10月29日周四。物管板塊今日集體回勇，係咪見底未知，要再觀察一段時間。點解咁留意物管板塊？除咗小弟有一直觀察外，亦因為由兩隻大型內房分拆出來的兩隻物管股世茂服務（873）及合景悠活（3913）暗盤都破發，雖然小弟冇抽執身彩，都想睇下對整個板塊的影響。
10月29日周四。物管板塊今日集體回勇，係咪見底未知，要再觀察一段時間。點解咁留意物管板塊？除咗小弟有一直觀察外，亦因為由兩隻大型內房分拆出來的兩隻物管股世茂服務（873）及合景悠活（3913）暗盤都破發，雖然小弟冇抽執身彩，都想睇下對整個板塊的影響。
首先要多謝Bill兄的「拋磚引玉」，實在衷心感激！我本來係無寫交易日記的習慣，所以一路以來都只係大概知道自己衰啲咩，但好難具體咁講出來同去改善。呢個亦係船長叫小弟嘗試寫30日投資日記的原因，除咗希望藉住各位師兄師姐指點令小弟有所提升（船長成日話漁民之中好多藏龍臥虎的高手），亦有一啲係比較初階的漁友，或者可透過小弟的錯誤或經驗，能夠達到相互改善之效。所以大家切勿視我漁利係咩大師高手，我的交易更加唔係買賣建議。之但係我會盡量將每次利用漁夫系統的過程同每個交易的理據寫出來，希望留個紀錄俾自己之餘，亦能與各位漁友一同進步。
開始做功課。主要大市值股訊號又出咗兩隻股票，一紅一綠，紅的竟是中國平安（2318）！出咗突破訊號無耐咋喎，係咪漁夫系統壞咗？
除咗本身公佈業績曳之外，小弟睇番之前平保過往三次破買止沽的往績，其實都係輸錢，而對上一次「破止」維持咗10日，今次仲短，維持得兩日！咁亦撩起小弟開始使用漁夫系統時的記憶。
記得小弟開始用漁夫系統時，梗係奉之為炒股神器，凡親有突破訊號即刻跟買，仲唔發達？但幾個回合之後，我才發現，系統並唔係咁用的，世界上亦唔會有個系統係出訊號你合埋眼跟買，就會令你發達，相信呢個亦唔係船長創立漁夫系統的原意。每隻出突破訊號的股份，有機會係倍升股，亦有機會係假突破，呢樣嘢需要觀察；如果真係倍升股，我唔介意買貴10%，此所以點解小弟常常話觀察下先。船長成日講observe, don’t predict，我都係好耐之後先開始明白少少。
小弟又試下分享睇突破訊號的經驗。我覺得用突破訊號，要配合埋股價圖及成交密集區來睇，最理想是股價剛剛升離成交密集區的同時又出突破訊號，個人認為咁樣成功機會係較高（當然無話百分百）。如果係急升後出突破訊號，小弟多數都唔會追，寧願等多幾日佢呈現旗形走勢而成交收縮才出擊，一來止蝕較易訂定，二來船長亦話過旗形走勢係成功率較高的上升趨勢。
講咗咁多廢話添。講番另一隻綠色的華潤啤酒（291），行業屬食品與飲料，同板塊一早出咗突破的領袖股有原生態（1431）（呢隻小弟百分之一千唔會買，小弟一向唔信奶業股）、周黑鴨（1458）、頤海（1579）、蒙牛（2319）、日清（1475）及第一太平（142），其中第一太平我係對走勢有點信心，但十五十六下失諸交臂。華潤啤酒相對而言係落後股，走勢亦唔算太突出，暫時唔考慮住。
風中勁草，Alice師姐的藥明康德（2359）剛出完季績，小弟對乜藥打乜藥都唔識，呢方面真係要請教漁EC這類專家；簡單睇報表，2020半年收入增長22.68%，歸母純利升62.49%；首九月收入增長27.34%，純利升34.17%，即收入速長快咗，而純利增長慢咗，通告解釋除咗主營業務強勁增長，投資目標的公允價值變動合計增長6億人民幣。我唔知市場點詮釋呢份業績，但藥明康德係市場少量有盈利的醫藥股，仲有藥明巨諾（2126）仲快上市，短期內應該唔會太差，希望冇睇錯。走勢上升離108至120元係成交密集區，RS跑贏大市，OBV亦強勁，小弟愚見值得跟進，只嫌突破成交唔算大。
投資組合方面，特步曾經跌穿止蝕位2.69元，必須警惕，但未止蝕，主要是船長曾經講過，以收市價作止蝕，可減少盤中波動的影響，因為細注，今次決定跟這個紀律去做。
其實小弟以往有個習慣，每次買入之前，都會即刻為所買股份訂一張長期的止蝕單，呢個做法可以較安心，但就有一個缺點，就係會中船長所講的stop-hunting；收市價止蝕，則虧損幅度可能會比預算為大。呢方面仍然在調整中，但一定會跟隨紀律，收市價跌穿2.69元便止蝕。
大市走勢方面，市寬仲係跌緊。
今日寫住咁多先。
