李嘉誠又再增持長實
續講國安法，大市
In KS We Trust，again
Amazon Facebook
美國人收入
續講國安法，大市
都係嗰句，一般唔多講政治。唔係我冇諗法，只係我諗法未必係你諗法，而政治嘅嘢似睇波，圍爐最開心。呢個專欄主力亦只係講金融，所以都係以金融為主。關金融事咪講，唔關嘅，未必講。
上星期五急跌，但今個星期一二定返，今日（星期三）都只係跌些少。但即使係樂天派嘅埃汾，都仲覺得係有啲風險，而家呢啲位唔好買住。亦都有講法話係托住個指數，但你見啲物管股呀，個別科技股呀，都跌得幾勁。
於我嚟講，在股市，問題從來唔係國安法。而係外國會唔會反制之類。美國當然話咗會，但未有詳情，正如上次專欄講，人地放假冇耐，亦有其他嘢煩，亦可能內部有分歧，幾日未出聲不等於唔會做啲嘢。
今日你見，不同媒體開始有講。暫時都未知最後會點，但如果只係好似西藏新疆之類，制裁乜乜乜官員乜乜公司，咁就真係股市升返一千點都仲得。認真的。但美國會被視為冇用，所以似乎不能咁軟弱？
要強硬，當然可以好強硬，掟原子彈都得。問題係點評估機會大細。呢個係相當主觀嘅嘢，但總有方法。
我結論好簡單，你計上星期五嗰1350點，今個星期仲要彈返些少，1000點都唔夠嘅跌幅，唔似係反映咗咩好大風險。所以，唔好買住。萬一出完招跌返幾千點，再計數。
不過，你話係咪真係咁悲？又睇返，UBER搬個總部嚟香港，MSCI同香港合作唔同新加坡，係咪外資撤離？公司好擔心？你話呢？
In KS We Trust，again
有趣。先係四大地產商都要出聲表態，大家預咗。你話保護費又好，跪低又好，應酬佢又好，咩都好。
但我地都係睇啲實際嘢，長和（1）競投以色列水廠項目落選。難免令人有啲政治聯想。人地又係咪真係當香港唔係中國？任你點諗。
不過最重要嘅都係，李嘉誠繼續增持長實（1113）。我地呢度都寫過五六次起碼，咁你可以睇下長實升咗幾多。行動最實際，當然你話，對誠哥嚟講係散紙，輸晒幾億都冇影響—冇錯係咁，但，你試下叫佢畀啲散紙你？
Amazon Facebook
見到，Facebook 同 Amazon早前都新高了。無獨有偶，早排九倉（4）賣股票賣到要出公告，亦係呢兩隻。果然識玩，我在Facebook Page 寫咗兩篇。
Amazon你都話正路，疫情有助網購，但你見3月時當然都不能倖免。出完第一季業績，話預告第二季蝕錢，股價即時跌5%。但你有冇飛入去？多數都冇。當然更慘係如果嗰啲位震走咗。結果Amazon年初至今升三成。
Facebook 仲勁，又係話疫情時，人人上多咗—但其實對佢冇幫助喎，你上去又唔係畀錢佢。問題係啲廣告商縮皮嘛，至少咩旅遊酒店嗰啲死晒，咁話廣告收入有壓力，當時又係跌一輪。
但諗下都估到，之後，Facebook自然就可以拎住啲用戶時間去加廣告費。呢個就係短視同睇長線少少嘅分別。
美國人收入
請睇。美國（仲要係有民主下次有得選過個嘅美國）最窮嗰班友，00年科網爆破後，收入係咁跌。咁當然有錢人都跌，但跌得少，彈得快。然後畀你恨到08年嚟多次金融沙士。呢個過程就重覆一次。我在01嚟緊都有篇文會寫，呢個疫情下，超級富豪又再拉闊同你嘅距離。