滬港通有排唔通

外圍升市,無奈假期傳來滬港通押後消息,一開市炒兩地股市相通概念的股份即係碌低。當打呢個概念的港交所(388)大插逾4%,與A股相關的指數基金都有資金流出嘅跡象。

 

佔領風波累埋A股

陸羽仁一早預告咗滬港通暫時不通。不幸中之大幸,係阿爺無正面講滬港通因佔中唔通,有少少含糊,對市場衝擊無咁大。不過還要小心,聽啲消息「係佔中一日未解決,滬港通一日無得通」,市場暫時都以為滬港通都係推遲一頭半個月,但萬一佔中拖半年、一年咁點算?怕就怕拖得耐殺個新加坡出來,話同阿爺傾「滬坡通」,阿爺又唔怕去傾吓,咁就攞命啦。隻港交所跌咗落嚟有166.2元,短期跌得急有可能彈吓,但小心大家慢慢發現滬港通有排唔通的現實,彈完佢仲要向下尋底。其他一系列炒滬港通的股票,都可能有類似要反覆尋底的命運。

滬港通未取得啟動批准,連內地股市都受影響,上證指數開市已失守2300關,以及上周IPO申購所凍結的資金,要待明天才能解凍,資金面仍然趨緊。在不利因素影響下,上證指數最多曾急挫近1%,全日在低位上落。證券股沽壓重,平均跌近4%。

 

港股方面,恒生指數收市報23143點,跌158點,成交增至567億元。國企指數報10312點,下跌80點,藍籌股普遍向下。

 

滬港通係撐住港股嘅主要概念,而家消息洩咗氣,唔再「靈擎」,咁香港遇到其他負面消息,就要直接承受無情衝擊嘞!港股未來一兩個月未必會跌得好急,但大勢都要下行搵底。

萬洲受通縮威脅

二線股最傷係隻萬洲(288),佢旗下雙匯管理層指第三季季績失望,股價猛插近兩成,收4.96元,一日跌咁多,散戶真係無得走。萬洲的市場轉弱及政府審批慢,但大行德銀暫時續撐萬洲,目標價8.3元。不過,而家內地通縮威脅未除,佢咁急跌法,博反彈就要嚴守止蝕。

比亞迪(1211)將於周三(29日)公佈業績,股價現下跌3.5%,失守二十天線,在50元水平爭持。由於中國汽車工業協會秘書長董揚表示,經濟放緩在汽車產業將有所反映,預計今年中國汽車市場將僅增長7%,汽車股普遍隨大市下跌。

除咗股市短期投資情緒,另一樣要擔心香港企咗喺度,但其他人唔會等你,好似話醞釀多時的天津自貿區方案,又有報道話呼之欲出,國務院早前正式批准天津港口岸新一輪擴大對外開放計劃,而天津港下轄的東疆港區正是目前天津市申報自貿區的主要陣地。

內地《經濟參考報》引述權威人士透露,天津自貿區除了保留上海自貿區內可複製的方案外,還會以發揮融資租賃業務功能為重點,增加對內輻射效應,而天津自貿區的投資負面清單可能會更少,開放力度將更大,凸顯自由貿易港功能。

商務部研究院國際市場研究部副主任白明分析指,自貿區意義在於開放,口岸限制大會成為約束發展的瓶頸,故是次對外開放給予當地探索自貿區的基本保障,再加上隨着京津冀一體化加速,愈來愈多的經濟資源和行政資源互聯互通,這賦予天津自貿區更多意義。可以預見,內地省市會加快轉型力度,香港呆呆吓,股民唯有吼吓其他概念,自己搵機會啦!

陸羽仁

https://www.facebook.com/pages/%E9%99%B8%E7%BE%BD%E4%BB%81/204865603047048?ref=br_tf












本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室