=======附件=======
=======附件=======
先提一提大家，今日係美國嘅Memorial Day，股市休市一日。再講個別值得留意嘅股票。
或者大家都會見到，有一隻叫做Kinsale Capital Group (KNSL)嘅股票，排名愈升愈高，呢隻股票，我認為係其中一隻相當值得大家持有嘅股票。
佢係一間保險公司，但同一般保險公司唔同，佢會專注做excess and surplus line (E&S)，簡單講，就係佢會接一啲一般保險公司唔會承保嘅生意。
而相對於其他「同類」保險公司，佢更係少數完全係只做E&S 生意。但要注意，KNSL 並非一間規模好大嘅保險公司，好處係如果佢嘅生意發展理想，股價會有極大嘅增加空間，作為大家股票持倉中嘅其中一隻潛力股，我覺得絕對適合，然而，佢唔係嗰啲大藍籌股，買嘅時候應留意注碼，以及嚴守止蝕。
另外，想買入RingCentral (RNG)嘅朋友，之前講過，高位距離止蝕太遠，不宜買入，但上週此股稍為回調，如能企穩而上，就可買入，並以近日調整時的低位作止蝕位。如有買入機會，將再在文章中通知大家。
KNSL、RNG 兩隻股票，都屬於極有潛力大升，但投資風險未必太低的股票。但如果大家能夠計好數，冒得起風險，我認為非常值博。
亦有朋友問及較穩陣嘅NextEra (NEE)。
此股嘅中長線走勢，我並唔擔心，但我會希望等佢嘅短期走勢都好轉先買入。其實，如果佢本週嘅股票，可以連續三日企於$236.90以上，我會認為佢嘅股票走勢將會好轉，可作買入。
Wingstop (WING)，股票正在橫行，走勢並不太差，但如果股價回跌至$116.79以下，我會建議先行離場。當然，即使要平倉離倉，將來股票再升，此股都仍然值得再次追入。
而好多Stop% 介乎5%至15%之間，股價處於雲上(Ichimoku = 1)，過去5日、22日、250日回報都屬於正數，過去幾週排名都持續上升嘅股票，我覺得都非常值得我哋留意。
另外，有朋友問Chegg (CHGG)可否買入？我認為可以，止蝕位為$61.00。
Five9 (FIVN)，都係我一隻幾鍾意嘅股票，但我會等股價破頂先買，止蝕位$99.19。
最後，Visa (V) 嘅股價走勢已有好轉，我認為可重新留意。對於呢類股票，可以做先買入半注股票，然後再喺現位低10%水平做Short Put，再一邊收時間值，一邊等低位接貨。好處係，贏面會更高，總之不跌穿止蝕位$173.82，就可以每週不斷更新期權合約，持續收時間值。
如有問題，可電郵至 [email protected] 畀我。星期三，會集中講ETF。