【潘家榮】行住防守mode

今日個市又再跌過,純睇由上星期五開始既五個交易日,的確係好差既,但係拉返長啲,睇返呢幾個月既走勢,咪仲係喺個range入面,係咪代表會繼續跌呢,我認為又唔需要睇到件事咁大。不過點都好,既然而家落返去30600好淡分界線之下,呢一刻點都要行住防守mode。 所謂既防守mode,唔係叫你即刻走去清貨,萬一之返30600之上,唔通又即刻買返晒咩。我所講既防守mode,第一,係喺30600之下唔揾野買,咁樣至少萬一要跌,你都唔會不斷増加風險,越買越多野。跟住,手上每一隻股票,都要睇住啲止賺止蝕位,我暫時會用果隻股票5月尾既低位做分水嶺,跌穿就減,唔跌穿就由得坐,咁樣做,如果真係要跌,全部有數得計,風險有限。相反,如果個市之後升返,可能都會有股票走甩左,但係最強、無穿位果啲就仲可以留得住,順勢汰弱留強。 因為啲股之前都好強勢,同呢個位都仲有一段距離,所以今日應該唔會有咩操作住,他日如果有啲咩需要減既,到時先再通知。 咁當然,如果你一直都係揸住啲弱勢股既,今日又跌穿之前啲低位既,我俾你既建議係:「走左佢啦」

Read more

【潘家榮】現時仍在好淡分界線之上

啱啱寫完千字文,晏左先開始寫市評,唔講咁多,直接講操作: 1) 今日指數雖然跌,但留意今個月好淡分界線喺30600,而家仲喺好淡分界線之上 2) 喺好淡分界線之上,就唔駛太過擔心住,失守先至再算 3) 個股新既止賺位喺5月尾附近低位,跌穿就減,唔跌穿就由得佢繼續坐

Read more

【潘家榮】消息毋需分析太多 最重要留意市場走向

政治一日都嫌長,仲記得上年9月既時候,北韓核試、放飛彈,局勢非常緊張,講到差唔多要打,邊會諗到今日特金竟然笑晒口、握住手,呢個畫面真係好值得紀念,如果當日有投資者因為擔心打仗,諗住沽貨避險,當時大約27000,之後就白白錯失往後既升幅,所以我一向都同大家講,消息唔需要分析得太多,最重要係個市場點樣行。 今日,市唔講咁多,反正都係等升穿31544,但係啲股就靚得多,醫藥教育又升返晒上黎,早幾日仲講緊1177睇住12.32,結果喺危急關頭無跌穿,轉個頭又拗腰升返,都算一件開心既事。除此之外,波鞋股繼續破頂,之前派出黎果隻又破頂,上一次講座,有朋友話有跟、買左,不過賺1蚊就走左,我聽完好驚訝,我不嬲都係教大家坐大浪,並唔係追求果少少升幅,所以如果只係買完賺少少就走,真係浪費左我隻股票喇,大家嘗試吓用坐大浪既心態去做。至於點解要坐大浪,升少少就走有咩唔好,請睇返我今朝既Kevin Sir 教室。 今日唯一美中不足係1313配股,尋日仲破晒頂,但係今朝已經失守配股價,正如我開市前所講,應該要走,而咁啱有一隻本地零售股出左1xxxx0,所以我換左過去。不過整體倉位黎講,今日都係一個好日子,所以識揀股真係好重要。 筆者為證監會持牌人,其全權委託帳戶的客戶持有華潤水泥(1313), 中生製藥(1177)

Read more

【潘家榮】等待向上突破

等……寂寞都夜深…. 我仲等緊向上突破架,其實期指現價同31544,唔係真係相差好遠,要升破上去唔係真係咁難,唔駛咁快又睇死佢只係反覆上落。同埋,個股真係唔差,星期五提到,個市果日大跌,啲強勢股仲升,到今日指數彈返少少,佢地又再升多啲,好似華潤水泥(1313)咁,又升超過5%破頂,而波鞋股今日升得唔錯(係個別一隻,而唔係成個sector),市底一啲都唔算差。 仲記得上星期四當指數升得多,好多之前升唔起既指數股升得係威係勢,但係反而之前做得好既強勢股果日做得差啲,我叫大家唔好用一日就定奪啲股係咪轉弱,如果果日有朋友忍唔住,追左落去果啲落後股身上,呢兩日既表現即刻變得麻麻,亦同時走甩左果啲原本好既股票,所以坐大浪真係需要耐性同埋策略。 筆者為證監會持牌人,其全權委託帳戶的客戶持有華潤水泥(1313)

Read more

【潘家榮】市底唔係真係咁差 大家毋需要太過恐慌

有時都幾諷刺,尋日升三百幾點,揸住既醫藥股、教育股就要跌,但係今日跌緊崟百幾點,整體個倉大部份股票竟然仲要升,咁我係咪應該望個市跌,而唔係升呢?咁當然唔係,唔同股票有唔同既節奏,尋日啲股差啲,可能只係抖吓氣,一日未有跌穿位,都未有跡象轉勢,反而今日指數跌咁多,個股又無乜事,證明市底唔係真係咁差,大家又唔需要太過恐慌,況且好淡分界線喺30600,而家仲係喺分界線之上。 尋日講到,只要尋日收高過31475之上,再升穿尋日高位,就係正式向上突破。尋日的確收高過31475,而未來期指只要升穿31544,就正式確認,可惜今日喺呢個重要關頭跌左落黎,未有升穿,而家唯一可以做既就係等。 今日跌落黎,我自己唔太擔心,始終大家太習慣range trade,而家咁樣做,正正可以引吓啲人覺得升到差唔多位就會跌。

