【李聲揚】香港股票冧把簡史

7號仔大插，令我諗起單舊新聞。兼講埋香港歷史

1. TLDR：有冇諗過點解咁靚嘅冧把，會係一間你都唔知係乜嘅公司？其實上手用家係大公司，但已死，個冧把好似電話號碼咁拎返出嚟用。咁數下1-20號，13同20不存在，但屍骨未寒，好多人知道之前係乜。之但係，7號仔呢？9號仔呢？15呢？聰明嘅有機會估到7同15，但9號仔就真係要夠老夠熟書先估到。

2. 舊年單新聞，香港金融集團獲京首富購入5%（https://bityl.co/3sNN）。真係是日標題。住宿一流大酒店。

3. 絶對冇錯喎，不過你以為北京李嘉誠或北京李兆基入股恒生或東亞或乜，就表錯情。被入股嗰間香港金融集團，就係呢間7號仔，「香港金融集團」！

4. 幸好，李曉華就真係北京首富。並唔係有間十九公司叫「京首富」

5. 又，都總有人問，其實股票冧把，1-20號啲細冧把，你都估到，多數係啲老牌公司大藍籌。1號長和（以前長實）2號中電3號媒氣4號九倉5號匯控6號電能（以前港燈）8號仔電盈（以前香港電訊）之類。

6. 呢間7號仔，「香港金融集團」，未跌之前，都成20億市值，唔算太細（大把公司幾億市值），但何德何能做Lucky Seven？同另外1-8嗰堆爭好遠吧？

7. 你會發現，20以內有幾個冧把啲公司你係唔識嘅。做乜會拎到呢啲冧把？答案就梗係原本啲公司消失咗，循環再用（＊）

8. 7號，以前就係，大名鼎鼎嘅置地（對，置地廣場個置地），後來政治原因，怡和遷冊去新加坡上市。置地當然都係，全系拔起。

9. 咁你估到了，1-20入面另一隻你唔識嘅，15號，正係怡和。至於而家間15號盈信，倒係N年前同我有啲交集，但就唔方便講了。Anyway第二代15號嘅盈信早兩日都私有化成交，就快消失。可以有第三代。

10. 至於1-20入面仲有一隻唔識嘅9號仔，以前係乜？難估呀

11. 就係TVB！或日，TVB 511未死喎。係，未死，江澤民都未死，不過亞視死咗，有線都幾乎死埋。TVB只係蝕錢，蝕得起的。七孔流血還七孔流血，死還死。

12. 真係想當年，TVB十分巴閉的，唔止做電視，仲有好多非廣播業務。出書啦（博益），唱片啦（華星原本係TVB的），仲有旅行社（見聞會社！一講就出賣年紀）

13. 同埋，最重要嘅，便利店！地利店！最初係香港電視服務站，曾幾何時係第三大連鎖（7仔同OK之後），仲應該係霸晒地鐵的。當然當年地鐵又未上市，政府嘢，背後有乜勾結就自己諗。

14. 因乜消失咗？就係因為政府修例話唔畀電視台經營其他業務（得罪方丈啦？）。被迫要重組，分開兩間公司。電視就係你而家見到嘅電視廣播511，非電視嘅就去晒新公司，再上市，TVE電視企業，9號仔。之後再私有化，然後又賣畀無線股東，郭鶴年嘅嘉里。最後去埋都係郭生嘅南華早報（pre馬雲年代）。最後啲便利店業務又去埋7仔，地利店變晒7仔，一統江湖。留意華星（唱片，唔係冰室）同博益都係去埋南早的

15. 至於而家懸空嘅13號，比較近代，應該好多人都知係和黃

16. 其他10恒隆，11恒生，12恒基，14希慎，16新鴻基，17新世界，18東方（係呀，歷史好耐，冇睇「雷洛傳」？），19太古。呢啲都好多人識嘅老牌公司。

17. 20？咪會德豐，消失咗冇耐啫，私有化。

18. 再講一次，7號係置地，9號係TVB，13和黃，15怡和，20會德豐

（＊）留意，改名，唔同消失咗循環再用。改名嘅好閒，有啲公司改幾廿次名。例如呢間7號仔，而家「香港金融集團」，以前「凱富能源」，再之前係「高信」。呢堆都係叫做「同一間公司」，改名。但以前嘅7號仔置地，就完全唔關事了。正如183而家宏輝，之前田生，全美國際，豐盛創意，都係同一檔嘢—但我睇嘅年代，間嘢叫做中信國金，CIFH—就係一堆中信銀行/中信嘉華銀行嘅混合體，私有化消失咗。

============

了解更多：股市漁夫系統 免費試用

股市漁夫是一套高績效的選股系統，系統運用技術分析配合統計學製作出不同指標顯示短、中、長線的港股表現；較一般指數更能反映真實市況，對分析後市走勢有絕對的優勢。股市漁夫選股系統透過精密的方程式去找出股票強弱勢頭，全天侯自動分析個股走勢、突破股、大市評論及視頻等功能。莊博士獨家的運算方程用 「破勢」、「止賺」把機會向用戶展示。漁夫選股系統更有不同種類之篩選股票準則來提高勝算。

 

莊志雄博士為股市漁夫創辦人及香港大學專業進修學院客席講師，並在Now 財經台合作主持《名家給力場》。
股市漁夫是香港財經媒體，而股市漁夫選股系統由莊志雄博士及成家博客Homeblogger團隊共同研發，2018年 11 月11日正式推出，此前莊志雄博士曾任職《信報》研究部主管，並先後於和記黃埔、AXA安盛、永泰地產有限公司、永道管理顧問有限公司（Coopers & Lybrand）等不同類型企業及上市集團擔任管理顧問、財務及市場分析工作，涉及範疇包括資產管理、地產、電訊及電子商貿等。