聯繫匯率脫勾戳破九七後的假繁榮

回上文以人民幣計價賣樓:  Billy成世仔都冇諗過自己做官,佔唔到原本為自己擴權而提倡既人民幣樓宇買賣報價會比特首睇中而邀請自己做該項目智囊。Billy得施老闆答應,一旦事成billy返到公司就升做九龍區總司令。 熱錢湧入博港幣升值機會 係特首背後同鎂光燈前,billy睇住特首將自己有份擬定既買賣方案讀出。話香港在2012年開始實行人民幣借貸至今市場已成熟,加上人幣存款深度已足,係時候在樓市試行人民幣計價模式,為人民幣達成全面流通而作出貢獻。係最後環節billy被介紹為特選政治主任, 專輔財政司長去推行「香港新樓宇買賣模式」。特首咁高調去推行樓宇人民幣計價被外界解讀為聯匯脫勾第一步,因市民藏富於樓房,一旦用人民幣計價會引發整個市場改變。 就係一個記者會令全部人深信港府已拍板動手廢除聯繫匯率,令大量熱錢湧入博港幣升值機會,有人話再過幾年港幣會同人幣合一,港幣潛在升幅兩至三成。 告別九七後的假繁榮 任總經常穿梭中港兩地,為港幣脫勾出謀獻策。阿爺想透過獻策者加大對港貨幣市場控制,既可為人幣國際流通作出試驗,亦可免得自己直接干預香港貨幣市場,破壞一國兩制。港幣升值令香港告別九七後的假繁榮,香港再不能借助美元貶值帶來的好處,上市公司因用港幣結算而令盈利減少,股票先行大瀉。跌幅以零售股及出口股為最。相反外地人黎香港會買夠成年所需既物品,驚下次黎香港唔可以用人仔換到咁多港幣,零售股出現了一次性的利潤大增。用港紙計既實物(例如樓房)在該年跑出,上升一成半,為停泊資金提供收租平台。其實脫勾不會令港元匯價大幅攀升,但大鱷已窺覬這機會多年,一時之間社會訊息混亂,令股票跌者越跌,實物升者越升。 開頭billy覺得十分得特首之重用。由於議題在港不斷被討論,佢得到名聲而不時可與城中巨賈聯繫。Billy既工作係同各大機構高層開會,發現呢班平時係鏡頭前勁nice既高層到會議時一點先也不nice,差劣到對政府局長同議員都有輕視既睇法。Billy根本係會議中不能作話,而返到office又冇政務官比野佢做。始終唔係紅褲子出身,政圈中人脈斷絕而難成大事,Billy只見財政司成日同班bankers密斟而佢只係齋坐。 匿名信 當你發現自己身在其位而不仕其事,好可能惡運將至。施老闆收到由公司內部黎既一封匿名信,指自billy離開公司後九龍南區群龍無首,力邀billy返公司「主持大局」! 仲有建議叫billy同施老闆「裡應外合」,政府同公司「兩面通」一齊發展香港! 施老闆睇完封信當然好嬲,心諗自己係老闆主持大局既當然係自己。即擢升另位董事替代billy位置,加大該區資源務求做得比billy更好。 Billy估唔到咁快比人斬斷返公司既後路,佢心諗同michelle都仲有間公司空殼用黎炒樓,每個月收緊十萬八萬租,生活應該唔成問題。Billy已經將當初入行搵五十萬既小心願忘得一乾二淨,認為自己枉為英雄,見自己建立既根基逐漸被人侵蝕當然要報復。佢誠邀係政府工作新認識既富豪老鄭入股同michelle 開既地產公司,自己就約見舊部下希望佢地過檔去佢間細規模既地產公司而唔再跟施老闆搵食,當然自己就同michelle秘密搭檔。為左打響細公司名堂,billy話佢有大把內地客水源加上老鄭入股,生意唔成問題。 而家billy身在政府,又暗中同michelle攪生意,後面又有追兵。Billy認為亂世出英雄,希望借此時機上位,一舉成名。欲知後事如何,請like諗樣網支持,收看下回分解。

