國安法，大市估值
沽空比率新高！大戶睇淡後市？
港紙一路都係強勢
拆息居高，一方面市場驚，亦都因為IPO
大家見我呢排Facebook Page 都有 TL;DR（Too Long Didn’t read），呢度都可以學下。整個快嘅summary．雖然其實收費專欄一般都keep住千幾字左右，唔會太長。
今次嘅TL;DR：我樂觀，但港股而家唔見得抵買，等下先，或者買美股。
國安法，大市估值
都話唔講太多政治，但我唔係冇想法或唔敢講，只係唔想過度演繹。但呢排的確係重點。
同上次專欄講差不多，我唔認為會世界末日或乜。但，恒指上星期五（22日）跌1350點後，今個星期（25-29日）基本上係持平。都話一切都睇估值，而家23000水平，考慮到真係仲有各種歐美反制嘅風險，的確完全唔值摶。你話跌到21000或者19000就值得買。而家係平，但只係OK地平，唔係跳樓價地平。肺炎時跌到21100就相當跳樓，但機會維持咗好短時間，況且當時你又係唔敢買啫。正常，我都唔敢馬後炮。但都係成日重覆嗰句：做唔到低位撈唔緊要，好多人都唔得。但至少你可以做到唔好低位沽。低位沽完唔買返，輸嘅錢，其實好多時多過高追。
所以，等下，或者買美股。
沽空比率新高！大戶睇淡後市？
留意下啲標點符號。
是真的，港股今日沽空金額歷史新高，370億。叻啲嘅識睇比例，20.6%，都係新高，至少10年新高，好似高過金融海嘯。
當然媒體會無限放大啦。事實係有其他原因，例如張圖都有寫嘅，MSCI執位。但不能否認，亦都同侵侵有機會宣佈啲唔知乜有關。我當然傾向樂觀，唔覺得佢有咩好大嘅嘢出。但，其他人沽空定，十分合理。況且上一段先講，港股未算好殘。
不過其實睇下，以往啲沽空比率去到咁高，係咪之後就繼續跌？定其實相反？係滯後指標？沽空率高就見底？夾淡倉？
答案，一半一半，但似乎係前者多。
睇埋個恒指圖，大約見到。沽空比率排第二三嘅日子，舊年8月26 日，其實差不多係見底。舊年1月2日，亦都係見底的。但今年3月嗰兩次，沽空之後大市就仲有啲空間。
我就唔認為呢個係好大警號，睇你點演繹。
港紙一路都係強勢
至於堅持話，走資喎，好多人換美金喎，港紙受壓喎。咁唔使講咁多，睇數字。識睇圖？港紙就7.75-7.85，7.75係強方，圖越低就越強。咁你睇個圖，而家港紙7.7528，你話係強定弱？過去半年係咁升咯
至於你話，嘩，下個星期就跌架啦，見7.85啦。當然有可能。但有冇諗過可能直頭好事？真的，你見舊年年尾港紙跌，股市咪升返咯。好多人嘅思維就係「錢走港紙跌港股就跌」，從冇諗過呢樣嘢根本唔係理所當然，亦經唔起實證。
銀行體系結餘呢，就唔cap圖了，你可以上金管局睇。但，近呢兩個月都係升，呢個星期都冇跌。當然你堅持今日唔跌下星期跌，下星期唔跌下個月跌，今年唔跌下年跌，總有跌嘅一日。
但最後講多句：邊個話你知銀行體系結餘跌，股市就實跌？我記得我清楚寫過，結餘升都唔代表股市實升。諗嘢唔好咁直線單方向啦。
拆息
睇埋拆息，一個月嘅先。連跌N日後，你見上星期五（22）號忽然大抽。當然係因為國安法，投資者驚。今星期回落過下，但都在高位。一方面大家仲係有啲驚，亦可能另一方面都同啲新股IPO有關。而家有移卡（9923），之後有京東同網易
所以睇3個月拆息，冇咁受短期IPO影響（唔係冇影響，冇咁大啫）。見到走勢差不多，但冇咁誇。都係上星期五（22號）抽上去，今個星期回返啲，但仲係高位。
你預6月都係錢根會緊啲