鐵飯碗再見

Henry 於1986 年在廣州出生,袓父是醫生,父母經營醫療用品生意,屬於中產家庭,因受家庭背景影響,Henry 自小的夢想就是當醫生。1997 年,他12 歲到香港成為新移民,入學後因為英文科不合格要重讀。如何趕上,不是找英文補習天王惡補,也沒有找傳媒及立法會議員投訴政府的新移民扶助政策及資源不足,更沒有結集一班新移民同學到政府總部穿黑衣靜坐,甚至絕食抗議,要找政府出錢找牛津英語教師特別幫助新移民改善英語。Henry 就是用最古老,但最有效的方法,每天在家聽英語課程的錄音帶,然後跟著朗讀。最終,他以優異成績考進了名校張祝珊紀念中學。   拔尖生的大膽行徑   讀了一年,有位老師力勸Henry 轉校,並非因只顧打機踢波令學業成績差,或是吸毒打架操行出現問題而被勸告離校,竟是因為Henry 的成績「爆燈」,考了全級第一名,老師認為Henry 非「池中物」,除了讀書還應多參與課外活動,令學習及成長更豐富全面。老師認為張祝珊在學業方面絕對可滿足Henry,但課外活動不足。結果,Henry 就轉到皇仁書院繼續學業,校內參加不同的活動如英語話劇、朗誦、辯論等擴闊眼界,會考時更成為8A狀元。   「我沒甚麼特別,因為那年皇仁有9A 狀元。」Henry 說。其後,8A 令Henry成為港大的「拔尖生」,「打尖」取錄為醫科生。   兒子成為狀元並「拔尖」成為「準醫生」,Henry 的父母當然大喜,但Henry卻想出走,思考從醫以外的出路。在港讀完中六預科後,了解到美國長春藤聯盟(Ivy League)中八大名校的Dartmouth College 校風好,喜歡這間學校著重小組教學,跟教授有更多的溝通交流,就不猶豫的去讀。   2008 年在Lehman Brothers 香港辦事處當暑期實習生,並取得畢業後的暫取「聘用書」。Henry 不負父母的期望,以cum laude(拉丁語,北美大學的優等成績,即類似我們認識的first honor,distinction 一級榮譽)畢業。   只怕「窮得只剩下錢」   Henry 畢業時剛遇上金融海嘯, 當時美國財爺Henry Paulson 決定任由Lehman Brothers「自然死亡」,Henry手執Lehman Brothers的暫取「聘用書」也成了廢紙,加上海嘯後美國的經濟奇差,他寄了超過百封求職信也沒有回音。在朋友的邀請下,回到上海當海外升學中介,幫國內學生到外國求學。   半年後,Henry 竟然收到日資證券行野村證券(Nomura Securities)請他上班當分析員(Analyst)。原來, 當年Lehman 拆骨出售時,Nomura 買了Lehman 在亞洲及歐洲的業務,因Henry 曾在Lehman 實習加上表現出色,所以聘請了他。Henry […]

