陸羽仁-大行跌眼鏡

十連升過後,A股十連升後出現回調,成交金額仲維持在1萬億元人民幣樓上。內地鞏固,港股就跟業績炒個別。        曾經因為物流概念相當受捧嘅中外運(598),去年多賺36%,市場話成績略低過預期,主要是營運毛利率只有2.7%,於是股價係尾市插咗落嚟,收市報4.56元,急插近一成。

        中外運尾市急插

        中外運之前由於阿媽有官員犯錯,搞到股價由高價回落,雖然之後反彈,但始終無法再創佳績,今次仲借業績大插,似乎又係有醒目資金提前沽貨。盈利增長三成幾係唔係差,呢個真係見仁見智。

        大摩就認為,中外運股價年初至今明顯跑輸同期國企指數升0.2%,相信上述不利因素已經反映,未來潛在推動股價向上催化劑包括母公司進一步注入資產、啟動網上商貿項目以及政府政策支持行業發展。

        大摩一直都睇好該公司,月初仲估佢未來一個半月會跑贏同業,點知跌咗眼鏡,證明大行都唔係天下無敵。未來大摩係咪可以執番副眼鏡,我估都要睇阿媽係咪真係咁快有注資大計囉。

        另一隻中銀香港(2388)股價喺公佈業績前上衝,中銀香港去年純利增長10.4%。每股基本盈利2.3246元,派發末期息0.575元。股東最有興趣係有消息指中銀香港已啟動程序,希望將旗下南洋商業銀行出售予內地買家。

        據彭博引述消息人士指,北京銀行、中國人壽(2628)及中國信達(1359)均有興趣。中銀香港已向潛在買家提交前期文件,競購者要在下月中前提出申請,呢個消息一日未證實,一日都仲係好消息嘅。

        A股十連升後調整。上證指數收報3660點,跌30點;深成指收報12757點,跌44點。各板塊中,受俗稱「水十條」的《水污染防治行動計劃》有望下月出台帶動,環保股有炒作。恒指就叻番次,收造24528點,升128點;國企指數收報11968點,跌36點,成交近836億元。長和(001)同和黃(013)齊升上高位;摩通及里昂料恒安(1044)變「紅底股」,股價揚5.43%,造92.25元,為表現最佳藍籌。

        科網股炒風未歇

        個別科網股繼續火熱。網龍(777)再升7%,慧聰網(2280)飆11%。仲有單消息,就係巨型過山車股漢能(566)早前市值突破3000億,震驚咗股壇,呢排佢股價稍回,但亦無好似其他夾倉股,急升之後散晒,股價無大跌,反映好淡惡鬥無完,淡友未夾死,股價就堅拒回落。

        有人話漢能係華洋大戰,呢個講法似乎又多咗一個證據,因為呢單嘢連英國《金融時報》都收到料,於是收集隻股交易數據,加埋專家分析,質疑漢能尾市爆升交易情況不尋常。

        《金融時報》收集漢能過去兩年逐秒計的交易數據,分析發現漢能在25個月交易數據中,有23個月在收市前十分鐘出現股價爆升。如股民炒即日鮮,由早上9點開市前買入漢能,而在收市前半小時,即下午3點30分沽貨,多數輸錢。相反,若每日收市前才入貨,贏面機會較大。報道引述埋芝加哥大學學者話,交易情況屬不尋常,並非巧合。

        漢能呢個特殊現象被人「踢爆」,相信係有兩個作用,一係引起市場注意,如果好多人加入坐順風車,就加重係尾市入貨的成本,增加持倉成本;二係向監管者施壓。

        好明顯,依家好淡雙方係賭緊沙蟹,造淡者質佢唔低,於是就加大馬力,依家雙方爭持不下,谷住不斷加碼,輸親就一仆一碌,成為大鱷鬥大鱷的世紀財技戰。

        陸羽仁

http://news.stheadline.com/dailynews/headline_news_detail_columnist.asp?id=324364&section_name=wtt&kw=4











本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室