Read more

以人民幣計價賣樓

上回「三個因素ko香港樓市」三個因素判定香港樓市死刑,地產代理billy想盡辦法保住自己係公司八區之中九龍南區域經理既位置。而對於高層黎講,亂世先至係佢地上位既時候。   製造假成交  為左追數,佢叫大陸客王先生用高價買新盤「名鑽」。王生同billy去睇樓,問billy睇八十幾樓咁高如果停電冇lift點算?可唔可以買低層些少? Billy話唔使怕因skip左好多層數而其實頂層只係五十幾樓。佢叫王生只用幾十萬落個細訂,過兩個禮拜上律師樓簽合約。王生問頭一成訂淨低個百幾萬邊度黎? Billy話唔使擔心,發展商同銀行傾掂左,佢一蚊都唔使比。即係王生只要比幾十萬就可以買間幾千萬既樓,升左固然有得賺,跌左當輸隻股票冇幾十萬算數。今次發展商搵間律師樓同平時唔同,唔係之前用開既「孖士打」或之類大行。既然用幾十萬可以博成千幾萬既樓有冇得升,王生認為博得過,佢當買隻股票咁叫billy幫佢入票,為左第時沽出可以慳稅,逐聽billy意見用有限公司名義買入。 裁人為了「好生意」 Billy就靠單deal搞掂左成間行條數,換得幾月頭腦清淨。要知自2013年生意淡薄,不少代理被上頭「勸喻離開」。Billy為求自保已自願將區內兩間分行「摺埋」,又逼冇數既同事每日九點返到公司睇鋪,冇單開就唔比走,變相逼走D人。就因為成功減去人數,成區要跑條數細左,而王生一單生意已可穀到billy該區跑數成績係連續兩季排全港第一,令佢意氣風發。老闆叫其他區經向billy請教跌市點可以「好生意」,billy心諗自己憑一班現有大客,加上手上幾個「fit馬」,於跌市一樣有計。 不強出頭 帶billy入行既team leader固守馬鞍山區,住宅區係跌市成績平穩,幾年前係2012年賣唔哂既樓盤溱岸到2015年成為該區生意泉源。同事力sell溱岸$5500蚊呎係正地鐵上蓋,確實吸引到新港城不少換樓客。當年沙田中心一帶已回落至$4500蚊呎,請看倌多留意新盤銷情而二手呎價常被新盤壓頂。當然做溱岸五單deal都唔夠billy係「名鑽」做一單,馬鞍山區排名只係中遊位置。不強出頭係team leader一早定下既策略,畢竟薑都係老既辣,耐性係香港人少有既特質。team leader記得沙士年代捱得過既區份都係平庸住宅區,而十年過後在2015年在任區長皆是沙士之年低調之輩,故team leader死都唔放棄馬鞍山區。區份有基層客戶提供穩定生意來源,亦可吸納西貢一帶有錢居民,補充高質素客源。team leader心諗2015年只係第一波下跌,睇下billy可以捱得幾耐。   以人民幣計價賣樓 係2015年team leader採取遠交近攻之策,向鄰區沙田區長表示友好又伺機南下吞併九龍南、東兩區。team leader見billy仲係勢大,唯有待良機而出。Billy感覺都殺氣,唯有加快向管理層提供「以人民幣計價賣樓」方案,希望藉此擴大自己係八區影響力。事關billy既大陸客已在港投資多年,佢地紛紛想收成及攞錢返去救公司,故賣樓收人仔令佢地慳返些少兌換成本。香港自2013年推出人民幣借貸服務後市場已日漸成熟,人幣存款深度亦足,樓房與樓按已準備用人民幣結算。到2015年人民幣兌港元維持在100人民幣兌125港元,但一間報港幣賣125萬既樓係會報價低於100萬人民幣既。因人民幣借貸息口高、成本重,人民幣樓按平均息口5%,所有以人民幣報價既樓會再低一成以體現貴按息帶來既成本。   施世闆雖不辦bm730,但在政府總有些少影響力。Billy冇諗過佢想擴權既方案竟然比老闆放上特首張台。施世闆向特首力陳市民藏富於樓,樓宇用人民幣計價係將該幣成為法定貨幣,而取代港紙的第一步。特首見2017年就到,正集中火力在任內完成四十六條立法,心中正盤算如何在立法會數夠票而將條例渾水摸魚咁通過,民望既反彈,真係「下一世先算」。需知當初在2012年上位曾立誓要將立法程序完成,如不能在16年特首跑馬仔前立法,恐怕未能爭取「曼聯辦」撐腰,完成連任目標。   燕雲十六州 特首正後悔當初為何上任當初過份倚重「曼聯辦」勢力,情勢可與後晉為保江山而割讓燕雲十六州與遼人,致使往後就算中原「大和解」而立宋,都不斷受外族威脅,未能復前朝而建立漢唐盛世。唯一同宋朝唔同既係特首唔會比北方外族「捉上去」,而係自己「走過去」。   施世闆大談人民幣計價的好處,對香港可去除輸入性通賬風險,對自己地產公司則靠先行推新方案而「執天下之牛耳」。特首望出窗台種有不同花種既花圃,然後突然轉身同施世闆講:「老闆公司人材輩出,可否借與此方案提議者作為我既政府高級政治助理之用?」施世闆打開手機,用google+提供既instant video conference服務,同billy講特首有野搵佢。   Billy真係成世人都冇諗過特首會用電話搵佢,既驚又喜。欲知後事如何,請看下回分解。    

Read more

三個因素ko香港樓市

上回提要: michelle竟然為幫細妹上會竟然同人洗黑錢,二十萬借左比個妹,淨低八十萬就同billy夾份炒樓。點夾份? 均真D既可以開間空殼公司按注入資金而分配股份,買樓所得資入公司,第日唔玩拆夥都較易計數。開頭樓市由13到14年都仲有些少升幅,點知一進入2015年,幾個因素令香港樓市散哂。   要令一個城市發展起來,錢多人多係必然因素。原本有錢佬將資產搬去瑞士或避稅天堂十分平常,但中國人似乎比誰人都更熱衷去諗幫自己錢「走佬」既。香港以法治同辦事能力係2000年後成為內地人泊錢既首站,但香港人自2010年後為求眼前利益及加速發展,話要「追返之前十年冇左既光陰、基建」,將核心價值,法治精神及是非黑白逐漸摒棄,而侵蝕係一小一小步。幾年過來香港已和內地城市越來越似,內地人再唔黎香港買假藥。而香港樓價係大家認為與祖國大融合之下,都係一小一小步咁不知不覺地由2014年尾持續下跌至2015年頭。   大舉加稅 新政府係就任初期就帶住「打老虎」旗號向富人及大財團徵稅,炒樓有錢賺既人更被打成亂港之輩、過街老鼠,更被收五成利得稅及如有漏報加罰一倍。新政府話收番黎既錢會用作老人福利及不時派錢之用,係2012年推行之初幾得愚民人心,民望升至70分。可惜兩年下來,無論香港同外地炒家都係香港絕跡,大批地產agent頓成失業大軍,施老闆每日係佢既bm730炮轟,可惜於2015年春節過後,施老闆話佢力不從心,要「好好休息一下」,結束該報而去矣!   以前歐洲鬼一落機就好鐘意去買股票買樓,因德國法國荷蘭都未必追到海外資產增值稅項(或類近)。美國佬個機會成本因大到令佢地唔敢亂咁偷偷地係第度投資,所以唯有去「海外大檔」瑞士銀行買野,可惜年幾前都比美政府攻破。政府大舉加稅後,香港低稅優勢已被新加坡取代。前朝大財閥覺得經營環境困難紛紛遷冊,政府為此舉辦多個就業輔導會介紹香港人內地工作,被轟不切實際,引來更多家庭問題。在2014年開始政府民望開倒車而為2017年行政長官選舉告急。   法治社會盡失,失去資產儲存中心地位 政府強硬作風在警隊及立法會提案中盡現。香港識時務者眾多,已經越黎越少人對社會上不義既事發聲了。新政府未上場已經成日話對某些事睇唔到,到上位後更有社運人仕不時被警方扣留,坐左兩日又因證據不足而放番出黎。社運人仕在扣留期間「不小心跌到」而醫院根本係平常,「被自殺」更有幾單,大家開始對員警公安化習慣了。外地人開始在香港股市提走資金,港交所日均成交回到三百億水平,而政府對此一現象既解釋竟然為成功打擊炒家!   外地人將錢放係香港當然係對香港既法治同資金調配速度有信心,可惜自新鴻基及華置風波發生,社會上有好多人一邊為「打大老虎」而叫好,另一邊已經搬錢去新加坡! 一眾富豪逐步撤走資金,大家現時為揭開「高官賢達」既黑暗面所付代價不菲。如打擊行為只為社會換上另一批「社會賢達」實在是不幸,請不要一味只為大富豪蹌踉而出去叫好。   出現1989年後的大舉移民潮 經幾年整治後大夥議員到2015年已歸邊,市民開始相信2017年選舉又係另一個小圈子選舉,特首連任已成定局。1989年國內風波令不少有能力既港人移民到加拿大或新加坡,而呢班人到2015年終於決定飛返番加拿大,香港盛年既精英份子亦判定香港斷氣,香港發生自1989年黎第二次移民潮,國泰溫哥華航線收入再次大增,而剩低既就係一班「冇人肯要」既香港公民。到時每名香港剩民貢獻稅款二千,情況不堪設想。   以上幾個因素先至會真正ko香港樓市,令人同錢都唔再停泊係香港,Billy生意當然一落千丈 ,如何在2015年亂世獨善其身?請like諗樣網,下章再談

