課程編號：CC002
================================
大市繼續受壓，但應該唔會穿之前低位
睇住拆息就安心
人分五等：美國經濟衰退嘅教訓
版務
—-
大市繼續受壓，但應該唔會穿之前低位
美股星期五反彈，但到今日（星期一）美股期貨大跌，港股都跌。記得之前都寫過下，美股急回真係不意外。甚至並唔係因為上星期四聯儲局嘅咩經濟預測差過預期。因為睇真啲，聯儲局嘅預測，其實係仲好過出面經濟師估嘅數。例如聯儲局估出年經濟反彈5%，似乎出面嘅行冇咁樂觀。
講到尾，美股急跌都係貴，同埋超買。上次都提過，好多妖象。除咗話散戶狂炒破產股（JC Penny，Hertz，Chesapeake）外，仲有體育網站創辦人化身炒股KOL。此人非常有娛樂性，聲稱股票只會升唔會跌（埃汾應該冇咁同你講，只係話你知長期股票應該升），仲話自己勁過畢菲特，股神已經過時，佢取而代之咁話。
無論如何，我依然相當定，照計你地都應係。I mean，無論你同唔同意我都好，你嘅3月都係我嘅3月，對不？經過3月咁恐怖嘅市況，你仲會驚星期四美股跌2000點？甚至而家嗰幾百點？
但，都係嗰句，之前話覺得升得多得滯，唔敢買嘅。又可以問下自己，拿，而家跌落嚟啦，係咪買？定係又等定跌先？其實有邊次跌定會話你知。
而除咗話超買，估值高外，比較值得擔心嘅，就真係疫情第二波。的確驚。雖然好似唔少政府（主要係美國），講到明，第二波都唔會再封城。咁就自求多福。而家咩幾十幾十單你可以當冇事，但如果真係去返好似3月咁大爆發，又點算？真係唔封？定最後唔封又要封？
幾麻煩嘅係，至少見到在美國，之前炒經濟重開嘅航空股，應該有排跌。
但我依然傾向相信，政府真係唔多敢再令經濟停頓。所以照計，大市點跌都唔會點穿3月個低位。當然啦，就算道指或恒指，跌多3000點，都嚇死你了。
睇住拆息就安心
都真係的，即使上星期四美股跌2000點，我在專欄都話好老定。今日（星期一）亦都暫時係（美股未開市）。原因就係覺得只係獲利調整，唔係真係危機再臨。你話，2000點都唔係危機再臨？No No No，睇另一啲嘢。
你見，港紙一個月拆息，連跌12日。試問有幾恐慌？你睇3月中嗰時（樓下有表）？或者睇下國安法大跌市嗰日（樓上個表5月22日）？
有機會寫多啲，但，樓上呢個圖，1個月港紙拆息同1個月美金拆息嘅差距。舊年年尾開始，見到個圖係綠色，即係港紙拆息高啲。係咪一定壞事？你話呢？2019年尾冗仲要升，而之前你見幾年紅色，其實恒指大升又有，大跌又有。
講返，最近港紙美金拆息息差，係收窄咗的。最新只係去到35點—年頭去過成100點（即係1厘）．而家1個月拆息，港紙0.55%，美金0.2%左右
港紙拆息仲有冇得跌？可能仲有，但應該未必太多。都話美金拆息都只係0.2%。當然極端地，係可以跌到低過美金拆息（其實2016-2019都係咁）。實際上？我估可以跌返去大約0.2%左右，即係返返去2015年（下圖），美國未加息嘅世界。都合理丫，加咗嘅息都減返晒，而去到2022年尾，聯儲局都話唔會加息住。
人分五等：美國經濟衰退嘅教訓
美國經濟已經陷入衰退添，但剛剛先話你知2月衰退，而3月股市跌到反艇。如果你2月識得沽空而又及時在4月平到倉，咁你叻仔，但絶大多數人都唔會。甚至3月最恐慌時不停咁估會跌跌跌。而咩衰退呢啲，今日你先知—仲要好難得NBER（就係呢個機構宣佈咩係擴張咩係衰退）咁快手，以往係事隔好耐的。但都幫唔到你乜
咁你話，睇返疫情數字如何？有啲幫助，但睇下上圖。美股瀉得好急嗰段，其實疫情未係大爆發。再一次證明股市永遠最敏感，稍為聞到燶味已經急急腳走。然後你見新增個案急升嗰時？個市已經見底。咁理論上，其實你去見疫情見頂先買（紅色轉角位），都賺到少少嘅。但實務操作上，可能你又見股價低位升咁多應該反映晒，可能又等回一回先買，可能又覺得疫情仲有機會第二波。實情呢，自己落場買就知，邊有得咁完美。到所有嘢都清晰晒，班車走咗九世。
事後見到，最賺到大錢嘅，第一等勁人，當然係你3月頭沽空（但要4月頭平倉），或者3月尾大手買。但大家都知，近乎不可能。
比較可行嘅，埃汾咁，keep 住持倉，有閒錢（唔太多）再分段加注，咁你見2月3月放入去嘅錢，而家已有不錯回報。但當然講銀碼唔會太多。（講到自己第二等咁好似好自大，即係咁講啦）
再低要求少少嘅，唔加倉唔減倉咯，或者keep住月供嘅，都冇乜問題。如果3/4月時唔睇新聞，而家睇返，喂幾好喎，啲科技股又創新高，好似咩都冇發生過。相信大家都可以做到呢個層次。
再差啲嘅，信咩現金為王，咩都冇渣嘅。當然可以唔使點輸錢，但其實係慢性自殺。必然跑輸通脹。
最低等？就係之前見人買佢又買，但到3月一個浪打埋嚟時就反艇嘅，3月中或尾沽股票，甚至走去換強積金嘅人。必然係低位打靶，高位唔敢買返。然後日日上網鬧：「股市脫離實體經濟」。
版務
好多人都問，到底呢個專欄到6月22日後會點。其實係好事，證明唔少讀者都鍾意睇，否則有得佢自然死亡就得，使乜問我。
暫時可以答嘅係，收費專欄應該會繼續，亦都應該唔會大加價，但有可能轉另一個平台。
另外，我同homeblogger之後會有另一啲嘅合作，好快會宣佈。
所以都係，如果想知道最新情況嘅，可以Facebook PM我，或者email我：ivankirsten@gmail，或者whatsapp我: 9809 8494。話我知你想再收到，咁我可以第一時間通知你。