過去幾日，個市係有啲洗牌跡象，過去一啲升勢好強嘅股票，唔好都由高位掉頭，如跌穿止賺、止蝕位，都要離場。例如好多醫療板塊嘅股，由高位計，都跌得好勁。
有朋友問：「呢啲情況可以點處理？」
以下幾個方法，都會幫到手。
- 如果隻股票有期權，而且開價質素好，買賣差價緊貼，咁我一般都鍾意用「Short Put + 股票」嘅方法去做。股票買有量我會較原本預計減半，然後再喺股價低10%-15%的水平部署Short Put。此做法有兩個好處。一，如股票横行，你仍會有錢賺。二、有時即使股價跌穿止蝕位，但由於Short Put仍能錄得盈利，你亦可能獲得利潤。
- ETF嘅價格，特別喺轉角位，變化會嚟得無咁急，變相你會有多啲時間準備，投資難度都會無咁高。例如，近日假如你係投資喺一啲個別嘅醫療股，係股價回調時，你係要迅速沽貨離場。但一啲醫療板塊ETF，因為風險分散咗，跌幅都會較細。
當然，揀個別定ETF，大家可以自行選擇。如果你嘅著眼點係要有機會賺得多，當然要選個股。但如果你係想要較穩定嘅回報，而又想投資難度較低，ETF會係較好選擇。
再跟進個別ETF情況。
ARKG 入面嘅持股，單獨買啲話，好多嘅波幅都好大，唔容易玩。但以ETF去投資，難度就會減低。就呢隻ETF而言，止蝕位係5月13日低位$41.50，將來如出現較深調整，然後企穩再上，到時會係再買入嘅時機。
另一隻醫療ETF，PTH，短期走勢無疑轉差，但只要股價不跌穿$106.71，就仍可持有。當然，如果隻ETF喺未有跌穿止蝕位嘅情況下，股價喺低位見底回升，咁就甚至會係加注嘅機會。
相對而言，網購ETF IBUY就無乜嘢要顧慮。止蝕位好遠，$51.31，未到可以加注嘅時機。但將來，如佢嘅股價出現調整而上，止蝕位就會更新，到時再update大家策略。
至於CLIX，止蝕位為$63.34，唔跌穿可以繼續持有。
雲端股ETF，值得留意嘅有WCLD，走勢仍然唔錯，唔跌穿止蝕位$30.74可繼續持有。SKYY，走勢都仲係好靚，唔跌穿$62.70，又係繼續持有。
另外，講遠少少，投資港股，唔好再買啲舊經濟股，以及一帶一路股，呢啲其實已經過氣。例如一帶一路，你睇返啲內地基建股嘅走勢，你都應該知乜事。就算你睇返啲官員，一帶一路，已經有一段好長嘅時間，提都完全無提過。另外，恒生指數，除咗騰訊外，其他股其實都已過氣，拖住後腳，亦係令指數唔能夠大升嘅原因。
中概股，未來嘅發展，已睇到係行向互聯網同電子商貿嘅方法，而呢個行業，通常都係，大公司會比較佔優。
畀多隻ETF大家留意。O’Shares Global Internet Giants ETF，集合咗全球唔同嘅互聯網巨企，其中中國公司包括騰訊、阿里巴巴、美團，以及只喺美國上市嘅拼多多，再加其他地方嘅具規模互聯網企業，個持股嘅mix我認為做得幾靚。
買入時機未到，但如果之後隻ETF出現整固而上嘅形態，就可買入。
有問題可電郵至 [email protected] 畀我，星期五再講。