Read more

搵1000萬的五個方法

上次我講了個輸1000萬的故事,有網友反映事件很令人沮喪,希望我寫番篇「如何搵番1000萬」來補數,我從善如流,馬上動筆。   第一個方法,嫁人。最好搵個七、八十歲的富翁或富婆嫁/娶咗俾佢,如果女的職業是護士,男的職業是風水師,有較大機會成功,你睇富豪三太和在赤柱的哨牙通,都係呢種例子,不過成功機會太低,十萬中無一。   第二,戒賭。若然嫁不到娶不到有錢人,一般人的想法就是去賭一舖,以求一朝發達。以賭場為例,你見賭股炒翻天,就知道贏的只是賭場,拉長來計賭客永遠輸錢,因為賭場中各種賭博,賭場都以機會率取勝,賭仔長賭必輸。在股市這個大賭場也是如此,好多人抱賭博心態去炒神仙股去炒衍生工具,好易輸死。要累積財富,就由戒賭開始,即使不能一朝到站,起碼向著正確方向進發。   第三,複式投資。不要少看投資複式增長的效果,有一個叫「七十二律」,即是每年有10%回報,把回報的錢再投入投資,只要7.2年就可以翻一翻。若你今年有100萬,每年有10%回報,23年多一點就有1000萬。如果你今天32歲,已有100萬儲蓄,做到每年有10%回報,真係55歲可有1000萬上岸。你話我32歲無100萬噃,唔好忘記如果你仲做緊嘢,從工作不斷有新錢加入去投資的資金池中,即使起步時得三幾十萬,都有類似效果。關鍵係盡量保住不輸,反而唔使強求高回報。至於投資對象,好多不同的東西都可以,難題是要有相當技巧,才能每一年在不同投資標的中,揀到既穩陣又有10%以上增長的對象。   第四,買樓。好多人唔識揀投資對象,所以在樓價平時買樓,係最容易的投資。2003年沙士後你用100萬俾首期在港島買間330萬的樓,如今隨時值1000萬。買樓有借貸槓桿,是一個較大碼投資,買完樓要供樓,是一個強逼性的儲蓄,若入場時間好,是一般人較易把握的投資,可惜現時香港住宅樓價太貴,難以入場。有些新發展區商舖可能還比較合理,但銀碼較大,加上無經驗者好難揀到好東西。   第五,低買好股。每年股市都有低潮,要避開高峰,在低潮時買股,笨笨地每年在股市低潮時低買好股,不斷累積,收到息又投入去買股。見升得好多時,可以賣一點,但不用清倉,高位減倉,低位加倉,年年如是。在報紙唱到好淡時買股,講到好好時沽貨,累積咁做十零廿年,其實到50幾歲時有1000萬都唔係咁難事。   陸羽仁 source: http://www.bastillepost.com/hongkong/%E9%8C%A2%E8%B2%A1%E4%BA%8B/%E6%90%B51000%E8%90%AC%E7%9A%84%E4%BA%94%E5%80%8B%E6%96%B9%E6%B3%95?r=w

Read more

我們都是老細

在大公司做的朋友跟我說,在office裡面被其直屬上司逼到「生不如死」。我不是當事人,沒有親眼目睹實際情況有幾惡劣,誰是誰非我自然不敢說。然而跟我差不多年紀的人,大都在社會上打滾了一段日子,在辦公室裡總會有一個半個「下屬」、「夥計」…又或者在家裡有個「賓賓」或者「印印」。也許我們並不很留意,但我們這班中年人,實際上,都是有些人在「跟住我哋搵食」的。儘管你未必是個公司老闆,但我們在不同程度上,都是某些人的「老細」。 我聽朋友抱怨被上司壓榨的故事聽得多了。然而當大家做回「老細」的身份時,我們其實又是怎樣對待我們的「夥計」?你希望你的夥計都能「開開心心」地替你工作,還是認為「階級有別」,階級比你低的人,不應該擁有跟你同等水平的快樂?     做善事、做義工之所以會讓人感到快樂,是因為你感受到「別人因你而快樂」的感覺。所以我覺得人性的基本是:「讓別人快樂」的同時也會「令自己快樂」。商業社會裡面,有許多身不由己的矛盾,使作為老細的我們,不能輕鬆地讓同事們「快樂」一點。做老細總有一點難度,但是否有需要因為這一點困難,而作出違反人性的選擇,刻意要下屬過得痛苦,我倒覺得有點匪夷所思。 藏在人心裡面的「階級」觀念,是作為老細的毒藥。你口裡認不認也好,但這種毒藥讓人覺得自己「高人一等」。覺得自己「高」一點的人,認為自己應該得到多一點尊重、多一點奉承,也算了。最大鑊是,這些「高人」認為自己應該得到比人「高」一點的快樂。然而這顆「階級毒藥」最毒的地方是,它不但只讓人變得刻薄,它還讓人變得更蠢。聰明的人得到快樂的方法,除了自強之外,是令身邊的人都一起快樂起來。死蠢的人卻剛剛相反,他們活在互相比較當中,他們以為得到快樂的方法,是看到「人家不及自己快樂」。假如這班死蠢的人的身份是個「老細」,當面對那些他們認為比自己「低」的下屬,自然會做出各樣低能的事,讓你「唔夠佢自己快樂」。結果呢?幫他打工生不如死,他自己也永遠得不到快樂,損人,也不利己。 *****     Weekend既時候,陪一個有錢朋友去睇豪宅。新型既豪宅屋苑,設計美侖美奐,但奈何有件事我諗唔明白:一間有成兩、三千呎既豪宅,點解工人房既設計都可以差成咁?我心裡面既comment係:「嘩,連瞓都瞓唔直個人,又冇通風,係咪人住架?」 地產代理同我講,佢話家陣啲新式豪宅,幾乎都係咁上下。啲人俾得幾千萬買樓,唔鐘意啲錢會駛咗落去啲「下人」既地方果度。 「emmm…」我話:「工人都一樣係人喎,大佬。」 「班老細覺得咁樣先突顯到階級既分別架。」代理無奈地說:「你話呢啲工人房環境差咩?香港地仲有大把人住劏房呀、籠屋呀咁啦,咪一樣唔係人住?」 我點了點頭。香港地,總係有一大堆無奈。 連結:人在中環

