歡迎大家加入新開設「美股研究報告」會員專用 Facebook 群組
https://www.facebook.com/groups/386563215606501/
====================
週一美股尾市回跌，本來我都有啲擔心。但美股有個特性，就係喺跌完之後，只要第二日能夠回穩，後市通常都會無乜大礙。
所以，當昨晚美股能夠回穩，我自己都再無咁擔心。之不過，見到有跡象資金可能作重新部署，強弱勢板塊有機會「洗牌」，今日想集中講吓。
一直睇好嘅HERO，走勢是否轉弱，仍有待觀察。但呢隻股，你無可能靠止蝕位，咁可以點做。
如果喺未來幾個交易日，佢嘅股價可以升返上通道，咁就乜事都無。但若然佢開始跟唔上通道升幅，我就會開始逐步減持。可能，第一次先減1/3。過幾日，如股價走勢再無起色，就再走1/3，直至走哂為止。
至於另一隻睇好嘅EMQQ，情況就簡單一啲，止蝕位為$45.85，跌穿就要走。但相反，如股價能於現水平企穩，有力再上，呢個位其實仲可以加注。
至於IBUY，走勢相對而言係無咁受影響，只不過係週一股價下跌，但昨晚已能企穩，加上止蝕位唔遠，如見市況再無大礙，我認為可作買入。
另以，見到唔少太陽能股嘅ETF出現異動，相關ETF可以留意。
其中可以睇吓ICLN，名為iShares 潔淨能源ETF。
如直接買呢隻ETF，可用$12.00 作止蝕，但亦可以ETF 持股作名單，部署買入個別股票。
Sunrun (RUN)，初步睇我自己都幾鍾意，但升得太勁，無法，要等等。
另外，ARKQ、ARKK、ARKW，三隻ETF都仍然強勢，仲可以繼續持有。
ARKQ，止蝕位為$44.73。
ARKK，止蝕位為$67.73。
ARKW，止蝕位為$80.72。
總括而言，大市暫時我睇無乜大礙，但有啲之前強勢嘅股票會有轉弱可能，跌穿位要識走。相反，若你持有緊嘅股票走勢無明顯轉差，就唔使特別擔心。
未來市況如有突變，會喺facebook 群組update 大家。有問題都可以電郵至 [email protected] 畀我。星期五再講。