美股嘅走勢有所好轉，上升嘅股票數目有所增加，至於有咩ETF 表現較佳，我會首先想大家留意幾隻ARK 系嘅ETF。
ARK系ETF，我相信大家都唔會陌生，呢度亦應該有唔少朋友都揸住，並且有錢賺緊，而以下係幾隻ARK ETF 嘅走勢。
表現最好嘅，要數ARKG。呢隻ETF，主要係投資與基因有關嘅創新股票。股價走勢好強，但距離止蝕位已遠。唔跌穿$58.13 可以繼續睇好，要加貨就等調整而上，「上樓梯」嘅時候加貨。
如果唔知邊隻ARK 嘅ETF 好，我經常都會同大家講，不如睇吓ARKK。
ARKK 係當中成交最活躍，而且係最大包圍嘅ETF。唔知揀邊隻，最簡單，揀佢就可以。
ARKK 嘅止蝕位係$85.27，近就唔係近，但如果真係無貨嘅朋友，都可以分段買少少。至於已有貨嘅朋友，除非股價跌穿止蝕位，否則可以繼續揸住。
ARKW，屬於互聯網相關嘅創新ETF，走勢都好靚，處理方法同ARKK 一樣，無貨可分段買少少，留意止蝕位$100.44。
另外，講開互聯網，不得不提雲端股票好多都正在發力。
WCLD，係雲端股ETF，近日嘅升勢非常凌厲。無貨嘅，可以先小注買入，待整固再上後再加注。
至於另外兩隻雲端ETF，SKYY 同CLOU 都可以考慮先買細注，往後再加。
另外，網購ETF 都正在重新發力。
大家熟悉嘅IBUY，現價可買細注，整固後企穩再上再加注。暫時止蝕位係$82.00。
另一隻網購ETF (Ticker: ONLN)走勢都相當好，止蝕位為$59.42，都值得留意。
整體而言，美股走勢正在逐步增強，所以我自己呢兩日都有加注買貨。但隨著美國大選漸近，都要留意相關影響。