Read more

80後贏得人心、創業故事盡在細節(下)

>>>到上回 「你有好的生意頭腦!那你說的網上廣告公司是甚麼經營模式?」我最有興趣的是靠「食腦」的網上廣告公司。   「時代變了,傳統的電視、電台及報紙雜誌廣告收入都在下跌。試想現在一般年輕人甚至成年人,看電視時間多還是上網時間多?所以連TVB 的廣告收入每年都在下跌。   「我們的公司是幫助客戶在網上賣廣告,包括在Facebook 做fans page 設計,然後用方法吸引人流;在網上討論區做打手,評論產品, 引起話題;亦會聯絡各大網站,安排客戶廣告出現在網站上。而傳統廣告的成本極高,比如要在電視賣廣告,得先向廣告公司買橋,再找製作公司、演員拍攝,找明星拍攝更是花費不菲,最後買air time 的費用更加驚人,沒有幾百萬無法成事。」   我點頭贊同,因為我也有這方面的經驗。   「網上平台的特點是對製作的要求不高,最重要是條橋夠爆、夠特別、夠出位,能夠引起話題,最好可以瘋傳。所以收費便宜得多,幾十萬已有交易,但效益高,所以愈來愈多品牌接受。」John 繼續說: 「但員工創意和投入很重要,所以我們的員工全是80 後。」   John 說大部分80 後對工作的期望是:「最緊要開心!」,甚至視工作的滿足感比工資更重要,「要好好管理80 後,要信任他們的創意,因此,我會放權讓員工做決定,即使他們『撞板』, 會自動修正,如是者,他們慢慢就會變得獨立。」John 的理念, 不是跟施永青「無為而治」的管理思維有同工異曲之妙嗎?   另外,John 指公司文化亦講求民主,當他作重大決策時,會先諮詢員工意見。例如之前搬辦公室的選址,也詢問過員工,才作最後決定。80 後員工很講求work and life balance,故為員工提供康樂活動及設施,也是先由員工提議,才購買電子遊戲機及飛鏢靶等,讓他們在工餘時間輕鬆一下、減減壓。   Stay hungry, stay foolish 就憑John 的那一套環環相扣的管理藝術,我已深信此子絕非池中物。John 最難得的是,他從未停止過腳步,當他做手機拆家賺到第一桶金之後,沒有停下來只滿足於做手機拆家,而是轉行做凍肉貿易生意;當凍肉生意取得了成績,他又看到了網絡發展帶來的商機;當他和合作夥伴把自己創辦的網絡廣告公司做到全港最大時,又開始打老人院的主意。   每次轉行,他都做好了充足的準備,從不打無準備的仗。從03 年大學畢業至今不過8 年時間,憑著一股年輕人的衝勁,John 已經幹了可能是別人一輩子也幹不到的事。115   許多年輕人對現在的香港感到失望,說已沒有向上流的希望。無可否認香港社會結構穩定,又有地產霸權、制度不公、貧富懸殊等一大堆問題,令沒有靠山的年輕人感到無力。像李首富那樣的奇蹟雖然不大有可能再出現,但從John 的故事可以看到,只要心中有火,勇於嘗試,機會仍然有,只是你有沒有去挖掘,夠不夠創意和膽識去實現自己的想法。   John 現在有8 個小型單位收租,也有7 […]

Read more

80後贏得人心、創業故事盡在細節(上)

