【潘家榮】你會唔會成日都沽完就係咁升,一買就係咁跌?

個市就無乜野好講喇,都係咁既樣,彈左一日之後又跌返落黎,千析唔好亂咁搏反彈。 先前喺講座既報名表上面,有一條問題問大家:「在過往的投資股票路上,您最常遇到什麼問題?您期望講座如何幫到您?」,都儲左一啲大家經常遇到既問題,不如開始喺度解答返呢啲問題。 問左咁耐,最多人遇到既其中一個問題,就係佢地經常都係沽完就係咁升,買完就跌,點解會咁?可以點樣改善? 有好多人遇到咁既情況,就會怪自己唔夠運,其實一啲都唔關運氣事,當大家怪左落運氣度,就會將個責任卸左出去,唔關自己事,只係令自己個心安樂啲,但係咁樣完全唔去諗點解,就點都對自己無幫助。其實,當呢個情形一而再,再而三咁不斷發生,就知唔係運氣問題,邊會有咁多次巧合?真真正正係黎自操作本身。 個操作係點?相信佢地而家好難會遇到啲沽完係咁升既股票,反而係買完就係咁跌,而沽左係咁升,應該係上年既時候經常出現,唔駛我講,大家都知點解。 緊係啦,而家個市係咁跌,你要揾係咁升既股票有幾難,反而越跌越多既股票就一大堆,你諗諗如果一路跌一路買貨,咁一定好易買完就跌。相反,上年升得咁好,就算俾你買到啲好股票,但係賺少少就諗住走,不斷逆市估頂,搏調整,咁又邊有咁容易估中個頂?結果走完,就係咁升,亦都好正常。 所以,真正令到大家沽完就係咁升,買完就跌,係因為好多人都鍾意估頂估底,逆市而行,當你不斷同個市對著幹,佢又點會行去你果邊? 要解決呢件事,好簡單,就係由今日開始,要順勢而行,唔好喺個跌市入面係咁買,相反,當隻股票明明升得好地地,就唔好成日見升得多就忍唔住走,要走既,等佢開始調頭轉弱既時候先至走,咁樣呢個問題就會有好明顯既改善喇。    

Read more

【潘家榮】有少少反彈千析唔好太快掉以輕心

尋日穿完底,今日有少少反彈,不過以近期既pattern,跌完彈少少又再跌過,所以大家千析唔好太快掉以輕心。 講真,市況係差,消息面係差,我地可以做既野,主要都係避臉。無論點都好,跟據我地既心法,跌緊落黎點都唔好亂咁接刀,但係我地亦都唔需要睇到非常淡,又睇到跌幾多千點,又或者仲要跌幾耐,唔好唔記得回歸基本,股票都係要睇估值,如果估值超級抵,就算更差既壞消息,個走勢幾衰,你仲係咪預期佢會跌多好多?(留意,我係講緊成個恒生指數,唔係個股,個股有佢自己既原因就算點平都仲係要跌,但係成個指數去計就難啲),咁而家大市情況係點? 跟據恒生指數服務公司尋日既數據,恒指歷史PE而家係10.93,息率有4.06,雖未至於去到最低水平(亞洲金融風暴果時PE最低去過8),但係都已經去到一個開始吸引既水平,咁如果手頭上揸住淡倉既,係咪仲要諗沽到佢天荒地老,希望再大手做淡搏發達呢?咁就真係要小心喇。 當然,我一向都係教大家要順勢而行,而家點都唔好亂咁撈貨,股票穿位都一定要止蝕,就算估值抵,都可以更抵,如果要去到8倍PE,都可以跌死你,所以唔好亂咁接刀住,不過要有心理準備,而家係要等長線睇好既訊號出現,而唔係不斷被消息洗腦睇到個市永不翻身。        

Read more

【潘家榮】降準唔係一件好事

尋日瞓醒晏覺,見到人行降準,社交平台好多人都預期會升,所以即刻拎返幾幅圖出黎俾大家睇,話降準唔係一件好事,拉返長啲時間睇好多時都係會再跌,叫大家唔好太過興奮亂咁衝入市,結果呢個反彈,只係維持左期指啱啱開市頭果幾分鐘,之後就由高位逐級跌落黎,倒跌三百幾點,而家又差唔多跌穿9月12號既低位。 正如之前所講,跌穿底未必係壞事,至少下次出長線訊號可以易出啲,唔駛等升到好高先至發現,不過既然個市仲係跌緊落黎,就唔好亂咁多手揾野買喇。  

Read more

【潘家榮】992 今日破緊頂架

先跟大家說對不起,今天確實比較忙,尋晚寫完2千幾字既回應,今日又要寫稿,又要睇香討,夜晚又有講座,我都係啱啱寫完稿,而家先至寫今日市評。 首先,我真係好想多謝大家,正所謂患難見真情,當我俾人攻擊既時候,你地咁多人出黎撐我,我每一個留言都有睇,其實我已經無再嬲,反而好感動,多謝大家。 講返個市,尋日一下子跌左落黎,而家點都係守,唔係攻揾野買既時候,所以都係繼續睇住已經有既股票,睇住9月24日附近低位,跌穿就減半,其餘就用返原先個位止蝕,至於無跌穿既股票,當然繼續坐啦。如果睇返尋日個post,可能會好易有個感觀又要跌穿位走喇,其實講真,果幾隻入面,我好似最近喺facebook page 只係叫過買992,其餘都無買得果時喺呢度寫出黎,我絕對可以報喜不報憂,但係我份人就係咁,那怕我喺節目度有提過,有人唔理咩情況就跟左,我覺得我都有責任跟進返,所以買果時我無講,但走既時候就一定講。當有人抽稱我尋日個post 既同時,992今日破緊頂架。

