【期權短評】莫家強期權短評 (2017/01/12)

PhotoAlexMok

  【 #期權短評】 呢個方法,係同時買入接近等價既Call、Put。效果係,只要期指向任何一邊方向進發,我地都可以賺錢。   做之前,要睇兩樣嘢。第一,係啲期權夠唔夠平;第二,係仲有幾耐到期。呢個方法唔算難明,大家睇一睇個例子就會明白。   即月行使價23000點,Call要買246點,Put要買209點,總共為455點。呢個就係最大既風險。點先輸到呢個數?   1月尾結算價,如果喺正23000點,兩邊Call、Put都變零,咁就會輸哂。   但係,只要期指向任何一邊走,愈偏離23000點,就會對我地愈有利。例如,期指升至去23500點,張Call最少會值500點,就算張Put輸盡,都有錢賺。同樣,期指跌至去22500點,效果都會一樣。   咁有幾大機會贏?俾個數大家參考嚇。   上個星期,期指高低波幅有762點;前一個星期,波幅有574點;再前一個星期,波幅有530點,再再前一個星期,波幅有960點。   依家距離結算,剛好有兩個星期,只要期間有一嚇大升大跌,就已經可以獲利。   呢個方法,唔係成日都適合做。但當大家真係熟識期權特性既話,就會知道幾時做最值博。  

Read more

【期權短評】莫家強期權短評 (2017/01/11)

PhotoAlexMok

  【 #期權短評】   收到好多朋友既鼓勵,首先多謝大家。放心,我唔單止無事,仲好開心有大家撐。我保證,將來既舊生聚會分享,我一樣會咁比心機做,次次教堅料俾大家。   另一樣我好開心既係,有幾位同學都講,今日睇完個市,明白點解我話要做Short Put。   係,Long Put失利係事實。但今日大家就知道,Long Put要止血,又真係一啲都唔難。因為,Long Put有一個特性,就係睇中方向果陣,delta會一直增加,錢會愈賺愈快。相反,睇錯方向果陣,delta會一直減少,錢會愈輸愈慢。適當做少少對沖,就已經止到血。   只要唔係訓身,啱時機細細注做,Long Put 就算睇錯邊,都唔會好難處理。   不過,Short Call既話,就係另一回事。如果你做咗Short Call,又就黎入價,甚至已經入咗價,依家都會幾麻煩。以23000點Short Call為例,暫時delta係0.45,即係期指每升100點,Short Call就要輸多45點。如果期指再升多200點,delta 就係升至0.59,升100點就要輸多59點,錢會愈輸愈快。   睇睇個期權既價格,你就會明白我意思。Short Call企錯邊,要救倉,難度高好多。   同樣係睇淡,兩種策略既效果同風險都有好大分別。   另外,有朋友問,可唔可以加返Long Call,變做Long Strangle。可以。依家引伸波幅比之前仲低,做Long Call、Long Put都有值博率。聽日詳細講。  

Read more

【期權教室】莫家強期權教室 (2017/01/10)

PhotoAlexMok

呢個時候,正好適合做個總結,睇嚇過去幾日呢個trade既情況。   22400 LP,呢一刻係115點,同我既買入價比較,輸90點左右。用買股票既觀念去睇,以百分比計,輸4成幾當然好似好多。但玩得Long Call、Long Put,我必須講呢啲係極平常既事。所以,我先強調一定要細注玩。注碼控制,係呢個方法最有效既風險管理既策略。   另外一個做法,係大注玩,定止蝕位。但係Long Call、Long Put有一個特性,睇錯市,初段會輸得最多,後段會愈輸愈慢。大家明白delta既變動,就會明白我既意思。   所以,靠止蝕,你唔會避到輸得最甘果一段,未必會輸少咗。但缺點係,假如個市先升後跌,你就會無左賺錢既機會。   有朋友提出時間值既問題,呢一點佢講得好啱。Long Put如果睇中市,你鍾意睇幾長都得,揸到結算都得,時間值唔會係問題。但係方向一錯,時間值既影響就會浮現,所以唔好死坐。   雖然我叫大家要有輸哂既心理準備,但都唔代表我會乜都唔做,由得佢輸哂。   今日做少少低位既Short Put,就可以有效減少時間值損秏既影響,甚至有機會有時間值賺。咁樣會令個策略變得無時限性,就算恆指遲啲先跌都有機會賺到錢。另外一個好處,就係可以保留反敗為勝既機會。   另外,我想講一個比諭,睇開波既朋友應該好容易會明白我想講咩。 無論一隊波幾勁都好,都無可能贏哂所有比賽。但要贏聯賽冠軍,38場比賽,可能贏30場就已經足夠有餘。   我既目標唔係要每鋪都贏,而係要長遠,好穩陣咁贏到合理既回報。 之前提過既做法,暫時結果可能唔係好靚,但係大家試嚇諗嚇,就會明白我點解會咁做。   最後,大家寫俾我既嘢,我都有睇有諗。而且,有一點我都幾自豪,就係我覺得我既投資技巧仲一直進步緊。希望我同大家都可以一齊愈做愈好。  