Read more

想做銀行諗清楚?

link上回「樓市2013年與歐洲國家盃你要知! 」: 講到Michelle既細妹Zoe同男友Ben卡數多多就學人買樓上車,雖然買間估到價2.6mil既屋但因兩人卡數及供車支出繁重,最尾銀行只借買入價七成。佢地又蠢在係5月1 日簽左張得45日成交期都唔夠既臨約,而家距離6月4日成交只剩7日。係市旺之下,7日內攞按揭證券公司批文借到九成幾乎冇可能。 財仔做二按 跟規矩佢地已在臨約定立十四日內將全數訂金交予律師樓,基於「必買必賣」合約原則佢地交唔到餘款九成比賣家將被殺訂及賠付差價比賣家,計落都有四十萬。而家一成訂比左,銀行肯借七成,淨低兩成問過財仔肯做二按,不過見佢地快成交所以獅子開大口要9%年息,借一萬五年之後要還返兩萬! 佢地仲諗緊有冇其他辦法。 Michelle已在銀行工作數年,人事變動極快。係香港既外資大行,管理層已成功將跑數既壓力轉介到前線銷售同事身上。櫃面同事每半日計數,未做銷售推介唔比「放飯」常常可見。客戶被推介到銷售同事身上只係第一次會面,老闆即要求同客開單,叫客買基金買股票買外幣隨管理層要跑的數作準,有時不理市況及妄顧客戶所受損失。隨市況一跌,有「睇唔開」既客人就走去鬧分行同事。始作俑者的管理層,就好似秦皇咁高高在上,等收年尾既bonus就走人。 Michelle總算叫有經驗,知個股市會跌寧願唔到數都費事夾硬叫客投資。所以股市跌到低位時佢批客人仲有cash,可以逆市下跑到數。係比老闆鬧足成季之後,第二季憑較佳銷售成績,比銀行邀請佢去做「分享會」。須知銀行而家好似傳銷咁,鐘意係放工之搵唔到數既同事去「分享會」變相懲罰。早前蘋果就刊登過同類見聞。 一日廿四小時係咪就咁過呢? 分享其間,有一個做助理既女同事,竟然講講下野喊左出黎,引起到玩緊iphone既michelle注意。女同事主要幫銷售同事處理文件工作,好等銷售同事用盡辦公時間博殺call客。佢話最諗唔到既係呢個「文職」位置竟然要夜晚十二點收工! 話說銀行分行要攪team spirit,每個同事都要付出120%去達成分行到數既目標。就咁女同事已經用盡辦公時間幫手call客,自己既工作文件已放埋一邊。到五點收鋪諗住做下銀行極多既paper work,點知六點又話要成條team打比大老闆做「戰況匯報」,七點竟然比人叫左去同經理陪客食飯!? 「what’s a xxxx! 佢老豆*仲未死,仲有個仔係屋企,一日廿四小時係咪就咁過呢?」最令佢不滿既,莫過於佢只係文職同事,人工得個萬零蚊,為左份工博成咁。講完只好擦拭眼淚起身,行去人事部放低辭職信,離開佢做左十幾年既公司。 就咁呢個「分享會party」比人「攬寸左」。主持人笑笑口打完場就算,話估唔到同事抑壓係心入面既說話可以有咁大爆發力。源自「天上」不斷加target既壓力已令銀行職員變做「訓完起身就做野做完又訓既機器」。Michelle都知聚散有時,逐打比佢既「大客」王先生。 黑暗面 王先生係大陸客人,成日黎香港買保險。佢好鐘意一大筆錢買三至五年期既保險計劃。係2011年尾前金管局冇規定銀行要了解買保險既客人係咪最終受益人,所以呢類客可以等「風聲冇咁緊」或臨到期前提早退保後將筆錢入落某銀行的聯名戶口。今次michelle向王生「獻計」,叫佢先將份保單既持有人轉做開曼群島註冊既避稅公司名下,成事後王生要封「利是」比michelle買樓。由於銀行對大額提款及轉讓特別起疑,今次佢地學精左將舊錢拆細買幾份保單。Michelle用郵遞方式幫王先生份保單搞轉名,提供該BVI公司些少文件後竟然比想像中容易咁轉到名。轉名後攞錢簡直係好易既事。所以話清潔工都分好多種,視乎你洗錢定係洗碗碟。   事成後Michelle只係將少部份錢借左比細妹Zoe買樓解決文章初段既問題。淨低既用cash放係保險箱。 係2011年開始金管局已加強監管保險買賣需附上的資金來源證明及持有人地址,請勿以身試法! 後章michelle經理終發現佢做緊既野,請like諗樣網以留意及支持,下章再談。  

