中長線嚟講，有兩種嘅ETF升勢最勁。第一類，係ARK Invest 嘅ETF。第二類，係潔淨能源類別嘅ETF，而佢哋啲名會包括太陽能、clean energy、green energy、low carbon 等字。以上呢啲ETF，可能好多朋友都有揸住，甚至仲繼續揸緊，暫時佢哋嘅走勢仲係好好，揸緊嘅，只要佢哋嘅上升勢頭仍在，就應該要繼續揸住。
但仲有一樣嘢，如果連呢啲升咗咁多年嘅強勢ETF，都相繼走弱，我哋就要小心。
至於短線強勢板塊有三個，分別係大麻、石油設備及服務，以及中資股。
頭兩類，中線嘅表現都好差，但近月又低位反彈力度好大。要買，都未嘗不可，但如轉跌，就要走得快。
大麻ETF中，成交大嘅有呢隻MJ，但你會睇到佢嘅升勢並唔平穩，但若只論短期升幅，確係升得好勁。然而，個人嚟講，呢啲大上大落型嘅ETF，並非我鍾意嘅類別。
至於油服ETF，都可以留意住呢隻ETF (Ticker: OIH)。雖然都未係我鍾意投資嘅類別，但起碼走勢有路可捉，但如跌穿$169.43 止蝕位，就要走人。
最後一類嘅股票，係一眾中資股。
Trump，你鍾唔鍾意佢都好，但好明顯佢係好識得點樣令美股繼續上升。當然，Obama 時期，美股都升得好好，但喺Trump 上場時，已有唔少人講過，美股牛市已經升得太耐，而且估值過高，上升幅度有限。但近年，美股嘅指數仲係持續破頂，牛市仲由2009年開始，破紀錄行足11年。只不過，大概半年前開始，好多大型企業嘅股價已經無再上升，包括AAPL、MSFT、FB、AMZN。半年唔係短時間，而且唔係一隻巨企唔升，係隻隻巨企都唔升，呢樣嘢大家一定要注意。
咁Biden 當家，對邊啲股票有利？或者，大家可以留意多啲中資股。
當然，有中資股成份嘅ETF都唔少，但其中升勢又靚，持股質素又好，又可以有少少分散風險嘅ETF 有呢隻 (Ticker: EMQQ)。
現價未係最好嘅買入時機，可以買少量，止蝕位為$59.68。如往後股價出現回調而企穩再上，會係更佳嘅買入機會。