出版《上流力》後,我不時舉辦讀者交流會,John 就是第一批報名參加的人。   他在電郵這樣自我介紹:「我是阿John,今年29 歲,2003 年嶺南大學畢業後,就出來創業,很想跟你交流一下。為甚麼想和你見面? 第一,我覺得和你有點相似,都不是來自甚麼名牌大學,也不是含著金鑰匙出世都是靠自己拼搏力爭上游。讀你的書,很有共鳴。第二, 我正經營一家貿易公司和一家食品公司,另外,還跟一班夥伴營運網上廣告公司,要管理近60 位80 後員工,希望向你請教一下,回去跟他們分享。」   贏得人心 盡在細節 那次讀者飯局在又一城,除了John,還有另外6 位讀者。John 身穿有點發黃的白色Polo 衫,下身配已脫色的鬆身藍色牛仔褲,國字臉,外形不算突出,但臉上總帶著微笑。John 提到他創辦的網上廣告公司,現已算是全港最大的同類公司。席間,John 突然起身說對不起, 要走開一會。10 分鐘後,John 回來了,手裏多了2 個膠袋,原來他將Page One 的所有《上流力》存貨買下來,準備回去送給他的80 後員工。   我隨即向John 的支持表示感謝,心想:「好厲害,懂得收買人心!」那晚因要顧及幾位讀者,我跟John 只能淺談,但已覺得他是想法獨特的聰明人。   過了兩星期,John 再打電話來約我吃飯。我對這個主動又有趣的80 後甚有好感,就約了在就近的茶餐廳吃個下午茶。那天,John 仍是Polo 加牛仔褲,手裏拿著一份報紙,臉上掛著陽光的笑容。 我坐下叫了凍檸茶少甜後,問John 有甚麼想談談。   John 也很直接:「一是找個機會與你詳談,二是問你有無興趣合作投資生意。」   我倒欣賞他的單刀直入:「先說說你的想法。」John 說:「有沒有考慮過投資老人院?這是一盤穩賺不賠的生意。政府每年會撥款給老人院買位,是社會福利的一部分,收入有保障,支出卻有數可計。」   我笑著回應:「嘩,你數口都好精!我有正職在身,難以抽身參與管理,沒多大興趣,不如轉話題,我很有興趣知道你的創業經過。」     小本創業 由認識大莊家開始 「我的第一盤生意是在先達當手提電話拆家。」John 笑著說。   我發出一連串的疑問:「手提電話拆家?如何賺錢?賣手機還用給中間人賺一筆?哪來的資本?向家人借?」   […]

Read more

一個炒股佬的告白

投機者做唔成,都要做投資者 正正經經,講下點解要投資/炒股,內容會非常現實殘酷,有需要的話請家長陪同收看。   1.小弟於03沙士時期畢業,其時搵工之慘況歷歷在目,面試的機會如細沙渺茫,有offer更如中六合彩,與幾年後極之好景既今天,簡直係天與地。人力市場之變幻莫測,非一小小打工仔所能力敵。 投資優質公司的股票,則可以做其老板(股東),坐享其成。   2.打工極講求際遇,無論你係公司入面表現如何出色如何覆雨翻雲,遇著個老董咁既on9老細,同你講心唔講金,你都吹佢唔漲,只有走投一途。 而股票所帶來的股息收入,風雨不改,按時按候存入你戶口。