事先張揚 20200619 – 港交所突跛300蚊

 

事先張揚專欄加強服務,有ivan錄制video,更有文字講返拍攝的內容,無論你想睇片定睇字,ivan都有料比你
今次題目為「2020年下半年股市樓市展望」,內容賣大包,30min講足有突,不容錯過
內容:
1. 下半年ivan話一定要買d野,究竟點解同買d乜?
2. 埃汾樓市睇法
3. 恆指及美股目標價
4. 資產配產實際做法
5. 心水股票六隻
本星期內特惠售價: $80

課程編號:CC002

[ 按此報名觀看 ]

================================

聯儲局縮表!

阿里健康狂升

港交所突破300

版務:下星期一係最後一期專欄

 

今日係倒數第二篇專欄,下星期一會係最後。有人其實提議我不如介紹下睇咩網站,睇咩書。其實都可以,不過不敢保證住,視乎得唔得閒。同埋,話晒畀讀者知我在邊度睇嘢,可能大家就唔會再科水訂專欄(但其實應該唔會)

 

聯儲局縮表!

完全唔起眼嘅新聞,亦唔係咩好大件事,唔使放到好大。但就同大家分享下,真係主流冇乜人講

 

上圖,好多人都見過,聯儲局嘅資產負債表。咁你話,不停印錢擴表,仲邊係新聞?冇錯,根本唔係新聞。

 

但如果縮表收水呢?就係新聞了!見到,最新一個星期,聯儲局嘅資產負債表,係收縮的。你甚至可以解釋為收水。2月以嚟首次。亦可能因為咁,所以呢排股市都冇乜力?

再加埋,你見到,美匯指數呢排幾強—唔係升好多,但都係連升幾日。咁睇舊文都知,美匯指數強,多數都不利股市。

點解會收水?係咪以為之前啲就業同經濟數據唔錯,而股市又強,咁聯儲局覺得可以掉轉行?我估唔係。你睇之前幾次,聯儲局真係極少會提早收,有遲冇早。摩根士丹利(上圖)都仲預呢兩年內,聯儲局資產負債表,會擴張到10萬億(而家7萬億左右)

 

其實似係一啲技術原因,你見新聞有慢慢解。應該只係短期嘅嘢,大方向應該不變,不過就及早話畀大家知。因為,可能我理解錯嘛。幾時都係咁,保持樂觀,但亦要警惕。

 

阿里健康狂升

 

 

今日都有讀者PM我問,做乜收市有啲異動,做乜今日成交忽然大咗,係咪有指數執位。呢啲咪好讀者,首先,簡單嘅問題我會即答嘅,同埋,至少佢自己做咗功課。

 

冇錯,今日有富時指數執位。阿里健康(241)係其中一隻新貴,你見今日27億成交,好誇張。而家市值去到2800億,大過好多藍籌。例如大過長和(1)同長實(1113)—但當然,個流通市值唔同,唔等於阿里健康即時入恒指。

 

其實之前都推介過下呢隻嘢,但都唔敢認叻。講真,點估到升到咁嘅位?而同隻平安好醫生(1833,呢排弱),我甚至根本唔知呢啲公司做乜,真係只係炒個股東名氣。其實冇嘢的,但要好清楚呢啲係投機,要睇得緊啲,唔好放幾星期假唔望,同埋控制你個注碼咯。

 

另外仲有阿里巴巴 (9988),翰森製藥 (3692)都係新貴,股價強,但並唔係特別誇張。而最得意地,申洲 (2313),新華保險 (1336)同中交建 (1800),應該係被踼出嘅。但偏偏股價三隻都升。所以都係嗰句,投資唔好想當然

 

港交所突破300

另一方面,港交所(388)今日破頂,卒之守在300蚊之上。但係咪因為今日1500億成交?就當然唔係啦。一路都係炒嗰樣嘢,就係中美交惡受惠股。某戰績好好嘅基金經理,甚至話呢隻係唯一值得買嘅香港股票。

 

除咗阿里巴巴(9988),網易(9999)同京東(9618)外,最新就係講隻百勝中國(Yum China).其實Facebook Page 都有講,KFC,Pizza Hut同小肥羊母公司。最初係美國公司Yum Brands(前身係百事可樂快餐業務,所以KFC同Pizza Hut都係飲百事),後來分拆Yum China美國上市,而家就話嚟香港第二上市。我在Page講時都只係傳,而家就話交埋表了

 

不過講真,咩Yum China呢啲,真係不能同阿里巴巴相比。市值同成交未必幫到港交所好多。所以港交所呢浸,可能都差不多了。

 

但仲有乜大公司未上市?有,有隻未在美國上市添,照計都唔會。就係「字節跳動」ByteDance。冇聽過?就係「抖音」母公司。講緊,可能1000億美金估值。係肺炎後嘅事添喎。10億美金估值嘅初創公司叫獨角獸Unicorn,100億美金就叫十角獸decacorn.1000億美金估值?叫百角獸,Centicorn.可能而家係只得字節跳動一間

 

版務:下星期一係最後一期專欄

 

不經不覺,就過咗3個月。下星期一會係最後一期專欄。實情係幾感動嘅。有時覺得自己寫得唔太好,但肯定算係越寫越好,應該對得住讀者。

 

之後點?暫時可以答嘅係,收費專欄應該會繼續,亦都應該唔會大加價,但有可能轉另一個平台。另外,我同homeblogger之後會有另一啲嘅合作,好快會宣佈。

 

可以留意我嘅Facebook Page

 

或者,如果想知道最新情況嘅,可以Facebook PM我,或者email我:[email protected],或者whatsapp我: 9809 8494。話我知你想再收到,咁我可以第一時間通知你。

 

wtsapp icon top