上文講到將自住A賣走賺錢，將B套現，買入C，條數咁計: A賣走後可套190萬，換樓可向公司借130萬,1.7%，分10年還，假設佢買間4.5mil既樓，佢問公司借完1.3mil再將獲利1.9mil放入去，再要問二按借1.3mil。其實煩惱人冇講明佢係現公司優惠係咪借盡1.3mil，攤盡10年。如可借多D根本唔駛二按，如可攤長到廿年或更長呢筆錢先可「借得更抵」。十年銀紙勉強縮水三至四成，更長更正!
有讀者問過一按同二按係咩? 其實係貸款人對於抵押品於legal charge上的排序。如借貸人拖欠，一按可先收回抵押品變現之現款而二按排位較次。所以二按一般較高息，除非你問香港按揭證券公司提供既二按，但又要比幾至十幾萬保費。因保費金額不細，銀行會借埋保費比你。
講返個案，如煩惱人公司只肯借1.3mil，佢淨低既差額要搵人做二按，利息洗費唔輕，所以加按B樓套現係好方法。請將B單位說成自住及請有關租客合作，否則只可加按到五成，即只可套4.0mil*50%-1.24mil=0.76mil。假設佢真係套到1.5mil，佢就可以換大間些少既屋啦: 1.5mil+1.90mil+1.3mil = 4.70mil。建議先套現才決定買入新樓。
請留意，B樓套現出黎舊錢唔會再用H+0.5%計息，要用約2厘年息計付。攬掂哂之後，煩惱人先係高位沽樓，再趁B樓升左套現，佢換樓真正要比既錢係問公司借既1.30mil。煩惱人建議既三或四點，都不會是好方法。唔領取津貼真係對唔住自己，而用手頭現金買多個單位收租雖可加快為自己拓展更多被動收入，但有能力既煩惱人倒不如儲足子彈，係淡市用三百萬買更好既樓房。
至於是否換樓時機，現在對於家庭收入低於五萬既人應該唔係，因現時樓價佢地頂盡只可負擔兩間小房子。萬一跌市而手上資金冇番萬幾二百萬都唔知點算。皆因錢唔可以快儲到，樓市跌兩成對於過份loan貨既人可以嚇到冇覺好訓。九七後有不少市民都係因此破產。
買亦都要睇地區，總括而家有幾個概念係未完全發酵既: 九龍東商質化概念，而在九龍地域、觀塘道以南既可住人地方十分少(唔計堆填city )。荃灣變為沙田化既概念，眾所周知荃灣係第一個衛星城市，但樓價比沙田平均低三成，究竟老大哥比沙田(小兄弟)感化既概念係點解呢? 要再談，何況沙田梗係唔係小兄弟啦!最尾係新界西新紮機遇，以香港人口流向新界西應可成功產出多一個有規模既城市，究竟古洞錦上路定係成功將元朗一拆三呢? 抑或政府想力谷既屯門西(即蝴蝶灣一帶)?? 屯門已經西，恐怕有新鎮都叫「屯門西西」了! 有點可以肯定既係佢地可以跑贏大市。