好公司如hsbc更加會穩定提高派息比率,即係每年加人工。   3.最重要的一點,全球化正將全世界的人力市場連繫起來,而所有職位的待遇將會越來越兩極化。 小弟曾於一美資公司捱騾仔,亞洲辦事處內有齊美國人、歐洲人、澳洲人、中國的海歸派、ABC、印度人、土炮港燦(本人)。 香港分部中,不幸的是,連果位office assistant阿姐,都係移民加拿大再回流的富婆,小弟基本上係唯一一件100%土炮。而小弟較諸內地精英的優勢,相信只係因為渣住本特區護照同擁有《基本法》付予我的出境自由而矣。 一間公司內,核心及不可被取代的職位,如sales manager、purchasing等講求人際網絡的,會得到非凡待遇,但同時每天工作16小時,長年無休,只會俾公司渣乾,早熟早殘。 非核心及可輕易被取代的職位,如跟單秘書IT等,將會競爭著越來越少的職位空缺。當你可以用三四千蚊係深圳請到一個普通話為母語,並懂基本英文的跟單,襟做襟砌,你還會在香港用萬幾兩萬招聘人才? 小弟膽敢預言,本港其一最大支柱的物流業,將會走下坡,十年內會被深圳兼併。 而另一支柱的貿易採賺,則十年後會衰落,唯因中國幾十年內都唔會有出入境自由,肯通山跑的後生仔女仲會有一定空間。 買入優質公司的股票,正正係令自己係全球化大氣候下,立於不敗之地。   4.比較不受全球化影響的職位,如公務員,小弟則無能力高中。有幸入選的,為你得到一張長期飯票而高興。   5.無窮進修之困局,職業的高度專業化,令港人無止境的讀書考試拎証書以保競爭力。以讀一個mba計,基本消費廿萬,讀完後當加你人工五千,都要三年幾先收得番,仲未計你收入多左所交多左既稅。   6.稅:香港為一低稅天堂,然而福利主義的抬頭,加上十年八年後全民直選所產生的民粹政權,將會令香江陷入惡性循環萬劫不復之地,唔想白交稅為他人作嫁衣棠,唯一方法係減少收入,做低收入人仕,加入民粹大家庭。 所謂的稅基狹窄,根本乃BS,香港的高地價,差餉,物業稅,油稅,煙酒稅,根本老早就在全民徵稅。你係茶記食廿五蚊的叉雞飯,起碼有10蚊係去左鋪租度。 而暫時黎講,係香港收股息係唔洗交稅的。   7.創業空間減少。香港的高租金同各行業超激烈的惡鬥,將很難再容納個體戶,君不見壹仔每期的生意經,做到極之出色的,盈利都只介乎兩至三萬左右。然一將功成萬骨枯,一個創業成功的故事,背後有太多pk血的教訓。 打咁大段野,唔係想叫大家唔返工剩係炒股為生,相反小弟本人極之投入工作以保飯碗。只想指出,單單依靠打工收入,想達到較為理想的生活,將為越黎越難。 我們可以做的,乃順勢而為,既然全球生意行將被大公司壟斷,何不買入該等公司的股票,一齊坐地分肥。 投資者,吾之大事,貧富之地,存亡之道,不可不察也。   P.S. 此文成於 2007 年 BY 笨發 實地睇樓(3):荃灣樓賣元朗價梗有D野既 (4) 實地睇樓(22):將軍澳樓價高企原因 (4) 實地睇樓(16):港島東寓言:小西灣線不能說的秘密 (4)

