【潘家榮】見到唔少股有個大反彈

今個月個市一開波既表現,暫時同上個月調返轉,上個月第一日一開就急跌失守好淡分界線,之後未升過上去,而今個月一開就衝左上黎。

今日一升就升左幾百點上黎,唔需要太過緊張,亦唔需要太過興奮,尋日自從上得返24900既好淡分界線之後,已經講左唔好再做淡,連坐左幾個月既逆向ETF都走埋,基本上只係淨返向好既股票,今日咁樣急升,亦都唔會有咩心理壓力。當然,個市一口氣升咁多,亦都見到唔少股有個大反彈,好多朋友都想參與喺其中,可能會覺得無買到蝕底左,好想去追,我勸大家唔駛太過心急,唔好因為市況既急升急跌而影響情緒,再亂做投資決定,反而應該按返自己既步伐。

呢幾日我有買貨,倉位而家去到大約三成,正如呢度一向都唔係俾冧把派貼士既地方,因為依賴我俾貼士你係無意思,你自己學到投資應有既心態、同埋點樣揀股等等,先至係真正幫到你,所以我就唔會講晒買左啲乜,但都可以分享其中一隻係135,因為之前10月頭跟進過減過一半,但係之後一直都無再跌穿第二個位,而家又拗返上黎,仲要破頂,所以買返之前走左果半注,全部用8.5作為止蝕位,距離現價唔夠9%。

現時3成倉差唔多,千析唔好貪勝不知輸,無人可以guarantee個市一定見底,呢啲往往事後先知,所以要預定萬一落返去會點。而家先3成倉,之後個市再升,啲股又有得賺,有buffer喺手,先再逐步加上去,我地睇大浪既,幾百點算得上係啲咩,最緊要係坐得舒服,唔好咁易擔驚受怕。

另外我想講,可能有啲朋友之前揸住貨,跌落黎一路唔捨得止蝕,但係見而家彈就即刻好想走,我亦都勸呢班朋友唔好太過心急,試諗吓,如果你喺跌既時候成日唔肯止蝕,越輸越多,但係當股價一升,就拿拿臨趕住走的話,你諗吓你長遠邊有可能賺到錢?所以第一步要做既,係先改左呢個錯誤既投資心態。衰股唔係唔駛走,但係既然最差既時候都捱過,人地先開始彈上黎,就唔好急住走啦,等佢地真係再無力升先至走,又或者有其他強勢股先換馬啦。

筆者為證監會持牌人,其全權委託賬戶之客戶持有昆侖能源(135)

P.S. 明日節目預告: 15:00 – 16:00 ViuTV 智富通
明日無市評,智富通見

 




本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室