歡迎大家加入新開設「美股研究報告」會員專用 Facebook 群組
https://www.facebook.com/groups/386563215606501/
正如星期一所講，美股後市啲走向，我自己都未係好睇得通，仲要再花多啲時間去觀察， 先可以確定。但以下，我都想從ETF 嘅角度，同大家分析一下市況以及未來要注意嘅地方。
先講市況。其實過去兩日，個市都好陰濕，開市前同開市後完全係兩個樣。星期一，開市前個市表現得好強，指數仲要破頂，但好快就調頭大跌。到咗星期二，開市前市況好令人擔心，但開市後就大市就企穩倒升。呢啲情況，亦都反映咗大市係有啲失去秩序。
至於策略方面，之前減咗貨嘅注碼，我唔會咁快加返，但如果大家係熟識期權的話，現時都係會有啲策略可以做。
有一樣啲唔知大家有無留意，ARKK開始推出咗每週期權，呢樣嘢，對我哋用期權嚟收時間值，效果會好好多。ARKK，我有期權持倉，以下分享一吓我嘅方法。
以圖表睇，其實ARKK嘅走勢都轉弱咗，如跌穿$120.81，我都會建議大家止賺、止蝕。但由於大市嘅風險增加咗，就算未跌到位，我覺得都可以適量減倉。
減完倉之後，我會部署一啲接貨價約$110 水平嘅Short Put，接到貨我會接，然後如最後股價連$91.80都跌穿埋，我就會止蝕。否則，就都會希望喺低位接到貨之後，坐返隻ETF上去，咁回報會比淨係賺時間值理想好多。
但要記住，做Short Put，要有能力接貨。如接得起貨，則風險都唔會太高。但若做得太大，無力接貨，一遇上股價大跌，就會輸好多錢，呢一點大家要注意。
另外，都有啲比較強勢嘅ETF，係如係晶片股ETF (Ticker: SMH)。
持有ETF嘅朋友，我認為仍可買入，但如股價跌穿$210.41，就要走人。而且，呢樣亦都係反映緊美股市況有機會轉差。
總括而講，美股嘅情況係有風險，我暫時未敢肯定佢會唔會大跌，但我覺得亦唔應該過份樂觀。如果只係提升現金水平，我認為都唔錯得去邊。
現時，我都係會更密切地留意個市，有特別情況發生，就星期五再同大家update。