Read more

壓人價,和俾人壓價

早陣子寫過一篇有關CV既文章,提到有關expected salary一欄加上「Negotiable」字眼呢個問題,多少有啲估唔到,大家會有咁多唔同既反應的。 我既諗法,其實好簡單的。我覺得響CV加上Negotiable一個字,並唔會為求職者帶來好處。有朋友話我篇文章寫得刻薄討厭,okok,有得罪的話,多多包涵,也請原諒我吧。但小弟正正係香港地眾多既仆街刻薄老闆之一,我對CV上呢個字眼既睇法,係咪都應該有丁點兒參考價值呢? ***** 好多人都有見工後俾人壓價既經驗。我心入面有兩個sample scenario,大家都不妨代入我呢亭賤精僱主既思維諗一諗: Case#1 我有一份工要請人。坦白講,每個僱主對自己既每個職位,心目中其實早有個價錢…或者至低限度會有個價錢既range。比方說,呢份工,僱主心目中既價錢係萬五蚊。求職者A,開價萬七,求職者B,同樣開價萬七但寫明(negotiable),撇除expected salary既不同,兩個既履歷背景同樣適合,大家是否會覺得,求職者B會比求職者A,更有機會獲得interview? 擺在眼前既case係,A同B都同樣開出一個稍稍偏離僱主心目中價錢既叫價,但係表面上,B因為主動表明,17K既叫價,其實係有價講的。所以一般都相信,僱主會傾向搵B而唔搵A來interview。 但實情係咪真係咁?我當然唔能夠代表所有僱主,但對我黎講,A同B能獲得interview既機會,其實冇分別的。只要你既開價,唔係嚴重地偏離僱主心目中既價錢,條件適合的話,其實僱主一樣會叫你黎interview的。我好同意有位朋友既留言所講:「即使你份CV冇寫”negotiable”,僱主都一樣會expect你個價,其實係可以negotiate的。」多寫一句negotiable upon request響你既expected salary後面,我睇唔到會為你帶來任何額外既面試機會。好多人將negotiable字句寫落CV上,期望並相信佢會為你保住一啲跟你叫價有marginal difference既面試機會…老實講,我絕對唔相信的。 我反而覺得,認為一句negotiable能為你帶來多點interview既機會,其實係自欺欺人。     Case#2 好多人都話,僱主都係必定會壓價的。換句話說,當僱主認定可以聘請你之後,不論你既叫價如何,佢都必定會向你壓幾口價的。然而僱主認為你係「可以請」,其實就證明咗你所提供既expected salary,已經落入咗僱主可以接受既range裡面。一份寫明人工negotiable既CV,跟一份明碼實價既CV,作為一個賤精僱主,你會壓邊份壓得盡一啲? 有關薪酬既議價,其實係一次談判。你或者會話,僱主既一方,有壓到勝既先天優勢,可以放肆地去壓求職者既價。我承認僱主響議價既談判當中,優勢係比較多的。但假如你認同,呢個「薪酬議價」既情景係一個「談判」的話,我既忠告係,要懂得保護自己,唔好俾我地呢亭仆街老細惡晒。事實上,僱主既優勢,往往並唔係想像中咁強。我揀人時其實人也揀我。談判既「勝負」,好大程度上係講「姿態」的。你當然冇需要張牙舞爪一副想殺人咁款,但至低限度,唔好一開波就示弱認輸。 工都未見,就表明人工係Negotiable。我就以一個黑心老闆既眼光去睇,呢個絕對係一個心虛同示弱既訊息。即使求職既呢個人最終條件fit晒,作為僱主既我,個心其實好想請你返嚟,但眼見你透過CV所給予我既果個「示弱」訊息,我陣間仲唔壓你價壓鑊甘既? *****     有朋友話,僱主請人,自己都唔肯開實價啦,但係就要求職者自己開價,咁既setup,係一個唔公平唔對等既談判。求職者驚自己開錯價,嚇怕僱主,於是只能加個「negotiable」字眼去補一補底。有關「一句negotiable並無補底作用」既睇法,剛才已經講過,唔重複了。至於朋友所講,僱主自己唔開價,等於製造不對等談判,老實講,我認同的。呢個做法,正正係僱主響議價過程當中,慣於行駛既談判技倆。 至於呢種做法,岩唔岩呢?商業社會,每個人既出發點都從自己利益去諗,你當然可以鬧佢地仆街,但呢個卻係一眾求職者要面對既現實。that’s why我話,要識得保護自己,唔好響「談判」過程裡面未打先輸。 我有時搞唔明,點解簡單既一個「請人」過程,要搞到複雜無比。僱主響面對公眾既求職廣告之上,唔敢明碼實價開價,其中一個最大既理由,係唔想「行家」知道你實際開價,從而影響你既招聘,這點我覺得可以理解的。但係我遇過唔少情況,當我嘗試找agent響唔公開既情況底下幫我請人,我同agent講,as long as你唔好將我地啲confidential information漏俾行家知,你就索性明碼實價咁讓candidates知道我地個position既開價如何。岩價既,咪約interview囉。有時我都搞唔清,到底係我講得唔清楚,定係agent自把自為,當candidate黎interview既時候,好多時都好似對我地個post既開價唔清唔楚咁。 公司請人,係要你情我願先會有好結果的。你開個價我覺得太貴既話,即使有句「negotiable」字句,我都情願唔IN你好過,免得到時我又想請你,但又要壓你價。我打工果陣,都俾人壓過價,這種壓價經驗,打工仔會記一世的。一個員工帶住呢個被壓價既「仇恨」每日替你工作,佢同你既呢一場賓主關係,註定唔會有好結果的。 我以前寫CV,就係嘗試寫過呢句negotiable既字眼響expected salary之後。係咪一個直接既因果關係我唔敢講,但我果次又真係俾人壓價壓到趴街。 你或許會問,咁點解當日我仲要加句negotiable響自己份CV果度呢?     well,實不相瞞,理由有兩個: 第一,係因為見到好多人都咁寫,我果份CV,都係左抄一句右抄一句而寫成的。當年唔記得聽邊個「師兄」話,加句negotiable有著數,於是佢加,我又加囉。 第二,都真係有一點搏大霧心態的。年輕既我,都真係天真到,以為加咗個negotiable字,就可以將事情起死回生,明明係out of budget既工,都可能可以搏到個interview機會返黎。結果,梗係得個桔啦。 說來有點唔好意思…我,其實係過來人。 BY CK-人在中環 Click here to add CK on your Facebook