Read more

奪命金是真的! 再談揸的士都唔好做銀行

由於電腦問題,本文昨天意外被筆者在snb刪除。見本文在facebook短時間內獲得不少好評,經一晚加鹽加醋加左五百字之後,大改內文再推出。希望snb幫手將佢發揚光大。 link to上文:有一日地產界既Billy走入生恆銀行,認識到怒sell佢保險產品既客戶經理michelle。Billy好坦白咁同michelle講佢覺得個回報好差,叫michelle過幾日再打比佢,睇下會唔會做一份! michelle覺得佢「終於見到一個有人性既人」!係三日之後既上午打比Billy約佢到分行。 Billy見Michelle鍥而不捨咁sell保險,好奇咁問佢「保險條數」係咪好大? 當Billy期待緊一個yes/no既答案時,Michelle望住分行既人龍,講出現時既苦況:「我已經幾晚冇訓覺,我一訓落床,就諗緊今朝開會點答老細。我班同事已經捱到成日胃痛。早排有人去蘋果爆料,報紙都篤爆過銀行要跑唔到數既銷售同事晚晚留低開會到八點。有D同事更要聯同分行經理上晝七點幾就去面聖(見大老闆),搵到同事成九點幾先返到屋企,訓得幾個鐘又要返工。你問咁樣同事點會唔神經失常?最慘係剛入行既新仔,為左一萬幾千既人工捱到咁盡,當然做幾個月之後就失蹤。所以你見而家成日請新人,成日銀行職員做錯野。」Michelle話:「我做左幾年,唔上唔落,轉行又要重頭黎過,咪仲要係度捱。」講完已經四點幾,Billy只好返屋企。 做十萬?你唔使旨意! 第日早上Billy行過Michelle分行,隔住玻璃門見到成班sales同分經(分行經理)開會。應該係摔緊數。經理問一個同事呢個禮拜有信心「做幾多」? 同事低頭唔答,之後細細聲答左十萬。經理就話:「十萬?你唔使旨意! 三十萬啦!」就咁同事講左等於冇講,一味被人逼佢跑數。 遞信都解決唔到 有人話呢份工冇人逼你做,不過有銀行為求職員係遞信辭職後仍然要專心跑數,竟然威脅職員如果唔到數會寫花佢走人時攞封reference letter,等佢係第間bank應徵時過唔到reference check,等於踢佢出銀行界。其實職員到數又何須遞信呢? Michelle就係因為咁「唔上唔落」! 正所謂留係度又死而家連走都唔到。Michelle又話:「今朝分行經理開會時同佢講之前六個月有一半時間佢都唔到數,下個月再唔到數就會炒佢,又係一封reference letter with unsatisfactory performance做termination reason,收到呢封做又係唔使旨意係呢行番身。」又話:「今晚因為成間分行唔到數,要攪「理財日」分行開到七點先關門,同事係facebook上面post遲收工呢件事即刻比人召左去「照肺」! 要知同事張合約當初係寫5:30放工的…」。你有冇發覺而家星期日行街都會見到銀行有人的? 一張強顏歡笑既面孔歡迎你到渣x銀行。試問你打左六日仗之後仲要返工,點會笑得出? 銀行已經變質 而家係香港銀行,客戶經理要一腳踢銷售基金、保險、外幣、股票掛勾產品加上按揭。基金絕對係快手賺傭之選,升市仲可以走幾轉。而保險絕對係又難sell但係又要sell既產品,可穩定銀行傭金收入及提供長期正現金流比銀行。所以開始連筆者家母都講銀行今日又sell佢保險。你行入銀行分行,櫃面職員已經對你虎視眈眈! 因為佢一日無番兩個銷售推介比sales,「放飯」都未有資格。你坐低比人sell,一坐就成個鐘頭,可知客戶經理sell唔到你買野係要向分行高層交代的! 高層間分行冇數又要同大老闆交代,一層一層壓落黎,令銀行呢個已前好有人情味既地方變左做殮房。 要知女人摔數,比男人兇悍廿倍。有職員生病「入廠」請五日病假返到公司被人成本書「車」埋去。大肚婆因成日要請假兼冇跑數能力更加會被凌遲處死! 現時銀行以傭金收入為主,同九十年代以借貸收入完全唔同。看倌而家行出街見到既豐盛理財、卓越理財等等,都係二千年之後既產物。貴為尊貴客戶排快隊坐低有咖啡招呼絕對唔會少,但係你有冇諗過個部銀行幾萬蚊任你斟既咖啡機,背後點樣搵返你既錢呢?   「金管」管唔到 係沙士之前,銀行賣保險剛起步而客戶經理大把銷售對象,個陣百萬年薪既客戶主任比比皆是。到2007年股市大升基金幫客搵到錢,聽聞銀行經理收過年利是「閒閒地」都有幾萬蚊。時至今日保險已經越做越冇,市況缺乏大升市,但銀行比落既target每年最少以30%既速度增加。即係客戶經理係07年每季跑一千五百萬基金,而家每季要成五千萬。即係每月都要搵千幾百港幣既基金交數,試問係過往一年既市況如何能夠? 金管局就不斷叫銀行企係客戶立場去推介產品比客戶,但係銀行就陽奉陰違,每月逼職員「到哂數」。其實金管局比指引叫銀行唔可以比target比同事既,不過每當金管局落銀行查察,職員係老闆「威脅」之下唯有話「冇target」。而銀行職員係每季幾千萬既target下,唔理市況硬推理財產品比客戶基本上是唯一選擇。 跑唔到數無假放 最弊就係Michelle知分行經理變成咁惡都係因為上面摔落黎。上面要跑數佢唔會理下面點跑。銀行職員為左保住份工,誇大好處縮細產品缺點常常可見。就係咁越黎越多銷售誤導既投訴case係銀行出現。Michelle入行兩年,佢冇諗過做銀行要做到好似「奪命金」情節咁要搵個阿婆入黎引佢講「清楚明白」先可生存。佢真係覺得自己好折墮。揸的士都可以自己決定幾時呵尿&扮睇唔到拒載,銀行有客到你連廁所都唔敢去,日日對客人奉承。跑唔到數既大假例假「mark完就算」!旨在比人事部keep返個record不過工照返。 死就你死先! 遇到投訴通常個客都唔想同間bank對薄公堂,草草了事。但如果客人嘈到去消委會,銀行原來會推個下面做sales同事出黎頂! 話銀行已經有哂客戶同意文件,有咩都係吊銷sales同事既牌就可以。就係咁Michelle一日返工係九點開會比人摔到十點,十點開始見客,十一點幾就比人問有數未? 食食下飯有客到又要仆返去分行見客,五點銀行關門之後先開始處理台頭文件,冇八點都唔走得。人工得一萬幾千,由於銀行想同事年年都咁有進取心,管理層將一個經理職位分做ABCDE五級,搞到後生仔升十次職都未升到管理層級別,而青春就白白浪費。Michelle講到呢度,諗起自己暗淡前景,熱淚盈眶而心有不甘。 Billy見Michelle條數成幾千萬,心諗自己得十萬蚊都幫唔到咩手。逐同Michelle講佢我手頭上有D客都幾有錢,遲下同佢介紹一下。Michelle知道Billy幫唔到手係必然,不過係銀行呢個無情既環境之中,Billy既鼓勵已經令佢心中感激。 現時銀行真正情況比「奪命金」有過之而無不及! 對於貪婪既機構管理層,監管機構需要正視。 下章Billy會比team leader出招一拳打佢去大西北,請like諗樣網收看下回文章。