Read more

【潘家榮】有信心今次可突破今日高位

正如頭先所講,點樣為之向上突破,就係等期指今日收高31475之上,聽日再升穿今日最高位就係,到時我就會先減果兩三成對沖,一有好股買,就會將果7成倉位再逐步加上去,加到滿倉。對於今次能唔能夠突破,我係有信心既,不過點都好,按返策略做。 個股方面,當指數呢兩日升得靚啲,之前最靚果啲股票反而要跌,1177同埋1317今日表現都麻麻,不過咁,之前升左咁多上黎,啲資金獲利回吐,轉去買啲落後既指數股亦都好正常,但係唔代表佢地已經轉弱,唔同股票有唔同既節奏,我地唔係睇好短線一兩日既表現,而應該睇一個長遠既走勢,如果我地見今日唔係升呢啲就轉過去第二啲股票,跟住呢邊升返你又追返過黎,不斷追逐都未必係一件好事,分分鐘你追果面,果面就唔郁,然之後呢邊郁,最後得不償失,所以我寧願忍耐,見到佢地真係確認轉弱先至會減,1177睇住12.32,跌穿會減一半,1317睇住13.26,跌穿會將新加注果part減晒,再減多少少。 筆者為證監會持牌人,其全權委託帳戶的客戶持有中生製藥(1177)、楓葉教育(1317)

Read more

【潘家榮】好明顯納指係強過港股

今日又再倒數,距離31475只係二百幾點,等左咁耐,希望今次突破到,不過喺指數未突破之前,過去一個月啲股已經升得好靚,最近連騰訊都有買入訊號,所以我對今次能夠向上突破,都頗有信心,只要一正式突破(即係用五月大單邊反手果招),就就會解除果兩三成逆向ETF既對沖,free返啲子彈出黎,當有靚既股票可以買或者加注既時候,可以再加上去,畢竟呢排太多好股票出訊號,就算喺果七成倉入面汰弱留強,都換唔到咁多,當free返啲購買力出黎既時候,一定開心好多。 不過要留意返,當我地仲係等緊指數突破,人地納指已經率先破頂,所以好明顯納指係強過港股,大家未必只係再停留喺望住啲港股,都要放眼世界,揾環球最強既股票,即刻多好多選擇,淨係早幾日寫既AMZN,仲係越升越有,明顯跑贏我地既騰訊。如果大家有興趣,第日會再講多啲。 #STARS投資法其實係咩地方既股票都用到

Read more

【潘家榮】希望今個星期可以正式突破

今日個市越升越有,期指呢一刻升返上31100水平,距離31475只係相差大約400點,希望今個星期可以正式突破,不過要留意,所謂突破,唔係就咁升穿就係,到時先再講。至於個股方面,今日主要係升啲指數股,同埋之前未升既個股,而之前升開果啲強勢股今日反而普通,但係大家千析唔好因為咁,就拿拿臨換馬,走去炒啲落後。要明白,唔同既股份都有唔同既節奏,我地唔可以睇到好短,覺得一日唔升就係弱,而今日升得多就係強,我地應該成個大趨勢去睇。就算之前最強果啲股份今日唔升,但係一日未跌穿任何位,一日都未有轉勢,如果貿貿然見到啲落後股今日升就去追,即係由手上啲好野,換去啲無咁好既野身上,就絕對唔鼓勵,同埋,當你每日都好短線去追逐,A升就追A,B升又追B,到A升又追返A….咁樣攪黎攪去,可能去到最後都係得個吉。 所以,跟返策略去做,平常心。

Read more

【潘家榮】只要騰訊拗返腰上黎就可以買

之前喺節目度講過,只要騰訊(700)拗返腰上黎就可以買,即係而家,止蝕位定喺395蚊,相信好多人會有興趣,但係個問題係有咁多更靚既股票,真係未必需要揀佢,當然當個市升,佢同大市一齊升上去係絕對唔難,但係要佢大幅跑贏大市,似乎有啲難,所以我寧願揸住我地破緊頂既果啲強勢股仲好,況且就算計科技股,美股都有幾隻大野破晒頂,大家睇吓我今次post出黎隻Amazon,係咪靚好多呢?所以呢個世界好多選擇,唔好只係望住一個角落。 黎緊我會幫富昌財經台做個美股節目,大家敬請留意。 P.S. 其實STARS投資法唔係淨係用喺港股架,係咩股都用得

Read more

【潘家榮】投資係一個 life long的過程

當中總會有起有跌,有順境亦都會有逆境。最近大家感受到揸住強勢股,同坊間唔識揀股既比較,表現係可以相差幾咁遠,相信大家對呢一刻既持倉都好滿意。尋日五月結算,睇返個倉原來不知不覺已經升到非常接近上年既最高位。喺呢個非常順境既時候,不期然會諗返早兩三個月,當個市十級難玩既時候,我寫左幾篇關於逆境點樣自處既文章,叫大家唔好亂咁搏,為追數而隔硬追,反而係少做少錯,減低損失,你諗吓有幾多人喺果段時間亂咁搏,結果輸左好多俾人抬出場?如果我地當初喺果段時間唔係忍得手,唔亂做野,又點可以享受到而家既順境? 所以,記住投資係長遠既,我地無可能無時無刻都處於順境,但係只要做到逆境時你懂得避,順起時先出力去攻,識得攻又識得守,喺市場上先可以戰無不勝。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室