Read more

假如入不了名校

對於要囝囝囡囡入名校,我的態度一直以來都是一樣:入到就入啦,入唔到又唔見得係世界末日。我當然又未至於清高到,覺得要刻意避開一眾世俗名校,但如果為入名校而要孩子及其家人有過多的犧牲,我就寧願唔入了。這個想法,有些朋友覺得我是在「扮嘢」的。他們也向我「提供」了一些「為何一定要入名校」的理由。其中一個,是這樣的:   「苦主A」是個so call中產,朋友說,他的經濟環境跟我差不多吧。苦主A的朋友圈自然也是中產為主的。苦主A的兒子跟這個「中產朋友圈」的孩子們,自幼稚園起一起玩。這群孩子逐漸長大,大部分孩子們也入讀香港一些具名氣小學。唯獨是苦主A的兒子入讀一間相對無甚名氣的學校。(朋友還刻意加重語氣說:「阿苦主A咪就係同你嘅諗法一樣囉,懶清高咁話名校入到就入……」)   起初大家不覺得甚麼,但這群孩子讀了幾年,也聽得愈來愈多那些功利的成年人對他們所讀的學校評頭品足。苦主A的兒子慢慢清楚自己的學校沒有這班朋友仔所就讀的出名,於是逐漸自卑起來。見到一眾Auntie Uncle,好像抬不起頭似的,特別是當這些Auntie Uncle討論他們的孩子們在那些名校的生活時,苦主A的兒子更覺不是味兒。這種自卑的心態,聽說也影響這個孩子的性格,變得愈來愈不肯社交云云。   朋友給我說了這個故事,是想提醒我,「入唔到名校」會影響孩子自信心。 OK,我明白了,但我還是一定會教孩子:「你自己嘅價值,並唔係由你間學校賦予俾你的。」而這個故事給我最大的教訓,其實是「做人父母,揀朋友真係要小心。」 CK – 人在中環 Click here to add CK on your facebook

Read more

誰不想做實事?

寫專欄既日子裡面,收過許多讀者來信,都有類似以下既內容: 「我唔明,我只係想簡單做好件事,點解會有咁多人響度搞事阻住晒?」 「政治」無處不在,辦公室裡面,特別多。 初出社會既年輕人,大部份都唔習慣有太多心計,太多計算的。佢地好多時都會以為,只要認認真真做好份工,前途就會一片光明。回想初出道既自己,何嘗唔係咁諗?   年輕人後來響工作上,遇上一件又一件既麻煩事。佢心諗:「專心啲,做實事吧。好好地解決面前既問題,認真地處理好件事吧。」有問題,認真解決;看似理所當然。但唔知點解,年輕人發現,響自己嘗試解決問題既過程當中,總係枝節橫生,又有不同既人百般阻撓。年輕人開始懷疑,到底係咪有人唔想你成功解決問題? 年輕人唔明白,佢只係想真心做實事,點解結果會變成咁?本來對工作充滿熱誠既年輕人,感到非常沮喪,亦對佢就職既機構徹底失望。佢認為佢既經歷,大概係一次遇人不淑既個別事件,於是年輕人決定轉工,期望佢下一個服務既機構,情況唔會好似現在般惡劣。 年輕人能力優秀,好快就搵到新既工作。剛上班既時候,年輕人既新上司同佢講:「後生仔,我係個做實事既人,唔鍾意搞啲無謂既小動作,更唔鍾意同事搞辦公室政治。你俾心機吧,只要認認真真做實事,你響呢道自然前途無限。」   年輕人聽完之後,心裡面既鬥志又再一次被燃點起來。佢心諗,自己終於搵到一個可以發揮既環境,可以專心做實事了。上司既一番話,讓年輕人對未來產生無限憧憬。 新上班既蜜月期好快就過去。年輕人再次響工作上遇上困難。一如過往,年輕人捲起衫袖,打算務實認真地處理眼前問題。殊不知,同樣既困局再次出現。解決問題既過程中,總係有同事百般阻撓,責任誰屬永遠推來推去。還不止,那個講明要做實事既上司,還將犯錯既責任強加在年輕人身上。年輕人本來只想為公司解決問題,轉眼間變成要為自己的飯碗,作出自衛。處理事情的重心,由「解決問題」,變成「追究責任」。 年輕人終於明白,從前自己是多麼天真。做實事?咪講笑了。 這些故事,對你來說是否熟口熟面?   讀者朋友跟我講故事,問我為甚麼呢個商業社會係咁既樣子。佢只係個想「做好份工」既人,點解咁卑微既要求,都冇辦法得到實現。 我既答案,都係果句:商業社會裡面,辦公室政治,無處不在。你想搵一個地方,冇呢啲politics既element,可以讓你呢個「只想做實事」既人去發揮,其實係天方夜譚。你當然可以繼續追逐你心目中既空中樓閣,但你要有不斷失望既準備。 與其感懷身世,倒不如思考一下,響有政治元素影響既工作環境底下,如何可以生存,甚至穩步前行。環境永遠唔會遷就你,只有你去適應佢。 還有一個小忠告:唔好再將「我只想做實事」掛響口邊,更加唔好讓呢個美好既想法,不問情由地植入自己既意識之中。就算你係真心想做實事,都唔好太著跡地表現出來。有心人睇中你「只想做實事」既心態之後,往往可以響你身上,搵到唔少著數,卑鄙既甚至可以玩到你一棟都冇。商業社會,緊記好好保護自己。 祝大家有個愉快既週末。

Read more

搵幾多萬先夠洗?