Read more

【期權短評】莫家強期權短評 (2017/01/10)

PhotoAlexMok

  【 #期權短評】   Long Put既最大缺點,係有時間限制。太遲先跌,可能會因為時間值輸得太多,變咗賺唔到錢。   咁有無方法可以睇跌,但唔使理咁多時限呢?   有。之前有位同學叫Chris,都問過我相同問題。當時,Chris令我覺得佢係一個好叻既人,因為佢係唔單止係問我點做,仲直頭拎埋個方法,問我可唔可以咁做,而個方法仲要係work。   呢個方法好適合依家既市,可以同大家分享一下。   首先,基本慨念,LP 係睇大跌,愈快大跌就愈好。但係,如果之後大家覺得個市跌唔落,呢個就係處理方法。   做法係,1份LP,2份行使價更低既SP。例如,之前做咗1張22400LP,見跌唔落,就可以補兩張21800 SP。唔一定要補得哂所有時間值,只要足夠令LP輸少一截已經可以。   個市幾時跌到咩位最好?風險大唔大?   我暫時講到呢度先,留啲空間俾大家理解。有問題再答。      

Read more

【期權短評】莫家強期權短評 (2017/01/09)

.PhotoAlexMok2

  【 #期權短評】 我教玩Long Call、Long Put,其中一樣同其他人最唔同既地方,就係我會教大家唔好set止蝕。   「唔set止蝕?咁咪好危險?」   耐唔耐都有朋友會有呢個反應。但係大家要知道我點解要咁教。   首先,如果set咗止蝕,今朝期指試過升百幾點,又走唔走先?你一走就輸咗,就算個市跌返落黎,都唔再關你事。咁樣做,一定會令贏錢既機會減低。呢個就係set止蝕既最大缺點。   咁唔set止蝕會唔會好危險?   玩得Long Call、Long Put,我地一定要有心理準備,買得幾多就有機會輸幾多。所以,任何情況下,都唔可以訓身玩。買得細,風險自然低。Long Call、Long Put要玩得安全,又可以賺大錢,竅門係細注高槓桿。聽日再講。   最後,個市點睇?   一日恆指仲係陰燭,我都仲會睇淡。今朝恆指高開上升,有朋友有啲擔心,問我點算?我同佢講,高開唔係問題,最緊要有得低收。每一次高開低收,都會令大市既蟹貨增加,令沽壓更重,更不利後市。況且,個市已經開始轉弱,要升都唔係咁易。   對於今次跌市,我都仲係好有信心,我估今日都仲會係陰燭。希望恆指跌到200點左右,俾我走一走位,咁之後就會更加易做。   如果我估錯,今日有機會出陽燭,收市前我再update大家點做。     03:50PM 少少update。   Long Put倉位,有跌勢既話,坐幾耐都得。但係如果跌勢遲遲未見,就可能要改變策略,唔可以任由時間值一日一日咁輸。   今日,總算係陰燭。以往,兩連陰之後,第三日通常最少都會跌一跌。就睇埋聽日。   如果恆指可以跌200點以上,就一天都光哂。跌唔到,就要做一啲策略調整,減少時間值損失。   睇埋今晚美股表現再算。      

Read more

【期權短評】莫家強期權短評 (2017/01/06)

.PhotoAlexMok2

  【 #期權短評】 Long Put已做,即月行使價22400點,睇嚇今次中唔中喇。   至於幾時買,幾時走,好難喺FB講到。所以,我做咗少少資料,方便大家睇位。   估中4百幾點,回報大約100%;估中2百幾點,回報大約50%;估中接近200點,回報大約30%。大家心裏有數,就容易啲set 止賺價。   我自己鍾意set定價先,因為有時真係跌一跌就反彈,唔set 定就會錯失機會。   當然都要睇風險。依家引伸波幅唔算高,加上期權接近等價,唔使太驚「縮窩」。   主要擔心既因素有兩個。第一,估錯市。蝕幾多,或者想吼高做,大家都可以睇到。LP 既好處係會愈輸愈慢,頭3百點會慘啲,之後就會無咁緊要。總之,計好數先好入市。   第二,輸時間值。一日大慨輸7點。唔想輸咁多時間值,可以做組合。唔怕輸時間值,可以直接LP。分別係,如果個市真係跌,LP會賺得最好。   最後,Long Put多少都要講啲運氣。Good Luck!!!    

