陸羽仁-樓市無勁料

長和的大茶飯揭盅,股價狂升一日後轉趨平靜,不過,李超人的大動作似乎搞熱咗港股氣氛。雖然美股隔晚下跌,港股未受影響,在內地數據利好下,恒指不跌反升,長實(001)和黃(013)非常窄幅波動,長實微升0.1%,和黃微升0.3%,睇嚟兩隻股的股價已穩定在現水平。

        李超人的大動作繼續成為市場話題,無股者諗緊好唔好買?有股者好唔好沽?中環茶友中有經歷過長和上世紀動作多多的年代。

        佢話,好似呢啲重組大動作,通常最快都要三幾個月時間,期間會無乜消息,直至出收購文件同開股東會,先係頻密動作期,所以想跟住炒吓者唔需要心急做嘢,尤其唔需要高追。比較穩陣的方法,係以宣佈重組前股價為界,若然股價回落,愈接近界線買入愈安全,因為如果股價跌返去宣佈前水平,咁對兩間公司的小股東來說,合併是否成事都變了無所謂,咁對方案落實並無好處,所以如果見兩間公司股價回番低撈,係合併前就有賺短線的機會。

        周小姐話不會加價

        但我睇昨日股價走勢,未來長和系股價會比較呆,小回的機會有,大回的機會低,所以未必有大跌低撈的機會。

        至於揸咗貨的長和系小股東唔想沽住想睇睇又點呢?其實可以唔郁,好手痕的話可以沽咗長實、買返和黃。由於長和已提出用0.678比例同和黃換股,如果長實升,必定會按比例帶動和黃升,若然長實升10元,和黃就會升6.78元。不過,和黃同長實今次嘅分別,係今次長實追和黃,和黃就比長實多咗一個博加價的機會,雖然我覺得加價機會比較細。
        李嘉誠基金會董事周凱旋在以色列搞基金會活動時見記者,被問起有分析指可能提升重組時和黃的換股價,周小姐講得好直接,話「無可能,不要聽那些二打六經濟分析員亂咁噏……在電視節目看到那些分析員講股票公司好似講馬咁樣。」周小姐講到咁實,所以大家唔好對和黃加價抱太高期望啦,我都唔想做二打六分析員啦。

        美股挫近百點,累及恒生指數低開118點報23908點,受惠內地出口數據佳,恒指掉頭回升,尾市一度升228點高見24254點,收市前略為回順,但仍企穩24200收市。

        恒指收報24215點,升189點或0.79%;國企指數收報12063,升46點或0.39%,成交金額由前日的899.4億元,進一步縮減至848.5億元。

        港鐵股價悄悄炒上

        《施政報告》將於今日發表,房屋政策會係重點。有人留意到,港鐵呢排悄然上升,可能都同佢頻頻批地有關。由於政府要大力增加供應,港鐵(066)識做密密配合,似乎令公司同政府因為高鐵延誤引致的緊張關係紓緩下來,股價仲隨新線落成炒上!

        我索吓份報告有乜勁料,聞說房屋無勁料,所以大路估計,若然無對樓市落毒,地產股都會短炒一浸。

        大市造好,首掛新股佐力科創小額貸款(6866)有好表現,午後愈升愈有,最高升見1.85元,較招股價1.3元升42%。今日掛牌的本港樓宇維修保養服務商日成控股(3708),暗盤曾高見0.66元,較招股價0.6元高10%。該股發行2.8億股,招股接獲3338份申請,超額認購26.58倍,一手中籤比率100%。

        陸羽仁

http://news.stheadline.com/dailynews/headline_news_detail_columnist.asp?id=316051&section_name=wtt&kw=4












本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室