TLDR：恒指執位有乜好炒？答案係：冇乜好炒。順帶話埋你聽點解話香港成交低。
1. 其實開始整已經估到係無聊嘢，但反正都整完，唔爭在公諸同好。平時呢啲粗重嘢就馬仔（公司啲尊尼亞，唔係馬浚偉）做啦。
2. 恒指國指科指執位喎，哦。但今次十分平淡。固然海底撈打邊爐打到入恒指都夠痴線，但正所謂中國十九幾萬萬同胞，一人打一餐都不得了啦（況且外國都有）。之前我鳩up話遲下 打邊爐股可以成為 餐飲股下面嘅 sub sector，應該真係可以成真，到時可以有火鍋分析員（我以前做過月餅分析員，仲有海南雞飯分析員，同埋賀歲片分析員）（＊）
3. 至於農夫山泉鍾睒睒一度有錢過畢菲特，更加係夠巴閉。而我一路以為叫鍾炎炎或者鍾啖啖。原來讀 閃閃！（普通話就shan shan）
4. 但除此以外，真係冇乜好討論。恒指公司仲要將個乜乜諮詣嘅結果放到今日先玩，更加冇乜嘢好講（又，會唔會有人又話加多幾隻恒指成份股變咗「唔矜貴」「自貶身家」？日經225隻添，標普500隻添，Nasdaq Composite 2500隻添）
5. 原本仲可以講下啲執位，雖然近年我發現只係比啲分析員有功課交下。理論上咪計下有幾多資金出入，然後同個平時成交相比睇下，睇下邊隻異動。但例如上次隻信和83踢走嗰時，咁你知信和明明平時靜過烏蠅（我講隻股票，唔係個商場），但到真係執位嗰日，根本冇見到要質低股價，想低吸都唔得。當時見到係好大成交呀，但全部都盤後對晒，我估盈富一早同啲其他基金講掂數吧？
6. 咁依書直說，照玩一次。首先哥林E，新貴同踢走嘅，睇下佔個指數幾多，官方有畀埋你啦。然後哥林F，睇返有幾多錢追縱每隻指數咯。恒指咪主要盈富基金，但仲有其他被動基金嘅，外國都有嘅。咁總共咪1700億。好多咩？完全唔多，陣間解。國指就仲少，杜魯福啲friend，400億，科指？150億，仍需努力。
7. 計完，E乖F咪有G．知道有幾多資金要追或沽隻嘢咯。咁你再睇埋H，平時有幾多成交（我用咗上星期五）。G/H咪有I，總共啲買賣盤等於平時成交幾多倍。好多倍嘅咪追到/沽到氣咳咯
8. 結果？絶大多數都係1日貨仔都唔夠，見2思遷嘅都冇。呵欠。嗰時信和啲沽盤等於平時9日成交呀（但最後都冇郁到股價）。所以做完真係把托過烏蘭巴托
9. 不過仲可以講兩樣嘢，第一，我係用咗星期五嘅成交。咁不幸/有幸地，星期五係成交好大嘅一個小股災日。咁用返30日甚至90日平均，應該會好好多。點解我唔用？因為，冇在手咯。在家嘛。咁可以返公司再整嘅（仲未Last Day！仲有十日！十日過危情十日！）．但我估分別唔會極大咯，大約普嘩打返，你星期五 3000億成交，咪平時嘅兩三倍？我當你呢堆嘢都係兩三倍，咁哥林I都只係由一日半日，變做兩三日
10. 第二，盈富基金其實完全唔大，應該話，追蹤恒指嘅被動基金，根本唔多。夾埋先220億美金左右。「咁你同我比梗係好多錢」「同我比李嘉誠李嘉欣李家鼎李家超李家仁都好多錢，OK？」。但，你估下有幾多錢追縱美股標普指數？係50000億美金。咁當然美股市值大過港，但，邊有爭咁多倍？220億同50000億比喎，200倍喎
11. 其實睇你點計，但粗略計，紐交所堆嘢，市值23萬億。香港大約4萬億（美金啦），6倍左右咯。你計埋Nasdaq 咪32萬億，8倍。
12. 但仲有一樣嘢，你睇美股成交（紐＋Nasdaq），都係香港15倍咁滯。明顯香港成交係偏少啲，even adjusted for size。術語講就係個換手率低，velocity低。
13. 或者再相比下，你見香港股市同上海差不多大（係呀，定你以為自己好巴閉？），但上海成交係香港三倍。唔止，細過香港股市嘅深圳，成交係香港四倍咁滯。固然有啲產品唔同，冇完全可比性，但比你見到個成交係細的。
14. 點解？除咗因為有唔少股票根本阿公渣住唔會trade，當然就係，印花稅啦。
15. 不過話說回頭，以上呢啲數我只係睇維基百科。2019年，咁近幾個月香港係炒旺咗好多嘅。至少2019年話香港同倫敦日均成交差不多，但今年香港已經係倫敦3-4倍。都幾誇張。但印花稅當然有影響啦，雖然倫敦都有印花稅（唔係你以為邊個發明？）
（＊）我知你問有冇叫雞分析員。一早有啦，肥龍骨精強嘛。咁認真，我仲玩過「KFC全球試爆」，都食過廿幾個國家，比較偏門咪柬埔寨同保加利亞。北韓古巴當然冇，而可惜我去緬甸嗰時都末有KFC。而經過我食咁多地方，講真的，香港必然係最差。尾二應該係韓國。尾三可能大陸或台灣。
============
了解更多：股市漁夫系統 免費試用
漁夫選股系統 stockfisher.com.hk – 莊志雄博士｜最強突破股篩選系統
股市漁夫是一套高績效的選股系統，系統運用技術分析配合統計學製作出不同指標顯示短、中、長線的港股表現；較一般指數更能反映真實市況，對分析後市走勢有絕對的優勢。股市漁夫選股系統透過精密的方程式去找出股票強弱勢頭，全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。
莊志雄博士為股市漁夫創辦人及香港大學專業進修學院客席講師，並在Now 財經台合作主持《名家給力場》。
股市漁夫是香港財經媒體，而股市漁夫選股系統由莊志雄博士及成家博客Homeblogger團隊共同研發，2018年 11 月11日正式推出，此前莊志雄博士曾任職《信報》研究部主管，並先後於和記黃埔、AXA安盛、永泰地產有限公司、永道管理顧問有限公司（Coopers & Lybrand）等不同類型企業及上市集團擔任管理顧問、財務及市場分析工作，涉及範疇包括資產管理、地產、電訊及電子商貿等。
漁夫選股系統 stockfisher.com.hk – 莊志雄博士｜最強突破股篩選系統
（系統只接受信用卡付款）
收費：$ 7888（一年期）
– 一眼看清大市中短線方向
– 全天候資產配置例子教學
– 每週會員片總結宏觀觀察
– 股市掃描助手幫你省時找出潛在轉勢股份
– 股價提示功能
– 用戶教育短片示範
– 莊博將其貼市分析在系統內視頻發放
付款步驟:
2. 網站裏會看到【成爲用戶】的方框，選擇「訂閲」，然後填好資料後再按下「注冊賬戶」。
3. 利用年繳$7888選項用信用卡完成付款。
客戶服務：91010168（whatsapp）上午10：30 — 19：00