Read more

【潘家榮】有兩隻強勢股仲係破緊頂

今日期指結算,唔講咁多喇,反正都係話等過埋今個星期先再作定論。 講真,今日指數跌,但係個股表現其實唔差,至少我地平時講開果啲強勢股係,有兩隻仲係破緊頂,所以繼續坐住先。新既好淡分界線暫時計到係27700,而家都仲喺上面,但唔係好多,希望下個星期都仲可以企得住,而且仲破埋我下星期講果個位,咁就真係完全唔同晒,但係如果轉個頭又落返分界線之下的話,咁就真係無眼睇喇。 好似好耐無開fb live, 唔知聽日唔寫市評,開fb live 好唔好呢?

Read more

【潘家榮】總算無被個市拋開

好彩及時買返啲貨底,而家升左上黎,總算無被個市拋開,所以我地睇市,唔可以純睇指數,要全方位去睇,特別係要留意個股咩情況,喺之前果幾次反彈,要揾強勢股去買係好難,所以指數急彈都唔係幾信得過,但係今次明顯見到好多股已經唔跟跌,而且好快升上去,就已經同之前好唔同,唔敢講一定見底,但至少真實過之前好多。講真,係咪見底呢一刻唔會知,唔會有一個方法係可以100%肯定見底,永遠都係當升左好多之後,事後睇返原來之前已經見左底喇,所以我可以做既摸住石頭過河,逐步試吓盤咁去搏,如果買完繼續升,咪再買多啲囉,但係如果一買就跌,就無謂再加上去。 好在先前揀果啲都算生性,總算有啲賺頭,而家期指去到27900,距離好淡分界線只係相差一百點,如果之後真係企得住喺樓上,會再進一步加多啲股,暫時揸住四成幾倉,到時可以加到去六成,至於隻逆向ETF,未想攪佢住,想過埋9月先,因為到時有機會出長線訊號。  

Read more

【潘家榮】借住呢個機會睇吓個市底如何

今日大市高開回落,又唔需要太過緊張,始終都升左好幾日,回一回都好正常,反而我地可以借住呢個機會,睇吓個市底如何。之前話個別強勢股已經轉晒勢,升晒上高位,似係行緊新升浪,如果真係的話,個市回少少,對佢地影響應該唔大,好好又會繼續升,但係如果個市稍為回少少,果啲股就即刻行人止步,仲要跌返落去,咁就唔駛諗,點都唔好再諗買野住啦,所以而家步步為營,觀察住先啦。  

Read more

【潘家榮】大市有見底feel

本來之前都仲諗個市會唔會唔夠恐慌,驚要整多個急跌先至得,但係睇返早幾日既情形,叫人買貨所承受壓力之大,就知道大眾係傾埋去睇淡一邊,應該隨時見底,而尋日就算貿易戰加碼,絕對有條件再跌,但係個市已經唔肯再穿底,而且恒指一開已經係全日最低位,之後逐步將跌幅收窄,雖然指數都仲要跌三百幾,但係揸住既強勢股反而唔係幾跌,成個倉持平,到今日無任何消息既情況下,睇住啲股不斷出買入訊號,一升就升得好快,好有見底feel。   基本個倉加吓加吓,已經去到五成,比原先諗住既速度仲快,如果尾市仲係喺28450之上既,我會再加多少少貨,去到六成。個股訊號不斷出,而家最大既挑戰係要識得忍手,唔想不斷咁買,咁樣好易買到爆晒。其餘既,等到期指企得穩28800以上,先至再加喇。   P.S. 報左名今晚講座既朋友,今晚見,由於真係好爆,最好早少少到

Read more

【潘家榮】等期指企返28800之上先算

傳媒大肆報導12點01分,美國就會開徵關稅,但係件事果左咁多日,成個市場都預期晒,要做野都唔會等12點先做野,所以放完lunch返到黎,個市都抽升過一浸上去,不過與其見升就追,倒不如忍一忍,等期指真係企得返喺28800之上先算,事實上又唔係相差太遠,唔爭在啦。 而家基本上倉入面只係淨返半注波鞋同埋一注逆向ETF(逆向ETF係之前五月大單邊出signal時買,suppose升穿31544止蝕,但都未升穿,所以仲喺度),股票倉位一成都無,再加埋逆向ETF,實際上係微淡。 講真,去到呢啲水平先至跌穿位既股票,即係尋日既345同埋1317,其實一啲都唔弱,我自己都麻麻地想沽,”仍”住會走錯,但係既然定左策略跌穿位要走,就無理由怕走錯就唔理,萬一真係跌落去點算?策略本身就係防止我地犯下大錯,所以千祈唔好怕蝕底,寧願等轉返好先買返。

Read more

【潘家榮】持倉只係三成

正如尋日所講,個市尾市彈返上黎,反而仲衰,即係個市仲係未夠恐慌,所以我對於尋日尾市既反彈有所保留,結果今日又跌返晒,呢一刻暫時都係唔好估底住,點都等個市真係有恐慌先。而家手頭上連埋尋日買既奶,都只係淨返3隻股票再加一隻逆向ETF,持倉只係三成,暫時無乜野好做,等個股跌穿位先至再減過。 明天節目預告: 13:00 – 14:00 ATV 贏家Online 15:00 – 16:00 ViuTV 智富通 *明天3點鐘市評暫停,我會喺電視同大家跟進市況

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室