早陣子,有篇好多人share既文章,提到月入七萬既中產家庭,其實冇乜錢剩。今日,又讀到另一篇文章,提及另一個月入五萬既「中產基層」家庭,生活費高到份糧要月月清。 兩篇文章既內容,其實都好簡單。兩個家庭所列出既「開支」breakdown,其實亦都幾寫實,唔見得有太多誇張既地方。事實上,我其實都相信,「冇乜錢剩」同「月月清」,的確係好多香港中產既真實寫照。   文章既留言,其實比文章既內容更加好睇。讀者既睇法簡單分為兩類:1)認為香港地生活真係好艱難,搵到咁多都要生活成咁,社會有好大問題;2)覺得係文章裡面既主角個人既問題,夾硬要過並非自己所屬真正階層既生活,先至會搞成咁。如果佢地搵咁多都話唔夠洗,搵一萬兩萬既人係咪個個要跳樓? 我諗,(1)同(2)其實都各有一點吧。 莫講話五萬、七萬,搵錢更多但同樣「冇錢剩」既朋友,我都認識好幾個。但到底呢個係「社會問題」,抑或係「個人問題」?   人類係一種好受外界影響既生物。你搵「點樣嘅錢」,就有人會明示暗示話你知,你應該過「點樣嘅生活」。呢樣係一種彌漫響中產圈子裡面既氣氛,而呢種氣氛,卻影響住好多人對生活方式既選擇,與及大大小小各樣既消費決定。你身處這個圈子,那種氣氛所「顯示」出來既消費準則,往往就變成大家所以為既「理性決定」。但實情係,這些理所當然既「理性決定」其實並不理性,佢只係你所屬圈子、階層裡面既一些流行的消費習慣和生活態度。這些態度同習慣啱唔啱你?其實肯肯定係因人而異的。但身處圈內既人,受住這種強烈既氣氛所影響,有幾多人真係可以清醒過來,真正理性地去權衡自己所需?都仲未計,當你既選擇偏離了圈子裡面大部份人的想法,所需承受既心理壓力。好多時候,清醒代表著離群,話人唔識諗就梗係容易,但當身處局內,要做既話,心理關口其實唔易過。     然而呢啲所謂中產圈子既「氣氛」同「生活態度」,係基於乜嘢準則去形成呢?我其實有點深刻既體會。月入五萬係中產,七萬又係中產,查實月入三、四十萬,嚴格嚟講都係中產。自從財爺那句「我都係中產」之後,中產既range,實在係闊得厲害。問心講,我一直覺得財爺冇講錯的,佢月入三十幾萬,唔通叫佢做富豪?當然係未夠班啦。但一個月入三十萬既中產,同一個月入五萬既中產,消費力其實係有好大差距。我細個果陣時,一個月入五萬同一個月入三十萬既人,應該會係屬於完全唔同背景,完全唔同階層既兩個人。佢地兩個,可能一個係港大畢業,另一個只係讀到初中都唔定。佢地屬於「同一個朋友圈子」既機會,其實並唔高。但今時今日,社會既結構有變,響讀書多少同搵錢多少再扯唔上咩直接關係既世代裡面,搵三萬同搵三十萬既人,分分鐘係一同長大,學歷一模一樣既同學仔。以前係精英有精英玩,普通人有普通人玩既年代,精英既生活標準唔會影響到普通人;但今日,搵錢多既所謂精英,同搵錢唔係特別多既中產,社交圈子可能都係同一個既情況底下,中產在生活態度上所受到既「感染」,自然也跟從前不一樣。 我唔知道,呢個算唔算係社會問題,但在人群之中要保持清醒理性,誠實地接受自己真正身處既階層同境況,從來都不是件容易的事。   ———————————— CK : 我係一隻又笨又固執既豺狼 AM730 專欄作家 Click here to add CK on your facebook

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室