【股海崢嶸】潘家榮:恒指跌超600點後的部署策略 (2016/09/12)

 

「上星期五大市係威係勢升上二萬四,但係當尾市升幅收窄既時候,好多股都回得好快,再加上大成交,喺聊天室都有朋友話有好重既profit taking 味道,但係點知話咁快夜晚美股就大跌左落黎。跌既原因傳媒就話係因為波士頓儲行行長發表左鷹派既言論,令到市場驚會加息而齊齊沽貨,所以跌左落黎,不過正如我一向所講,係咩原因真係唔重要,最緊要係跟個市場做。無論點都好,今朝應該都會大幅低開,按照ADR同IG黑期,應該一開就跌四百幾點,但係大家又唔駛太過憂慮住,就算跌四百點,其實都只係去返上星期三四既位,如果唔係呢兩日先走黎追貨既,其實都只不過係賺少左。無論點都好,跟住個股原先定好既止賺位好做就得喇,跌穿就減,唔跌穿就繼續坐住先,無謂自己嚇自己,特別係市況波動時,心更加要靜,唔好因為情緒起伏而憑感覺買賣。

 

個股方面,舜宇上星期五跌穿左陽燭底38.35,所以應該已經沽左貨。至於其他股票,仍然係用返我飛之前果幾個止賺位先,939睇住5.72、700睇住199.2、3988睇住3.39、2318睇住39.2、1099就係38.65、868睇6.57、173就4.23。當然有啲股升左上去,已經相差有一段距離,有啲就未係升起,而距離個位仲係好近,要減貨既話我地緊係減啲升唔起,又率先跌穿位果啲先啦,最靚果啲繼續留,就算想定個近啲既止賺位,都等過埋今日個市無咁波動先。

 

最後,我今日特別想講衍生工具,前排個市日日升,啲大股係咁去,我都見到好多人係咁買call 買牛證,越買越多,個市去坐長當然無乜問題,但係衍生工具同揸正股唔同,因為有槓桿喺度,只可以順勢揸,而唔應該逆市坐,特別係call輪會有時間值引伸波幅,就算之後過一排正股創新高,都唔代表到時個價會高過你今日走,所以一見勢頭有變,千析唔好諗住坐,寧願沽左佢,等升返先再追,咁樣仲著數,亦都唔好心存僥倖等佢彈先走。今日低開,可以觀察一陣先,如果一開就係最低位,跟住係咁升上去既,就可以等到佢升到停左先走,相反,如果開低之後彈都無彈,甚至過左十幾分鐘之後都仲係向下既,就拿拿臨走左佢喇,記住,我以上所講係以輪價為準,並唔係講緊正股價格。」

 




本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室