【莫家強】揀創新科技股的三大重點

短線而言,美股充滿變數,暫時真係唔敢肯定仍然仲係牛市,定係已經入熊。不過,有一啲嘢,如果大家學到,對將來投資一定有幫助。

 

而今日嘅內容,係嚟自ARK Invest 嘅網站,我覺得好有用,所以想同大家分享。由於資料性多少少,所以會用文章方式帶出。

 

ARK 揀創新科技股,會睇三樣嘢。

 

  • 1) 源於需求上升,出現生產成本大幅下降

 

呢一點好聰明。試明如果你所在嘅行業,提供服務嘅成本不斷上漲,自然你嘅盈利就會蠶食。好似一啲長期被加租嘅生意,你做極,都只係幫地產商打工。但如果係你嘅產品同埋服務,唔單止需求有所增長,仲要生產成本可以一路下降,賺嘅錢當然會容易大幅增加。

 

  • 2) 業務要係跨地域、跨行業

只係得一個行業,或一個地方可以發展,生意會難啲做得大。但例如係5G、雲端技術呢啲,將來基本上乜嘢行業都會用到,全世界嘅企業又會用到,發展空間肯定大好多。

 

例如5G,大家會熟識啲。用手機上網又係5G,智能車又係5G,智能家居又係5G,遙距做手術又係5G,將來仲會係全世界都會用到,又跨地域,又跨行業,可想而知個業務可以做到幾大。

 

又例如,以前嘅蘋果iPhone,一部手機,就搶哂以往電腦、輕便相機,加上佢嘅apps,就搶哂好多唔同行業產品嘅市場,仲要賣到全世界都搶,令世界變成全世界首屈一指嘅公司,所以話呢一點又係非常重要。

 

  • 3) 成為帶來更多創新嘅平台

 

用返蘋果做例子,一部iPhone,成就一個app store,令好多人因此去創作好多好有用,好有質素嘅apps,最後令蘋果賺大錢。

 

又例如,電池技術嘅演化,同樣帶來更多產品嘅創新。持有呢啲技術嘅公司,除咗可以賺到好多錢,仲要可以賺一段好長嘅時間。

 

以上三點都符合到嘅公司,如果生意發展得順利,股價升幅可以係好巨大。當然,睇多啲唔同資訊,思考多啲,會令我哋可以發掘到更多呢類公司。但參考ARK 嘅ETF 持股,都會有幫助。

 

今日分享到呢到,關於市況,星期一再講。

wtsapp icon top