以過去一個月嘅表現計，有三隻ARK系嘅ETF，升幅都超過20%。表現最好嘅係ARKG，升35.33%；ARKK，升23.86%；ARKW，升20.83%。我成日都提住ARK 嘅原因，就係呢間公司揀嘅股票，真係揀得好好。
始終，一隻ETF要有好表現，最重要講嘅就係股票嘅質素，而ARK就係好識得點樣去揀啲優勢嘅股票。以下，講一講幾隻ETF 嘅部署要點
ARKG，止蝕位$66.96，離現價稍遠，有貨嘅朋友繼續揸，未有貨嘅留意下一次股價回調再上的時機，有機會可以加注，惟現價太高，要有耐性。
ARKK，止蝕位$91.80，處理方法一樣。已有貨嘅朋友，應該好開心，未有貨，惟有等機會，但呢隻ETF好大機會陪美股玩到牛市尾，只要美股仍有力再上，呢隻ETF應能夠繼續升上去。
ARKW，都係，留意止蝕位$110.02，將來如有調整向上嘅時機，可以買入或加注。
事實上，喺呢度經常有提及嘅ETF，好多都升到上頂，希望大家都可以賺到理想嘅回報。
晶片股ETF，又係升到無停，現時止蝕位為$188.37，同樣有貨繼續持有，未有貨就等機會。
IBUY又係，止蝕位$91.90，唔跌穿就繼續揸。
好似隻隻ETF都升到上天，個市真係咁勁。其實唔係。
納指ETF (Ticker: QQQ)，只係啱啱升返上頂，走勢唔算勁。
又例如以上嘅中國大型企業ETF，仲要有高位調頭，不宜沾手。
點解帶呢兩隻ETF 出嚟，原因係我想話畀大家聽，個市其實唔係咁靚。呢ETF賺得好，其實係因為揀得好。揀錯的話，近一兩個月，回報未必會好理想。
最好嘅ETF，大家都已經揀咗，所以無乜其他ticker 推介畀大家。而我嘅建議，係大家留意住啲最好嘅ETF，然後等時機去買入啦。
最後，見到有報章又登出某某銀行對恒指嘅目標價預測。我想講，大家個focus 始終都應該放喺啲指數成份股嘅質素之上。當然，質素差嘅股票或指數都有機會升，但質素好嘅，長遠只會升得更多。