要令賺錢變得容易，可以考慮買ETF，特別係一啲大路而強勢嘅ETF，走勢會更平穩。當然，呢啲ETF 唔會有個別股票嗰種爆發力，短線回未必會係最好，但以中長線角度去睇，佢哋絕對可以係好理想嘅投資。
過去一個星期，整體而言，美股嘅表現都唔算十分好，但如果你仍然係繼續持有納指ETF (Ticker: QQQ)，我相信你會好開心。
三大指數入面，毫無疑問，納指嘅走勢比S&P 500指數，以及道指更好。QQQ，短期內雖未有好理想嘅買入時機，但如果大家已持有的話，記住唔好咁容易被一啲話係估值過高嘅聲音令你沽貨離場。隻ETF繼續升，你要繼續揸，直至佢跌穿止蝕位為止。現在嘅止蝕位為$251.32。將來待止蝕位調高時，或會有適合再買入嘅時機，要留意住。
另外，事實上，今個星期，我無太多新嘅推介，現舊嘅推介，走勢都仍然唔差，所以唔會為變而變。
ARKK，係另一隻我都好睇好嘅ETF，佢嘅最大持股，係近月市場嘅最大焦點股TSLA。
近日TSLA 嘅股價出現整固，當然或多或少會對佢嘅股價造成影響，但如股價再度有力向上，我認為仍然可追。現時止蝕位為$81.24，不算近也並非有遠，夠貨嘅可以等更佳時機，未夠貨嘅則可以分段買入。
上週嘅提及過嘅其餘ETF，例如係XRT、SMH，走勢都仲係好靚，可繼續持有。但除此之外，有另一隻ETF，都值得大家留意，呢隻係博彩ETF BETZ。
呢隻ETF，唔算推出咗好耐，但8月嘅表現，相當亮麗，當然呢個係因為世界各地好多唔同球賽可以重開有關。嚟緊嘅一段短時間，例如好多足球賽事，都會開始休假，有機會影響BETZ嘅表現。但如果ETF 嘅股價喺未來出現整固，但企穩再上，則我認為會係一個唔錯嘅買入機會。
不過，亦要注意風險，如疫情再度變得嚴重，令體育賽事要再次暫時，呢啲股就要好快離場。
最後，美股喺短期整固後，似又再有發力跡象，我會睇實有咩板塊嚟緊會表現強勢，到時再喺facebook 群組update 大家。