過去兩日，明顯市況出現咗一啲變化。先係前晚，有唔少之前強勢嘅股票突然下跌，而且跌幅都唔細。然後昨晚，就輪到其中一隻市場上最強勢嘅ETF(Ticker: ARKG) 突然暴跌。如果只係單一日市況出現下跌，我都未必會有咁大戒心，但連續兩日市況都有呢啲情況，再加上之前啲大股唔升，中概股又減弱，種種跡象加埋，令我對後市嘅信心減弱咗好多。
今日呢篇文，我先講部署。我會減持貨1/3，待市況變得明朗先再決定下一步行動。個市無事的話，就減完呢次貨就算。相反，個市再跌，就再減貨。以下，再詳細講一講一啲焦點ETF。
細看之下，ARKG 嘅走勢已經唔係第一日轉弱，只係之前跌幅唔大，所以無特別要留意嘅地方。但到昨日，出現大跌，雖然只係曾經掂過止蝕位，但由於持貨風險已增加，所以我認為持貨者都應該先減一半貨。
再睇ARKG嘅持股，大家就會知佢嘅投資風險的確係大幅增加咗。
先係佢嘅第三大成份股，ARCT，由於佢研發中嘅疫苗效果唔掂，股價一下子大跌超過50%。但更令人擔心嘅係，除此之外，佢幾隻嘅最大成份股，股價都出現咗相當大嘅跌幅。例如係PACB、CRSP、TWST、NVTA，全部都不能倖免。
短期內，ARKG嘅股價會有機會反彈，但若然升至高位走勢再減弱，再度大跌嘅機會頗大，有貨嘅朋友要留意離場時機。
當然，若只係一隻ARKG下跌，都未至於要咁擔心，但現時嘅情況係，好似一個一個以前強勢嘅板塊都有走弱跡象，呢個先係最令我擔心嘅事。
等係一眾中資巨企，其實股價喺十一月頭見頂後，走勢率先轉差。
又例如，走勢已經算係相當強勢嘅IBUY同TAN，走勢都減弱咗。
雖然仍未能肯定個市嘅升勢就咁終結，但我認為大家都唔可以全無戒心。正如以上所講，我會先減1/3貨，再跌再減。過多兩日，星期五如有對市況更明確嘅睇法，會再同大家講。