下晝落機，輾轉搞到臨近放工時間才回到辦公室。在飛機上過了大半天，加上國家那個乜site都block的超級防火牆，讓我miss了一整天的香港新聞。回到公司，本來打算問一下同事，今期施政報告有乜講，不過好明顯，CY既presentation絕對引唔起我一班同事們既興趣。而今日佢地所關注既，係一篇有關5億同50萬，揀A餐定係B餐既文章。
我打開手機，讀完了。原來又係葉生既文章。葉生既專欄，係我公司好多女同事既favourite（雖然邊睇邊鬧既情況時有發生…），至於班男同事呢…出乎意料地反而唔多buy佢。公司裡面既男讀者當中，我大概係個例外了。
同事問我選擇如何。OK，我好大路的，我要B餐，諗都唔駛諗。
「原因呢？」同事問：「雖然呢篇嘢，響A、B餐既選擇裡面好明顯有引導性，但係呢兩個人妻既真人係點，我哋呢亭局外人都係靠估啦。人家既家事，我地點知得咁多呢？」
「係丫。」我答：「所以，我冇諗咁多喎。家家有本難念的經，邊個老婆好，邊個唔好，你同我呢啲局外人，永遠都唔會知的。揀B餐，純粹因為，覺得阿Kay笑得多啲，笑得甜啲，that’s it。」
「一個笑容，值四億九千九百五十萬喎老細。」同事擺出一副唔相信既衰相：「你咪扮嘢喎。」
「細路女…」我拍了拍同事既肩膀：「你仲未嫁，你唔會明白，老婆既笑容對男人係有幾重要架啦。一個笑容值四億九？嘿，查實點只呢個數。」
*****
婚姻破裂既故事，總係時不時就響身邊既朋友身上發生。我大概已經lost count，我目睹過幾多單同樣既事情了。這些故事，因為第三者既固然有，因為錢銀既又有，因為婆媳關係既又有，甚至因為夫妻當中一方忽然改變性取向既都有。
儘管有著不盡相同嘅原因，但要從呢一大堆個案當中找共通點，唯一我能夠找得到的，就是這些妻子們，都係唔多識笑的。
事實上，佢地當中唔少都係漂亮既女孩子，即使生完三兩個小朋友，身材還是全無走樣，修身速度之快總係讓我嘖嘖稱奇。呢班女孩子嘅為人，老實講我同樣唔覺得有咩大問題。肯為頭家為老公不辭勞苦，努力做個賢妻良母的也大有人在。當佢地老公忽然發瘟又話離婚又話分居，呢班女孩子自然係被受同情既一方。我又賢淑又美麗又有學識，出得廳堂入得廚房仲要持家有道，你條中年發福既死佬走上大陸搞件初中都未畢業既妹妹仔？你係咪咁樣落我面呀？
這班男人，無疑可能真係唔抵幫的。但一個人選擇拋妻棄子，當中一個重要既trigger point，肯定係自己響屋企感到唔開心。你當然可以話呢班男人唔知足，家裡嘅老婆咁好都要唔開心，但唔開心就係唔開心，純粹係感覺來的。理性分析一個男人「應唔應該」感到唔開心，其實冇乜意義的。
聽過好多人講，做女人點樣先可以「留住老公」，又要keep住又靚又正，一時又話要扮蠢扮無知，一時又話要耍手段…但係總係好似唔多覺有人講，老婆既「笑容」其實有幾重要。快樂係會被感染的，當中最能感染一個男人的，理應係佢既妻子。你份人幾咁賢淑大方都好，你唔快樂，你身邊既人都唔會快樂的。唔快樂既男人，「出事」機會肯定比快樂既高許多。
有一次我同其中一位失婚既太太，講起呢個問題。佢反問咗我一句：「我份人係唔喜歡笑，但點解要我裝快樂去感染我老公，而唔係佢去感染我？」
面對這句說話，我一時也答不出話來。
只能說，快樂係一個互相感染既過程，也是一個循環。聰明的人會讓一個快樂的循環生生不息地不停運作，也不會計較這個循環到底誰才是始作俑者。
那個循環由誰去開展，查實有乜所謂？由你主動展開，大概反映出你比你的另一半，聰明一點吧。
*****
寫了一大段，其實同那篇AB餐的專欄文章，沒有多大關係。純粹借題發揮，抽點水而已。寫這段文字的時候，正值剛從外地出差回家之時。男人走在外地工作，有時真是挺想家的。舟車勞頓過後，回到家中，打開家門，期望的，也只是簡單一個笑容而已。
有些東西，總是無價的。
ck – 人在中環
AM730專欄作家