======附件=======
======附件=======
現今嘅美股，我會覺得係壁壘分明。從excel 表，畀兩張cap 圖大家睇，我諗你就會睇到個情況。先係過去一個月表現較好嘅股票。
以上資料，你會睇到過去一個月表現強勢嘅股票，大多上個星期都仍然能夠上升。
但如果係上個月整體弱勢嘅股票，上個星期大多都係下跌。當然，兩行嘅回報率係有啲關係，但亦都唔難睇到一樣嘢，就係「強者愈強、弱者愈弱」。所以，大家都要記住，要繼續買強勢嘅股票。
然而，有一點我想同大家分享嘅嘢，係好多強勢股票嘅表現都未必係咁平穩，雖然股價係大升，但升勢上落非常大。例如係Carvana (CVNA)。
CVNA 係我一隻好鍾意嘅股票，過往都幫我賺過大錢，而佢嘅股價雖然仍能上升，但股價上落好大，呢類股票其實唔易玩，大家要注意。
Fiverr (Ticker: FVRR) 亦係另一隻我好鍾意嘅股票，升幅亦都好勁，但升嘅過程又係上落好大。
兩隻股票，論基本因素或前景，我都覺得好好，但大家買嘅時候，第一，要有心理準備佢哋嘅股價波動會好大；第二，要注意注碼，唔好買太大；第三，要分散投資。如果都無問題，以上兩股，仍可買入。
但搬出呢兩隻股票，我主要係想同大家講，美股現時嘅情況就係咁，唔係無股票升，不過好多強勢股票的確無之前升得咁平穩，投資嘅難度係比上年較高。
咁仲有無平穩上升嘅股票？都有，但如果要平穩，就係揀ETF會比較好。其中一個我仍然睇好嘅板塊，係semiconductor。可參考嘅ETF，有兩隻，第一隻係SMH，第二隻係XSD。
大家會睇到，呢兩隻ETF,，升勢會比啲正股平穩好多，當然升幅未必最大，但賺錢會容易好多。要博高回報但難玩嘅股票，定係買啲穩步上升嘅投資，好視乎大家係想要啲咩。但我主要想講，如果你唔係好肯定自已可以承受到巨大波幅，往後嘅時間，我建議係可以減低股票並提升ETF 嘅比重，咁投資嘅難度就可以減低。或者，我個人嘅做法，係好大比重嘅投資都係放喺ARK Invest 嘅ETF，咁做雖然唔係好使講求技巧，但得到嘅回報係好理想，甚至會比好多人將啲股票炒嚟炒去，賺得更多。
而另外，我想再提多一點，美股局部板塊明顯已有泡沫存在，不過，大家唔使因此而擔心。泡沫，係順勢投資者嘅朋友，如果你係識得揸住啲強勢股票，愈升愈揸的話，泡沫反而有機會令你贏到更多錢。只要，到時個市轉弱，你肯走就唔會有問題。
但若然你係習慣逆勢而行，啲股票升你又賺唔到錢，到將來股票跌先走去入市，輸大錢嘅機會就會大增。
星期三，講ETF 嘅時候，再同大家講更多嘅大市情況。