Read more

80後廢青billly同你搵車位

Link to上文: Billy入左行一年,佢已經係馬鞍山區一個普通的地產經紀。同上一章比較,起碼脫離「冇料」既行列。上回交待左Billy點樣脫離費廢青既經歷,今回Billy仲遇到貴人添! 既然都叫有份正職,Billy好唔明點解自己「溝唔到女」囉! 畢竟係上一章都講過佢由保安轉agent其一原因係受自己對原始性渴望衝擊之下而引發! 佢日日帶人睇樓,係脫離入行頭半年包薪期之後,自己一個月先得一萬幾千蚊糊口。正所謂餓唔死又食唔飽個隻,加上有一次比條女咁話佢:「你咪再死跟住我啦! 我唔會鐘意你D地產仔架! 出面追我既有醫生同飛機師,你收皮啦!」 必須更有耐性 Billy真係好很sad,係唔開心之下,又想返去自己之前做前個無風險,又無回報既保安員工作comfort zone。Billy個team leader聽佢咁講都好鎮定,因為自04年以黎求去既agent不計其數。佢handle Billy既做法只係同佢分析離開或留低既優劣之處。佢同Billy講:「你走既話之前做落既功夫無哂,出面無人敬重你就因為你係做左一年既地產仔囉。你做左一年就想買樓買車? 發夢啦! 你轉行係一個突破,不過你要有下一個突破必須更有耐性。年青人真係玩電腦太多,無耐性。你同我講溝女? 都一樣架咋,要有耐性等時機! 我而家比樣新既野你做,同我集中火力搵人要哂D車位佢!」如是者又係埋門一腳既激勵,Billy開始做野rathan than諗野。   放大量車位既客戶係卓生。佢見開始馬鞍山有鐵路到逐減少該區車位持有量。畢竟係上一章提過agent要縮窄考慮範圍先可以叫客戶盡早決定,Billy問卓生:「有鐵路到唔代表咩野, 你覺得個回報好唔好先?」卓生話:「車位黎講6%p.a.算係中規矩,有10%緊係至好啦! 不過我想要有租收既車位之餘,仲要有得升既!」Billy問邊度有,佢又講:「搵會升既車位就要諗邊度有地鐵但係站上面又唔會有人搭,而附近無鄉村爛地既地方。因為按政府規劃,有得地鐵就會起少D車位供應。不過係某些地鐵站上蓋既居民係唔會點搭地鐵既,或者點都養返一兩部車。你就要去搵政府唔用腦去規劃既地方而找出供應失衡。」Billy心諗:「即係邊?」卓生架車已經轉入左圓方既停車場。   咪話我唔點醒你個的士(Billy比客個名叫的Dick Sze):「買車位最緊要搵地區之外,最好自己識揸車。如果唔係你睇唔出點解呢個位會特別平。最簡單既係邊個位近停車場出口或客lift口都會貴D既,因你出車都快D啦。仲有,轉彎單丁多柱位既多數都平D,因為難泊車或者放係轉彎位容易比其他車撞到。你睇中個車位,最好問下個管理費,平既一百貴既六百都會有。」Billy大開眼界,卓生再講:「我鐘意投資車位因為得塊地冇咩維修費,租得車位都好少欠租。比起買一個單位,用三個車位收租仲可以分散風險添。最煩就係要分幾次收租,每次幾千蚊好濕碎,所以我交比agent做就算,還掂我睇升唔志在佢D租。」 Stay Hungry, Stay Foolish Billy同卓生一遊真係大開眼界,最能推動人工作既莫過於發現自己不足。係06因之前住宅動工量不足,無新盤可賣之後,Billy努力叫人買幾十萬細細粒既車位,每次收傭收幾千,實行「密食當三番」。又因為車實非必需品,加上價錢平,每當經濟差個車位就跌得甘,升就成倍咁滯。Billy終於係馬鞍山「起朵」,就係靠呢個傭金幾千幾千既車位做番返黎。另外又因車位較難做按揭,佢成日不恥下問咁去請教banker點用車位上會,發覺車位一般借五到六成,分十年還。要留意有些車位原本張契係連住宅單位既,不過沙士個陣業主破產,車位界左出黎賣,所以做車位買賣業權要搵律師攪清楚。時至今日Billy發左,佢都有keep住係馬鞍山識到班車位客,不過九龍站已經炒起哂,青衣同奧運站都冇筍盤,唯有轉戰將軍澳同荃灣,貪該處有多些揸車客而出現供不應求拉貴租既情況。 係入行之後既兩年Billy已經累積到一批客源。雅典居加上西貢出黎既貴客、富安花園既居屋客、買新港城既換樓客佢都遇過。Team leader問Billy仲有無後悔入錯行,Billy話:「根本無話入邊行對或錯,做人最緊要艱辛過! 苦瓜先苦後甜既理論我感受得到!」由佢答問題既手法team leader知道Billy終於學曉第一步。對於面前熱血既Billy,team leader心中盤算,如何養肥而後噬。 下章 : 賣樓「屈機」你要知

