中年

唔知幾耐之前開始,忽然感覺到自己踏入咗中年。若干年前,我曾經幾期待中年嘅來臨,我當時覺得,男人走到中年,事業同權力都進入高峰,人生最得意最風光嘅日子,亦係呢段時間。然而幻想永遠同真實係有啲距離,到今日中年真係來臨嘅時候,感覺,原來係相差好遠。

 

 

中年嘅感覺係咪好差呢?咁又未至於。我同自己講,起碼我頭上仍然幸運地保有一堆烏黑而濃密既頭髮,老老實實,頭髮真係唔係必然的,應該要好好感恩了。

然而原本以為會感受到既「風光」同「高峰」感覺有冇呢?其他人我唔知,但我肯定感受唔到。比較合理既解釋係,我既事業根本稱唔上風光,所以feel唔到係理所當然。但更強烈既感覺,係感受到自己既limit。這種感覺,其實最差。

 

Feel到自己既limit響邊度,代表住對自己嘅認識。你越認識自己,你就越懂得避重就輕,也越懂得work smart。Work Smart好唔好?梗係好啦,起碼唔會浪費無謂氣力。邊一件事做得到,邊一件係做唔到,有經驗既中年人,一睇就知。但就係這個「一睇就知」既能力,掠奪咗人生好多樂趣。二十幾歲既時候,對自己有幾多能力,掌握甚少,但盲頭烏蠅咁試呢樣試嗰樣,反而感到有種不斷突破既感覺。你以為自己能力係得咁多?你試多幾次,撞多幾次板,你又會感受到自己嘅能力有所提升。後生既可愛之處,係覺得,唔知自己個頂響邊,亦唔知可以去到幾遠。那種可以發夢既感覺,其實幾正。

踏入中年之後,這個感覺會消失。踏入中年,你太過清楚自己,也實在太精於計算。你知道自己既能力去到邊,有啲嘢,你覺得成功機會唔大,你會很自然地放棄。好聽的叫做理性,正確一點,我覺得這是冇膽。中年人,有家庭考慮,也有時間考慮。人生已經過了一半,會悲哀地開始思考如何可以「安全地」渡過餘生。後生既時候,苦幹十年最後即使得到不多,覺得自己輸得起冇所謂,踏入中年,人家叫你再捱十年搏舖大既,即使最後輸了還是贏了過程,你第一時間會懷疑叫你咁做果位人兄係咪靠害,還是精神有點問題?講到呢度,忽然「人生有幾多個十年」呢句柴九名句響腦裡面響起。廿幾歲既時候,呢句話係拎黎同朋友開玩笑既說話,人到中年,響出席喪禮分分鐘多過婚禮既年頭裡面,呢句話,份量好重。

 

 

睇過好幾個report話,「中年」其實係人生最唔happy嘅一段時間:責任重;體能開始走下坡;人生也踏入樽頸階段…中年,係真係會有危機的。我唔識點樣去解釋呢種感覺,但對我嚟講,感覺到自己踏入中年,係一個好「突然」既感覺,絕對唔係「循序漸進」的。某年某月忽然有一日,朝早起身突然醒起自己今年貴庚,心裡不自覺地慘叫了一聲「Shit」,然之後,覺得心態需要轉變了。

以我既年紀來計,我應該還在中年既早期,我還在揣摩,如何可以快快樂樂地走過這個人生既時段,與及怎樣避開種種中年既危機。然而好多年輕既朋友們,佢地跟中年還有好一大段距離,卻提早有著中年人既種種困擾同煩惱。或者佢地比較早熟吧,但年輕人最大既優勢,往往係佢地既不確定性,佢地既世界,還有無限既可能;太早同我們這班「中佬」睇齊,感受同一樣既煩惱,其實唔太值得吧?

CK 人在中環

Click here to add CK on your Facebook










本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室