近日嘅市況，講明咗一樣嘢，就係只要有錢，咩嘢股票都可以大升。例如大家都會知道，有隻股票叫做Gamestop (Ticker: GME)，業績上係無乜前景，但只要市場要炒起佢，而又有資金跟尾，佢嘅股價就能大升。
當然，你可能會諗，GME只係一隻好細規模嘅股票，當然可以係咁。但其實，就算係一啲大股票，都係一樣。
Tesla (Ticker: TSLA) 嘅市盈率，唔知大家有無留意，係1764倍。係咪估值過高？係咪有泡沫？
我認為絕對係。仲已經唔係近日先出現嘅事，而係一早就已經估值過高，一早就已經有泡沫。但咁樣一啲都代表佢嘅股價就唔會升。呢個係理論派投資者單純嘅諗法。實際上，無論隻股票嘅估值有幾高，只要有足夠資金追入，股價就能上升。
但要小心，只要資金一走，呢類股價嘅跌幅可以好大。所以，都係嗰句，升緊你可以買，可以坐，貴一貴估值問題不大，但最重要嘅係，跌嘅時間一定要識走，同唔好逆勢買貨。
最蝕底嘅投資者，就係喺隻股票升嘅時候一啲錢都賺唔到，就到隻股票調頭嘅時候，反而走去買貨，然後食哂個跌浪，輸大錢。大家一定唔好做呢類投資者。
而點解講呢啲。因為個市已經有失去秩序嘅感覺，同有部份之前好強勢嘅股票已有可能崩潰嘅跡象，而美股係愈來愈有玩緊「音樂椅」嘅味道，音樂未完，啲股票仲可以升得好靚，但音樂一完，你要走得好快。
資金，有開始從一啲已經過去兩年升得好勁嘅股票，轉至傳統科技藍籌，如AAPL 同MSFT，以及中資股。
例如過去一個星期，升得最好嘅ETF，好多都係中資股類別。當然，中資股更講求資金流，只要資金夠，更可以點升都得。
但呢篇文最重要嘅，係個市係愈來愈似挾完就急跌嘅情況，我想先畀個警號大家。
唔係叫大家呢一刻就清倉，相反，你一啲貨都無，到時個市再升，你會因為嗰種fear of missing out，而會被引誘至喺更高位買貨。但有兩樣嘢你可以做。
第一，順勢而行。股票升，可以繼續揸，但跌就要走，同埋唔好撈底。第二，唔好成個倉揸哂股票，換啲比重做Long Call。Long Call，細注玩就可以，贏到，倍數升，都可以賺得唔錯，但跌都只係輸擺出去嗰啲錢，唔會輸身家。上個星期已教咗大家相關嘅方法。
嚟緊唔好掉以輕心。只要事事謹慎，策略做啱，股災係一啲都唔難避。加油。