大學生畢業即刻做業主 #538案屋村仔

諗SIR你好!

小弟睇左你地BLOG好耐, 多謝教左我唔少野!

小弟現況係, 90後未畢業大學生, 預計一年半後畢業, 由於讀既書唔係叻, 估計打正職由11K開始, 女友同為90後, 已經出黎做野, 平均月薪16K.

小弟基層,父母同租住公屋,無物業,估計父母無其他資產,不能幫助置業. 亦不想靠女友家幫助.

小弟現與女友感情穩定, 我地共有約50萬資產, 小弟大學在學期間有幸借到1% LOAN, 總共16萬.

我現時算係自僱, 小買賣, 平均賺20,000一個月. 我做過BUDGET, 保守預期一年半後小弟畢業,兩口子有機會可動用資金達85萬, 兩人並無任何銀行LOAN. 我係上面講過我有政府LOAN 16萬.

 

問題 1) 現時樓價好似向下跑, 而家呢個時間置業收租係咪太進取? 風險好大?

2) 小弟試過投資股票, 但成績唔算太好, 小弟現時資金攤放係銀行, 想問諗SIR有咩建議我地可以資產KEEP增值?

3) 小弟想係2年內置業, 有D咩而家需要注意?

 

唔該諗SIR!!!!!!

基層學生上

答案

兩年內置業,要點是先搵份工,無收入證明就無銀行肯借錢比你。當然如你兩年內置業,即係你一畢業就可以買到樓,係現時90後一輩實屬天方夜譚。以基層學生現時財力能做到嗎? 今次讀者真係做得到! 實在值得看一看呢位20來歲的年輕人。

 

假設年半後畢業月入$13000,如獨力買樓實在難支,可是聯合女友借貸力即時為(13000+16000)/10000*2.59*50% = 3.75mil,只要當時依進度有85萬在手,買入大埔翠屏花園就當仲係二百三十萬,基層學生可以比一成首期借二百萬上會實有可能。當然讀者有現在光景,一半靠在大學借到1%年息的16萬。可是此類貸款只會借比讀者嗎? 難度全部大學生都借唔到?當然有人抱住睇定d再間唔中叫下口號既心態、排住隊直送入公屋過世係可預期的事。希望如看倌是大學生,請對社會負多點責任感、而唔係逃避責任。

 

對於借錢,不少人聽到都唔想再知落去,可是自己每晚食飯就不斷碌卡後唔找數。本blog其中一個重點,是要你分清楚什麼是好借貸、什麼是壞借貸。

 

當然社會有大學生排公屋既現象,政府實要負部份責任。當經濟結構不利年青人向上流、他們對未來沒有憧憬,那又何來供樓呢? 傳媒加上大氣侯令人心往下沉、九十年代充滿幹勁的情景已不復再現。今次基層學生未讀成書都可月賺兩萬、又知道自己借左既錢收幾多年息、更儲有50萬現金,已清楚說明30歲又想買樓又唔落手做既人係幾咁自私,希望大家不要妄想幸福安穩是自動送到面前的。

 

讀者要養成儲好銀行月結單習慣、更不要做一些亂舉債的行為。他日工作要有紮實薪金證明。對於資產建議用1/10資金買下股票,但不要因此荒廢學業、更要好好經營小買賣,他日累積了一定工作經驗之後,再將小買賣發大未遲。對於一畢業就開始創業既做法、筆者認為此會令創業成功率降低。

 

趁後生買股票是年輕人的必修課。贏錢固然好、習得贏既方法最重要。輸錢完全唔緊要,只要唔好用借番黎既錢買股票,例如讀者有50萬只買幾萬,那就算全輸但如在廿來歲搞好股票遊戲是否合適自己,他日可避免一鑊輸足百幾萬。

 

穩步增值可參考收息方法,筆者認為讀者除了賺息外、懂股票去賺價都十分重要。留意賺價同賺息是不同方略,見收息課程。至於現時即置業實在不需,保有資金等時機對讀者最重要,因為讀者有既時間應比大部份人多! 此時要注意是自己智識上的增值、思考方法之改進。用頭腦產生的槓桿才是最大的!










本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室