【莫家強】ETF一週評論 (20201118)

過去一個月,個市好奇怪,主要係炒返起啲大落後股,但好多一向強勢嘅股票,表現卻有所滑落。但買返啲回升嘅落後股唔得咩?問題係「持續性」。

 

例如係,過去一個月,以上呢隻油服ETF 升勢係好靚,但睇見幅圖,你都會知道呢個行業基本上係處於長期`弱勢。油服行業會有長遠發展嘅前景嗎?相信唔會太大。呢個行業,短炒或者都仲可以,但長揸就唔使諗。另外,呢啲ETF就算短炒都要小心,因為佢哋升完之後,都好容易又再跌過。

 

咁仲有無啲好嘢?有,但暫時真係唔多。以下呢隻DRIV,係其中一隻。

 

呢隻ETF,專係買同自動駕駛汽車同電動車嘅股票。但睇完個list,你或者就會發現,呢個行業係比我哋想像中,涵括更多股票。

 

我鍾意呢隻ETF 嘅另外一個原因,係佢升,並唔係只因買中咗隻NIO。佢嘅持股比重分散得好好,而之所以佢成隻ETF都升得好靚,係因為大部份佢嘅股票都做得唔錯。

 

呢隻ETF,即使大家唔買,都可以用佢嚟做買股票嘅觀察名單。但想買DRIV 嘅話,就要等等,但止蝕位都好遠,最好等跌後企穩再回升之後先買會更好。

 

除此之外,亦可留意隻晶片股ETF (Ticker: SMH)。

 

晶片股,個別去買,好多時間股價上落都會好大。但用ETF 買,會比較容易玩。

 

SMH,基本上股價走勢一直都係維持住大漲小回嘅格局,跟住「樓梯級」去玩,就已經可以。現時,止蝕位為$188.37,現價都可以買入,唔跌穿就繼續揸。

 

但整體而言,美股整體嘅市況,其實都有啲暗湧。暫時,我個倉位,都唔會做得過份進取,持股量喺一半以下,配以一啲價外Short Put,收吓時間值先。若之後市況轉好,有更多有條件長升嘅版塊走勢轉強,我哋一定會知道,到時再更進取地入市買升都唔遲。

wtsapp icon top