Read more

暗黑破壞神3與廢青Billy搵工再出發

今日係母親節,四十歲既Billy由一無所有到現在「再次一無所有」,係執達吏同佢清點間屋走人後,佢望住地產商會贈送既「成功人仕」獎座不發一語。當下午西斜既陽光照進屋裡面,佢開始同筆者講出自己成長既故事,由自己母親開始。   Billy有一個老土既阿媽。佢記得讀中學放暑假時阿媽會帶佢去書局送幾本書比佢係暑假睇。Billy有一年選左佢最想睇既三國誌漫畫,仲有學校隔壁位sharon成日睇既愛情小說。佢阿媽就係書局呢個咁靜既環境鬧鬼佢:「好心你就買D實用既書啦,男仔學人睇愛情小說,醜死鬼囉!」最尾就由書局既優悠區拖到佢去實習區,買左本「數學加強習作本」同埋「十萬個為什麼」,加上阿媽自己本東周刊之後就走左。   「體諒、支持、空間」 Billy自此就對身邊既事不作發言,因為連阿媽係買書方面都行假民主,令佢覺得發言根本係無謂,劇本既結局一向係*安排的。原本係十歲前既Billy仲係對事物極之有好奇心,行街見到有條魚都要問老豆問清楚係咩魚先死心。而家人到十七,身邊只有幾個同學仔傾得埋,傾得埋既原因係班同學仔大家亙相體諒同支持,呢個原因係無論大人同小朋友或公司一班是非精可以走埋一齊既主因。由於Billy手頭上冇錢,放學之後去同同學去網吧打機差不多係唯一可支付活動。   「暗黑破壞神團隊」? 人總係要搵一個自覺舒適既空間生存。Billy同班有些成績好既同學會為生存係「成績優異同學」既空間而努力讀書。又有同學一放學就去拍拖,以求係「把妹殺手」既空間揚名立萬! 咁Billy呢? 佢覺得自己空間最廣闊,因為佢參與既「暗黑破壞神團隊」可以一線地上下相連,online game既精髓莫過於要你不斷升level,有研究指示完成遊戲任務或升level而令人腦中產生的神經物質與注射嗎啡相同。Billy由會考到完成毅進課程,佢主力都活係「暗黑破壞神團隊」既空間之中,終日打機。   Billy好快就比人冠以「廢青」稱號。其實人又何嘗想「廢」呢? 佢而家有份保安工作,月入$9000。「暗黑」既空間令佢獲得成功感,相反阿媽叫佢成工去見第份工就失敗收場。同埋佢硬係覺得阿媽又好似以前咁昆佢。叫佢去跟大伯學砌磚有門手藝? 咁同細過叫佢睇實用書有咩分別? 由中學暑假買書開始到而家廿二歲呢十年佢已經習慣對阿媽既指令抗拒。阿媽對佢既惡行令佢先入為主覺得阿媽既建議係要先reject。現時社會人仕評擊「廢青」,話年青人無大志等公屋,又話社會單一化無創意,其實而家班50後60後都有份造成。Billy好記得阿媽逼完自己買數學習作之後自己就買東周刊睇!   「埋門一腳」靠激勵! 有一日,機會終於黎啦,就係佢「暗黑破壞神團隊」既成員sell佢入行做地產agent。Billy比人拎左去見間地產鋪既team leader,team leader話唔通你成世人都係想咁? 唔想揸靚車追到女咩? 至少都要賺多D幫自己儲返個錢啦! Billy話做野好辛苦,又唔一定成功做到top sales,點解要咁辛苦出黎撈? team leader話:「咁就要睇下你覺得當下既快樂重要定係未來既快樂重要。人一般有正時間偏好,即係現在發生既野比將來一切發生既野看得更有價值。所以有人叫老細「即磅」一萬蚊花紅都唔想等到下年既萬八蚊。」但係成功既人畢竟少數,team leader再講:「你可以唔做成功人仕,不過為左三餐,你搵份兩萬銀既工係必須的! 你繼續享受當下既快樂,未來既人生將會欠缺投資,終嘗惡果!」Billy係team leader一輪激勵加上內心最原始對性渴望衝擊之下,佢終於肯踏出第一小步,走出「暗黑破壞神團隊」而向「成功人仕專區進發」!   Billy轉行,佢諗住搵到50萬比首期買間屋仔之後就收手,返去做保安過返優您既生活。老闆話叫佢改過個好記既名,話客人容易記得你個「藝名」會對生意有幫助。既然Billy同大老闆一樣都姓施咁就唔好蝕底,就叫Dick Sze(的士)吧! 又話:「你每日同客打多幾轉「的」,保證佢以後放工可「飛的」呀!」 同其他*一樣,Billy*都係好反對Billy做agent既,話讀咁多書走去做agent,浪費阿媽D供書教學錢。不過見個仔終於肯「的起心肝」去做樣野,唯有放手比佢做吧!   帶Billy入行既朋友係馬鞍山分行工作。計死數既Billy同朋友講做咩唔去港島做agent? 還掂收傭都係每邊1%緊係做單成千萬既樓啦! 朋友話你入行咩都唔識點去handle比得起千萬既貴客呢? 我地新入行既質素,就算有條大魚飛埋黎都捉唔到。一入行最好係自己屋企附近既地區開始,一黎對附近地理位置熟悉,二黎要係住宅區累積到一批有實力既客,先可以到外區進發。   謀生用「能力」而不是「學歷」 係考哂地產牌,每月支取五千底薪兩個多月之後,Dick Sze向帶客睇樓進發。佢望住成幢樓盤資料發覺佢係學校讀左十幾年書得「從書本資料中分析趨勢」呢個技能幫到佢,其餘生物化學都係多餘既。不過佢諗深一層,當初唔係被逼攞住本書,而家做分析點會咁上手呢? 起碼佢唔會好似D地產老前輩咁見到書都驚。另外係考牌呢兩個月,佢知道自己第日要成日講野所以會好主動咁去同同事吹水,想增進自己溝通能力。第一次同師兄帶客睇樓,佢除左成日按錯隔離門鐘之外,仲有如下經歷:   師兄叫佢做主力sell客,及只會在旁觀察。Billy發覺自己同客講野無問題,不過講左一陣就無咩話題同客吹,仲有就係講極都講唔到佢最想講既「買賣要點」。佢只係一味講野,個客都好樂意同佢講野,不過係一次sales meeting完全搵唔到進程。返到分行同team leader review,leader都算有經驗,知道呢個係新人弊病之一,又由「體諒、支持、空間」三部曲出發。   Team leader都係好老土咁拍下膊頭支持佢,話體諒佢入行兩個月無咩數係正常,因為後生仔未知點去用把口叫人做野。佢又講出重點:「同人溝通係分導向性同非導向性兩種。你平時同同事吹水只能幫你增廣見聞,但係用把口叫人做野,需要係另一個元素。」再講:「最基本既做法係同客人對話之中加上問題,一開頭可以係一些無聊問題,等客人習慣在講個答案比你知。到客人真係睇中件貨你應該問更多yes/no question,盡快知道客人其實想要件貨係點樣,比一件適合既貨佢加快交易完成。」就好似你賣衫咁,都會先問下件衫係買比邊個,一步步縮窄範圍啦! Billy聽完半信半疑。Team leader心諗比後生仔發揮一定要空間,叫佢:「比心機去做啦,你唔好搵粗口鬧個客就可以架啦,我信你得既!」就係不斷咁比人出「體諒、支持、空間」呢招之下,廢青Billy都可以變成有幹勁既青年人。大家有冇諗過,多鼓勵,少投訴呢? 就好似兩個嗌交既人,如果其中一方突然停止鬧(投訴)對方,對成件事係即時會有正面影響的! 筆者打左二千字都打到膊頭痛,Billy故事,下章再談。  

Read more

80後:為甚麼要力爭上游?我才不會做工作奴隸!

