啲,就係一個收集機會。

        好多股仔近日都有動作,兼且借勢炒上。過去試過合股又合股嘅福方集團(885)公佈,建議發行紅股,基準為每持有一股獲發九股紅股,股價昨日即刻炒上,收報5.62元,升咗近15%。福方多次轉型,公司主要從事在香港及中國提供物流服務、物業投資、證券買賣及貸款業務。自去年起頻頻收購內地科技公司,同時準備改名為仁天科技。呢類股票圍炒味濃,大家一擁而上,總之大家就要知道做緊乜。

        陸羽仁

 

http://news.stheadline.com/dailynews/headline_news_detail_columnist.asp?id=331542&section_name=wtt&kw=4

 












本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室