Read more

【期權教室│視頻】莫家強一期一會 (2016/01/05)

20161207
Read more

【期權教室】莫家強期權教室 (2016/01/05)

.PhotoAlexMok2

咁夜出post,因為機會可能一開市就出現,聽日先講會太遲:   1) 未上過我堂既朋友,記住,最重要既一點,個策略一定要係「有限風險」。例如,沽期指係無限風險,如果估錯市既話,輸幾多都得,唔好做。相反,有限風險既方法,最多輸五千就五千,一萬就一萬,入市前已經可以預計得到,用呢類既策略,好處係你會容易啲坐得穩,贏面先會高。   2) 點講都好,我地都係逆市睇淡。逆市,就要預左挨價,預左個市仲會升多啲。今次睇跌,我有信心,但你既信心未必夠我咁大。信心唔夠,就會有機會俾人chok 走,就算最後個市真係跌,你都會賺唔到錢。   3) 如果今次真係不幸輸左,我會肉痛,會唔開心幾日,但一定唔會有大礙。我呢兩三個月「估市」真係幾準,不過,唔好因為咁就信哂我,訓身黎做。我上堂教過,Long Call、Long Put 要賺大錢,唔係靠訓身,係靠過關。   4) 我腦海有諗過,好彩既話,我呢次LP賺完錢之後,會可以反手LC揸返上黎。連埋之前睇升既一下,個回報就會好勁。呢啲就係我所講既過關。要賺大錢又安全,以下三樣嘢,缺一不可:細細注開始+方法+運氣。   5) 呢種睇淡,我地係要同大眾做相反。出面愈多人睇好,我地就愈要睇淡。決定左做,就要預左同報紙、雜誌既意見唔同。所以,入市要做好心理準備,計好風險、注碼,一㩒完掣,就唔好再理人地點睇。   6) 最後,策略。最穩陣既方法,係22600點以上,再等陰燭先入市。但我自己都唔會咁等。今日,我已經做左少少LP。聽日如果期指高開多過100點,我會直接博陰燭,所以一開始就可以搵位LP。Take profit方面,有50%利潤,我會先獲利1/3,其餘2/3睇長啲。入市前,check 清楚,買既Put 引伸波幅唔好高過14.5%。   唔好意思,唔覺唔覺,寫到咁長。   埋尾總結,少少我既投資哲學:玩一鋪,唔會有人可以贏硬;玩一千鋪,贏既就肯定會係有實力既人。   大家努力!Good Luck!  

Read more

【期權短評】莫家強期權短評 (2017/01/05)

.PhotoAlexMok2

【 #期權短評】   特別係呢半年,恒生指數成日都出裂口。有裂口,我就識點玩。     今日,恆指已經升穿咗去年12月15日既高位,開始補裂口。第一樣我想講既嘢係,呢啲位,阻力唔會好大。個市要繼續升,難度都唔會好高。所以,我唔會急住開淡倉。     未補裂口之前,大家仲可以博下個市會跌。但依家,我唔建議博。     咁幾時可以博?     補完裂口,升多少少,就可以博。到時,阻力一定會比依家更大。之前我話22600點以上先做,就係咁意思。     不過,當然都要識睇盤,入市既時機先會靚。22600點以上,可以升多幾多,暫時未知。如果個市仲有力上,我會升埋先。到佢無力,就係我入市做淡既時候。     呢一刻,我仲有啲好倉既水尾喺手,補完裂口就會take 埋profit。到真係可以入市造淡既時候,再同大家講。      

Read more

【期權短評】莫家強期權短評 (2017/01/04)

.PhotoAlexMok2

【 #期權短評】 大家有無留意到,呢排啲引伸波幅跌咗好多。引伸波幅跌,對於做Long Call、Long Put兩種策略都非常有利。   我之前講過,我耐唔耐都會check住,究竟做一張Long Call、Long Put,要估中幾多點先賺到100%,或者200%回報。有呢個數,我就會好清楚知道個「值博率」。   個表既第一行,係即月22400 Call依家既情況。期指現價22098點,仲有22日到期,引伸波幅14.2%,價格184點。   先假設引伸波幅不變,7日後要賺100%,期指要升到22591點,距離現價493點。要賺200%,期指要升至22855點,距離現價757點。   如果以200%回報為目標,依家入市,機會係有,但未算好值博。   要更好既機會,一係等引伸波幅再跌,一係等個市回調。昨日我減左貨,如果個市真係回調,我會搵位撈返。   最後提一提,跌市做Long Call,一定要睇住引伸波幅。引伸波幅抽升既話,博反彈就唔好用Long Call。    

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。