(註*) 該段是經濟日報新聞所出,其餘內容純屬虛構,如有雷同,實屬巧合。   Billy係應屆大家畢業生。佢今日出席分享會關於一家上市公司副主席應邀分享成功之道,台上這位商界女強人眉飛色舞地說自己如何爭取機會學習,才有今天的成就。Billy真的聽得不耐煩,佢鼓起勇氣係發言時問話:「你知道我想要甚麼嗎?我要work life balance,為甚麼要力爭上游?我才不會做工作奴隸!」即時有同學拍手大叫認同。Billy再說:「身無分文既我聽你大數自己成功史係十分難受!我地後生絕對唔係蠢,請你唔好被傳媒利用而加入「80後」同「成功人仕」既紛爭了!」Billy認為人最緊要知道自己想要咩。佢係起身離開座位之後,向心中既目的地進發。(註*)   剛畢業既Billy其實真係唔知自己想做咩,只係想自己做一個有尊嚴,比上不足,比下有餘既人。電腦系畢業既佢走到就業輔助處想搵份工,Billy家中不算貧窮,住係居屋,不過都唔想搵份人工低到六、七千既工作,經過四出奔波既夏天之後,Billy開始係一家電腦公司當programmer。   與其心陷痛苦不如勤快工作 Billy確實唔想做工作奴隸,但係佢明白必須有痛苦既過程,先至能夠擺脫一般人被勞役既人生。Billy既老闆成日「點」佢做野,不過都教左佢一樣野:「既然你而做呢份工覺得咁痛苦,點解唔快D勤力做野升職或累積經驗走人(轉工)呢?」Billy雖然成日「問候」佢老闆,同其他同事一齊講老闆點「搵人笨*」。不過佢自己對老闆鼓勵員工努力工作,有好路數就唔使再留係度比人搵笨呢點十分認同。兩年過來,被「利用」了兩年的Billy走出左呢間公司,走到另一間電腦系統公司工作。 係工作頭兩年因要還Grant-loan,完全儲唔到錢。Billy轉到呢份新工原因係佢經兩年工作發覺自己口材比較好,利用此長處自信有更大作為。後生對某工種有信心就應該去試,畢竟後生仔未結婚在轉工付出的機會成本是較低的。同上份工一樣,呢份工既老闆都係利用佢。Billy今次已經識諗左,佢同同事講老闆比得人工你緊係要你做唔開心既野架啦。都係個句:「後生頭五年充實自己,定立方向,生活要捱得到之後先求質素。」佢從沒放棄過work life balance,不過佢明白求balance於年輕時的付出少不免。好似民運領袖都話:「自由是要有所付出的!」   獅子山下搵笨實? Billy係新崗位可謂大放異彩。佢心中實不同意同事講如做多左等於益左老細,出面講咩獅子山下精神根本是搵笨實的!佢每日做好自己工作,自己經驗知識都有所提高。不過咁唔代表佢每日工作時間超長。為左逼自己每日七點放工佢係工作時間唔吹水唔facebook,手快快咁將工作做完返屋企打機。其實打機同工作係可以共存既,係Billy出黎做野五年之後,每月儲3000蚊,手上有廿萬儲蓄。佢都知打死一世工冇發達,開始搵下有冇野投資下。   年青人最緊要面皮厚 佢諗左成半年,佢覺得買股票賺錢太唔實在,攪到佢精神緊張夜晚美市時段訓唔著。佢又唔想做「樓奴」,為左供樓就受盡老闆氣。佢係度諗有冇咩方法令自己可參與一個勝出率較高既投資? 佢認為機會就在消息較不靈通既樓市。佢想在資訊不對稱之下得到賣方既甜頭,用較低價買得住宅。於是佢一條友學人成日放工去荃灣唐樓區睇樓。多得做sales訓練到面皮厚,佢唔怕醜咁成日問agent買樓既問題,投資都需要學習的。佢學得快之餘亦令一眾agent們極之記得佢。 有一次得廿萬既佢走去睇分契唐樓。買分契樓唔好去搵中原美聯呢D大地產鋪,反而走去老區入面既地踎地產仲實際。Billy想博有老人家開錯價執平野。唐樓附近一般已發展,交通一定方便。佢第一次睇樓同agent行左五層樓梯先至上到間屋,間屋有條長走廊分開四個房門,仲有些少霉味,睇到都唔想買。Agent話A單位開價30萬,Billy見個價錢幾吸引放低左22萬還價,急急腳走人。佢走得咁快係因知唐樓根本內籠冇咩好睇,只求唔過份就算。反而落樓梯要留意地下有冇針筒,鳳樓有冇裝閉路電視幫手睇住間屋。Billy走之後打比律師朋友,查下間屋分契業權是否完整,有冇因為藏毒色情私竇比人釘契,外牆係歸自己定係大業主,起碼跌野落街都知邊個責任。查完一大輪已經到夜晚,Agent打到黎變哂語氣話18萬業主唔接受,大家開開心心20萬做成佢好唔好? Billy一個愕然,之後應承左20萬呢個價,比佢今朝還既22萬仲要低。   Agent約左業主兩公婆同Billy一齊簽約,佢話舊樓最少收100萬既一個%,即係一萬,Billy都冇咩深究簽左就算,之後發覺原來唔係咁。Agent又同業主兩公婆講樓下都係賣16萬,佢地賣20萬真係賺左。Billy心諗點解低層會貴過高層呢? 原來唐樓無lift,四樓同二樓都比人遮實哂架啦,所以低層仲值錢,無起水上黎都可以「搬水上樓」,搞得好可以做埋樓上鋪添。Billy比埋票,明明係交吉樓都要成個幾月之後先交吉。Billy無理佢,心中已經諗緊搵呢個agent放番呢個盤信唔信得過。   過兩日Agent又打黎問有冇搵開邊個律師,Billy話已經搵好左。Agent話如果有人出30萬你「摸唔摸走佢」?即係用確認人身份出售現有單位。Billy話佢到33萬先算啦,佢唔想蝕洗費。如是者又到夜晚,Agent打黎話佢係Billy樓下,叫佢落黎收訂。Billy有感「一言既出,駟馬難追」,半推半就之下落樓簽約,兩日就袋左十幾萬。Agent告誡一定要用佢間律師樓,如果唔係起碼律師睇契都睇成個禮拜,阻住個地球轉。Billy終於明白點解佢間樓有咁長成交期,原來係要方便Agent同佢「摸貨」。個地球轉一個月,叻既Agent可以搵一個盤同佢做幾次生意。細鋪既Agent千祈唔好睇少。Billy實行了他的計劃,令自己大增買賣樓宇知識。   人生是一個平衝 Billy明白每人有唔同既路,佢想係「努力工作賺大錢」同「一世捱窮等公屋」中間搵一條開心既路。Billy而家買左第一間「爛」屋,都叫有個竇。人要成長必須先被「利用」,或稱蝕底。之後先會知自己所長同開始搵到自己一套投資模式。如你是在開始工作的頭十年,先不要把quality of life放在大前頭。可唔可以將work life balance睇做廿年,而唔係一日呢?以廿年黎睇其實係頭五年先付出之後尾五年生活相信較可美滿。洋洋千字只為給你一個對work life balance另一面睇法。如果筆者係事業起步初時捱幾個鐘就頂唔順要去「balance一下」緊係少左後來既機會。係電腦面世之後,人往往想同事或老闆或家人好似電腦咁要比即時反應你,一唔合意就放哂上面。可惜人要委以重任確需時間觀察,請培養你對事物及工作的耐性。梁先生的特首寶座,都係種花咁種出黎的!  

