今日呢篇文章，想同大家分享一下呢一刻嘅情況，可以點樣部署。
首先，我哋要知道唔同策略嘅風險排序。以下四種策略：Short Put、現金買股、孖展買股、Long Call。
由最危險到無咁危險嘅方法，我會按以下排序：
1. Short Put，若未有能力接貨 (最難控制風險)
2. 孖展買股
3. 現金買股
4. Long Call (最容易控制風險)
Short Put，好處係容易贏錢，只要你做嗰隻股票嘅股票跌幅唔大，基本上都無問題。但如果你無管理好風險，做得太大，無能力接貨，一旦股價大跌，損失可以好慘重，輸都破產都得。
孖展買股，由於涉及借貸，遇上股價大跌，都可以輸好多錢。
現金買股，相對安全。但當然，大家都要設定好止蝕位，否則若股價大跌，損失都唔細。
最容易控制風險，反而係Long Call。以下我簡單講吓幾個要注意嘅要點。
1) 細注高槓桿
Long Call 最大嘅風險，就係損失所付出嘅本金。但呢個亦係最大可能出現嘅虧損金額，就算係股災，我哋都唔會再有手尾跟，唔會再輸多一分一毫。所以，只要控制好注碼，就能控制好風險。然後用高槓桿嘅期權去玩，估中方向，回報都會唔錯。
2) 揀引伸波幅低又有能會大升嘅股票
揀期權，一定要識得睇引伸波幅。引伸波幅低嘅Long Call，有三個好處。第一，因為期權價格低，所以損失金額都會較低。第二，槓桿較高，中方向能賺更多錢。第三，時間值損秏都會較少，放長啲都問題不大。
現時嘅情況，我睇有部份板塊已有泡沫出現，但偏偏呢啲股票先係升得最勁。有啲人會因為擔心個市會跌，所以一早就唔敢買股票，呢個唔係最好嘅做法。因為，一嚟你會錯失機會，二嚟有樣嘢叫做fear of missing out，如果你一啲貨都無，到時個市大升，你就會因此而覺得蝕底，變咗會喺更高嘅位置買貨，到時風險更高。所以，現時部署住一啲Long Call，風險有限之餘，又可以繼續穩陣地睇升，我認為係更好嘅處理方法。
最後，怕時間值損秏，其實都可以適量地揾一啲高引伸波幅又優質嘅股票， 分散幾隻去做Short Put。行使價揀低啲，而只要接得起貨，風險就唔會太高。
美股個市，的當存在風險，但有危就有機，只要啲策略用得啱，可能嚟緊大家賺到嘅回報，會比之前更高。