陸羽仁-蘋果獨贏

在美國公布議息結果前夕,市場人心虛怯。美國耐用品訂單大幅減少加上多家美國巨企業續另人失望,美股大幅走軟。

 

美股低開低走,杜指早段一度大跌超過390點,之後跌幅度逐步收窄,但尾市最跌,杜指收市跌291點,報17387點,跌幅1.7%;標普500指數跌28點,收報2030點,跌幅1.3%;科技股受微軟股價大跌拖累,納指跑輸大市,收市跌90點至4682點,跌幅1.9%。值得注意嘅係標普500指數跌穿50天平均線,有點危。

 

Stifel嘅基金經理Chad Morganlander接受CNBC訪問時表示,「美元大漲,加上全球經濟增長放緩,大大影響美企去季業績,再加上耐用品訂單數據令人失望,導致美股下挫。」

 

美國公佈12月份耐用品訂單較上月減少3.4%,遠差過市場預期的增長0.1%,係過去5個月中,第4次下降。而對上一個月的耐用品訂單數據亦從原先公佈嘅-0.9%下調為-2.1%。形勢更顯惡劣。12月耐用訂單中以交通類訂單跌幅最大,達到9.2%,核心資本設備訂單亦下跌0.6%,係連續第二個月下跌。由於耐用訂單是衡量企業投資的重要指標,數據咁弱,令市場質疑企業界今年會唔會增加投資。

 

昨日,包括微軟、卡特彼勒、杜邦、以及Freeport-MoMoRan等多家行業巨企,同時派出令人失望嘅季度成績表,股價顯著大跌,其中微軟因為商用軟件銷售唔得,業績差過預期,股價昨日勁插9.3%;機械商卡特彼勒則大跌7.2%,係表現最差嘅兩隻杜指成份股。卡特彼勒表示由於油價下調反映全球經濟不振,預計今年市道仍會好差。而衛生用品商寶潔(Procter & Gamble)亦表示,由於美元大升,令到海外利潤大減,也下調盈利預期,進一步加強投資者對美企營運表現以至實體經濟狀況的憂慮,使市場情緒大受打擊,股市恐懼指標VIX指數彈升11%至17.22。

 

由於說分析界預計美企第四季的業績唔慌會好,年底時已經下調美企的盈利預期,由10月時嘅8.5%大幅減低至只有1.1%。目前為止,有75%嘅公司業績高過預期,當中只有33%嘅公司鎖售出現連續增長。

 

市場估計有好業績的焦點自然係蘋果公司,蘋果公司於昨日收市後公佈業績。iPhone大熱賣,市場預期蘋果公業績唔會差,果然不負眾望。蘋果上當季賣出7450萬部iPhone,多過市場預期嘅6650萬部,較去年多出46%!當季營收大幅增長30%至576億美元,盈利達180億美元,季度增長48%!

 

雖然市場睇好蘋果業績,但受到科技股大插拖累,蘋果股價昨日亦跌3.5%,不過,收市後公佈業績,在延長交易時段,股價倒升5.8%至115.45美元。

 

聯儲局昨日開始咗一連兩日嘅議息會議,今晚將公佈議息結果。當局將要考慮油價下跌、歐洲經濟不振、以及希臘可能出現「脫歐」危機是否會對美國經濟復甦步伐構成威脅,然後決定加息時間。主席耶倫在上次議息會議後表示4月底前都未打算加息。依家耐用品訂單嘅疲弱數據進一步顯示全球經濟放慢,已經對美國企業造成影響,咁嘅環境,估計聯儲局會按兵不動,繼續叫大家對幾時加息要保持耐性啦。

 

陸羽仁












本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室