【漁民系列】漁利投資日記 Day 24

11月26日周四。呢兩日發生咗一件十分凶險之事。

是咁的，小弟的爸爸十幾年無買過股票，前日突然煞有介事打嚟：「有朋友俾咗隻股票我，我唔識用股票戶口，你幫我買啦。」小弟憑藉豐富的受騙經驗，第六感已經話我知唔慌好嘢，然後佢就講咗個冧把俾小弟聽：1408！

我即刻check下呢隻咁神秘的股票係何方神聖，原來係上咗市幾個月的新股濠江機電，1蚊招股三個月炒到4蚊，近兩日大成交，好明顯就係搵散戶接貨準備爆煲。微信女不時都會搵上小弟，勢估唔到今次搵小弟的係「微信爸」！

好喇，小弟又唔想逆老爸的意思，唯有硬着頭皮幫佢落盤，就在4.47元買了，然後拍張照片俾老人家覆盤話入了，然後小弟跟手就以4.46元盡沽（當然無話俾老爸聽）。今天，隻1408一開市就倒水，五分鐘就變咗毫子股，中午啲新聞係咁報。我就將一日跌咗八成的股價圖傳給老爸，佢話：「我知道啦。」我話：「我擒日見唔對路，賣了。」並勸他唔好亂聽人講買股票。他苦笑回了一句：「依家變咗仙股（毫子股先啱，仲未成仙），唉，買股票真係……我都唔識買股票。」

依家諗番轉頭，好彩係「微信爸」叫我幫佢買，如果佢將啲退休老本用自己戶口買……我都唔敢再諗落去。

今日恒指收26819點，係近半年新高；不過，個股就唔係隻隻跟得上。今日出破訊號的大市值股有平保（2318），股價剛創3個月新高，但以往績計麻麻地；板塊領袖股中國太保（2601）10月12日已出咗破訊號，股價亦創3個月新高。20日能量計仲有力度的，包括友邦（1299）、宏利（0945）及保誠（2378）呢類外資保險商，其中只有友邦未有破訊號在身。但整個保險板塊而言，其他內險股表現仍弱，未能成個板塊推動向上。

至於綜合金融服務板塊，就有點良莠不齊，早出破訊號的一批表現較好，10月尾至11月頭出破訊號的一批也唔錯，但11月中出的一批就大部分下跌。小弟持貨的廣發証券（1776）今日好像有點發力，能量加至5格。

睇番成個板塊，呢幾個月新股熱哄哄，成個板塊至今表現最好的是6月3日出破訊號的耀才證券（1428），至今升93.52%，佢出半年業績其實唔曳，收入升48%，純利升63%，每股盈利20.39仙，PE折合約5倍，或許市場期望較高，業績後股價跌落2.1元水平。睇下美國上市的FUTU都猛咁升，PE係53倍，使唔使相差咁遠？

風中勁草運輸分類中，唔少航運相關股的能量下跌，好多跌1格甚至2格，到底係轉勢定整固？小弟暫時相信係後者。組合中的嘉里物流（636）真係回調番落20天線，船長先見之明，小弟應該再mark低啲先加注，買貨方面仍然係太心急，要改進。

金屬板塊繼續強勁，五礦（1208）、江銅（0358）、中鋁（2600）繼續抽升。雖然呢個世界無後悔藥，但係如果江銅期權call既然已攞番成本同利潤，如果留番少少持有到依家，回報足足20倍，就可以蚊仔注更大聲！呢排見好多漁友買期權報捷，小弟都希望可以用系統捉到下次機會。擒日睇過兩煤好似唔錯，就long call咗神華（1088）及中煤（1898）的12月期權，不過聽船長講係預輸晒嚟博。

今日寫住咁多先。

============

了解更多：股市漁夫系統 免費試用

股市漁夫是一套高績效的選股系統，系統運用技術分析配合統計學製作出不同指標顯示短、中、長線的港股表現；較一般指數更能反映真實市況，對分析後市走勢有絕對的優勢。股市漁夫選股系統透過精密的方程式去找出股票強弱勢頭，全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。

 

莊志雄博士為股市漁夫創辦人及香港大學專業進修學院客席講師，並在Now 財經台合作主持《名家給力場》。
股市漁夫是香港財經媒體，而股市漁夫選股系統由莊志雄博士及成家博客Homeblogger團隊共同研發，2018年 11 月11日正式推出，此前莊志雄博士曾任職《信報》研究部主管，並先後於和記黃埔、AXA安盛、永泰地產有限公司、永道管理顧問有限公司（Coopers & Lybrand）等不同類型企業及上市集團擔任管理顧問、財務及市場分析工作，涉及範疇包括資產管理、地產、電訊及電子商貿等。