港股話咁快就收復國安法跌幅
呢6%嘅反彈，升啲乜？
美國GDP跌超過50%，美股低位已反彈40%
港股話咁快就收復國安法跌幅
凡事樂觀，雖則今年買股票好多時會輸錢（利申：埃汾份身家已經多過肺炎前嘅高位，但當然中間有加過倉，所以其實總回報仲係輸少少），但凡事樂觀都係冇錯。
今日值得紀念，唔只係因為恒指升300幾點（其實只係1.4%，極濕碎）。而係今日，就剛好返返去「國安法」前嘅位。只係7個交易日。如圖
仲記得5月22日，一跌就1350點，近6%，的確係急跌（唔係「急瀉300點」之類嘅笑話），one percent event（即係睇返指數每日升跌，100日都冇一日會跌6%）．然後人人當然向最壞情況諗，以為見21000，甚至18000，因為港紙變廢紙，云云（但其實，明明一大堆都係大陸公司，A股都未變廢紙喎？）
所以呢，星期一三五睇埃汾嘅專欄就十分好。如果有定力，特別係本身唔炒股票嘅，咁得閒睇下新聞都好。但自問膽細冇定力嘅，我真係建議人睇少啲財經新聞。真的，越睇你越驚。況且媒體一定跟紅頂白，升嗰時不停搵理由話你知可以一路升，三萬睇四萬，四萬睇十萬。跌時亦係，兩萬四又話試兩萬一，兩萬一又話試萬七。
根本就係菩提本無樹，何處惹塵埃？你見發到好似世界末日咁嘅事，都唔使兩個星期，就彈返去原本嘅位。你睇拆息？又再回落嚟。你睇港紙？今日7.7501，真係「差一點」就又頂返去強方保證。走資？走乜資？
「唔係喎我見明明有人調走資金」。咁既然，有人調走資金，個市都仲係7日低位升6%，港紙可以頂到上7.7501，拆息又唔會升嘅。咁使乜理嗰啲人？
當然我從不盲目唱好香港（事實係埃汾相當討厭香港，否則唔會搞台灣移民），但，唔好將你個人嘅情感，當係世界會發生嘅事。
而講咗一大輪，亦唔好忘記，今年恒指高位見過29000，而家仲係潛水超過15%。
不過呢度，又畀你睇到另一樣嘢：你覺得咁多壞消息，個市仲升「唔理性」？有冇諗過，如果平行時間，冇壞消息，就唔止升咁少？港股跑輸幾多年？甚至連今年高位都仲有排未到。
所以，諗嘢唔好咁表面咁單一方向。
呢6%嘅反彈，升啲乜？
送多個圖畀你，呢7日反彈，表現最好，同最差嘅10隻恒指成份股。
自行演縮，但我會睇到兩個重點：第一，你見普遍反彈最勁，係啲香港公司。友邦（1299），九倉（1997），領展（823）之類。而較落後嗰堆好多係中資股，中移動（941），中國銀行（3988）等等。都幾合理。因為個風波係同香港有關，至於大陸股票，的確唔多關事。而5月22日都係恒指跌得多過國企指數。
第二，亦都見到，反彈相當全面。所謂10隻最差表現嘅恒指成份股，只得一隻跌。即係50隻有49隻都係反彈的
美國GDP跌超過50%，美股低位已反彈40%
仲要講多次？股票跌時可以好恐怖，但反彈時更加恐怖。
美股，標普指數，由3月尾嘅低位，已經彈咗近40%。大約2200點，彈到而家3080。你不妨睇返，3月尾時你諗緊乜，講緊乜。我又諗緊乜，講緊乜。
當然，咁叻嘅發咗達啦。話低位撈到嘅，只係呃你。但埃汾的確有之後加倉，亦都贏錢（廢話，嗰時差不多買乜都贏）。當然只係微不足道嘅銀碼，但，至少唔好在低位打靶。亦都唔好唔信股票。唔信港股都信下美股。
但當然更好玩嘅係，美國阿特蘭大聯儲局，估美國第二季GDP，將會下跌50%。你冇睇錯，係一半。但美股升40%。
所以又堅持啲咩「股市脫離實體經濟」嘅，不妨又檢討下。但講句公道話，呢句嘢錯唔晒。問題係，咩叫「實體經濟」先？而家普遍都預期，第三季經濟會強勁反彈，講緊都係幾十巴仙嗰種。咁點解我個股市要反映第二季嘅「實體經濟」，唔係反映第三季嘅「實體經濟」？事實上，你可以話，3月嗰浸大跌市，咪反映咗第二季嘅「實體經濟」！而家我地咪去反映第三季嘅「實體經濟」！
要知道股票永遠炒前景，經濟數據則一定滯後。
當然另外，亦都有人話，其實美股啲估值相當昂貴。事實用好多標準去睇都好似係。炒過籠，不太出期。但近幾年環球市場嘅大方向，都係強者越強，強者越強，追落後一路追唔到，要增長唔要價值。你見港股平足咁多年都係跑輸。呢個又係另一個問題了