陸羽仁-首富股大夾淡倉

港股延續弱勢,恒生指數繼昨日跌穿十天線(24776點)後,再挫逾兩百點,連二十天線(24682點)亦告失守,國企指數續跑輸恒指,恒生指數收報24465點,跌237點;國企指數收報11738點,跌206點,成交780億元。

漢能市值大過國壽

在呢種市況下,卻出現了巨型奇葩股,賣再生能源設備嘅漢能薄膜(566)借住發盈喜同市場炒作兩會有政策推動清潔能源,全日再飆1.15元或21.9%,收造6.4元,市值升至2665億元,高過國壽(2628)。

呢期市場炒起潔淨能源概念,包括核電同再生能源股。市場起哄表面理由之一,係有前中央台美女主播柴靜上載咗一條紀錄片,質疑傳統能源令到大量國民生癌,爆出過億點擊,相關部門都作出回應。有人質疑美女主播想出位,博做公關搵銀;亦有人估計呢個係有計劃嘅造勢,為環保能源開路。

無論係邊個理由,呢條片效應咁大,主要係配合咗中央大環境,今次兩會議題之一,係點樣搞好環保。有分析話除咗貪腐同高樓價外,空氣污染係內地最關心的議題,依家高樓價基本煞住,反貪又如火如荼,咁跟住搞淨化空氣,似乎順理成章,所以美女主播套片一出,先至咁哄動,內裏有因有由。

有中環茶友問,呢類股咁當時得令,咁散戶應該點呢,尤其係隻漢能薄膜,升到阿媽都唔認得喎?總體來說,呢類股早排受油價下跌,能源成本向下壓抑,股價無乜神氣。由於能源價格仲未好轉,對新能源構成競爭大咗,依家升咗上來,去到高位,都係嗰句,有食唔食,罪大惡極,適宜睇位食胡,如果錯過機會,回落之後有可能要坐番一段時間。
至於漢能薄膜呢隻神奇股,情況仲特別。早前,有傳媒統計內地富豪身家,漢能主席李河君壓倒阿里巴巴主席馬雲成為首富。過去,做得首富股就要睇你條命夠唔夠硬,因為武林盟主呢個位,唔係咁易頂得順,首富股呢排喺3元水平,連升幾手爆上去,市值已經超過煤氣(003),好以佢咁升法,依家叫人唔好賣,有可能即時阻人發達,只能夠講就算買,都完全絕對係用超短線去對待,同時完全絕對唔可以當係投資,只能當係呢分鐘買,隨時下半分鐘沽的投機。

大隻佬打交小心責親

講開呢隻首富股,早排曾經有調查機構唱衰佢,質疑佢客戶太集中,股票流通量又有限,但有關方面就大力反擊,諷刺調查機構係抹黑,想藉沽空圖利,暗示會「夾倉」教訓對方。我亦聽聞有唔少炒家借貨沽空漢能,之後隻股升上去已經令佢哋好痛,所以唔排除今個星期隻股借兩會概念爆到開花,係大戶較技嘅結果,同其他潔淨能源股的炒作不盡相同。

由於今次係兩個大隻佬打交,小散戶行埋去想攞着數,就要自己執生,唔好大隻佬一旦碌低時被人責親!

除了再生能源類外,內地核電項目紅沿河5、6號機組,獲國務院審批開工,中金發表報告,認為核電重啟符合預期,看好相關核電股。

中金指,該項目將採用二代技術,中廣核(1816)和中電投分別擁有紅沿河項目45%和45%的權益。該行認為,新核電能力將推動運營商在2020年以後實現增長,為中廣核帶來盈利彈性,因該產能尚未被充份反映。相對於設備製造商,中金更看好運營商,因盈利增長具有較高的確定性和可持續性。中廣核昨日收報3.27元,升0.05元。

陸羽仁

http://news.stheadline.com/dailynews/headline_news_detail_columnist.asp?id=321790&section_name=wtt&kw=4











 


本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室