Read more

腥風血雨: 獅子裁員三選一

雖然亞太區主席勝哥應承裁員行動於第二季完結,但係奧海城IT部既同事就過唔到3月15號呢個日子。命中率有三份之一。當大家打電話去搵該銀行可能已發覺電話講野個服務員係操純正但係諗唔明有咩唔同既廣東話,其實箇中原因係call center已搬左去彿山,連同mortgage個approval center都搬埋去。你打上去佢地係講廣州話,你交低份按揭申請表,資料其實已被送交神洲了。 至於IT有冇搬走? 應該去左大陸同印度。但有一部份裁員確實係因人手過剩。獅子自新主上場即開始「開源節流」,雖然話打工仔要預左有一日比人炒。但係明明獅子香港最賺錢又要係呢處搵人開刀,因為香港沒工會呢個制度。筆者識得友人在環球投資銀行部門工作,40來歲,附合「二、四、六」註原則,於新年前已「光榮畢業」!佢臨走前講馬來西亞同新加坡都有諗過炒人,不過個邊有工會同政府幫手,最尾都係炒左幾個人交數了事。香港而家變成重災區,香港政府應正視下點解呢間香港人咁支持,上次供股達98%既銀行會係香港肆意咁裁員。 註 「二、四、六」即二十年資、四十歲、六萬人工 炒左既員工,會去奧海城人事部見HR副理,就算你係band3,話哂叫做一個管理層, 匯窿都係搵個band7即係teller grade既同事同你講番點計埋份糧,同埋佢地拍左間agency做「輔助就業計劃」。可惜無聽過呢個計劃幫過咩人。2008年炒人個陣大聲同出面講請返部份炒左既同事,話係「良心企業」。其實就係2008年雷曼之後證監會加強銷售要求,佢地突然要班part-time 做下野,contract請你多一至二個月而已。 另一個故事,分行收到call center經理級同事既履歷表,成40歲人都要走去分行同班靚仔一齊跑數。點解幾廿歲人仲走去分行做一個sales? 因接到最後通電,二個月內係銀行入面搵唔到另一個位掉就拜拜。願佢係分行既生活愉快。 事情仲係發展當中,炒人既風已經由中環吹到奧海城,遲下會到各大分行。雖話應承唔再裁人,但逼走一個人其實十分容易。香港另一間孖打銀行已經同管理層講明今年有同事走對佢地自己既score card(計performance的)唔會受影響。即係佢地可以放心咁卒同事,卒走都無所謂。希望醒風血雨有平息一天。 今夕吾軀歸故土,他朝君體也相同。望一眾打工仔警惕,力爭上游,對不義既事要發聲。 伸延閱讀:Chok住上第三回-從大時代走進天與地  由於寫有內容的文章需時, 為鼓勵我及更多blog友創作,請like諗樣網以表支持: http://www.facebook.com/thinkingweb/

Read more

Chok 住上第二回 – 天下三分?

係回應讀者問及城市電訊(1137.hk)會否於發展電視業務初期引致盈利能力下降之前, 想回顧一下點解香港會搞成咁, 同埋未來會否四分五裂。   其實無線電視(0511.hk)應付後起之秀唔係第一次, 佢今日仲可以「企係廣播道」, 係有佢o既原因。1975年,佳藝電視(佳視)開台,成為第三家免費台,從無綫電視過檔的周梁淑怡出任總經理,以高薪從友台挖角,大灑金錢製作,但後來因為嚴重虧損,佳視3年後停業。第二次出現於1980年代,當時麗新集團林百欣從無綫挖走藝員拍劇,更曾一度扭虧為盈,但後來林百欣賣盤,亞視製作再度減少。亞視中間有「百萬富翁」, 「今日睇真o的」等綜藝節目反擊過,最尾因內部權變嚴重, 一直演化至今天既CCTVB。所以如果要用三國比喻, sorry佢只可以係北方匈奴。   時至今日, 天下近乎大一統, 但時間一長, 就算係賢能之王, 亦有衰老的一日。係王百歲退休幾個月之後, 某人就將獨家免費電視頻道呢個輸送了的利益收番,過往咁多年嚴緊既免費電視發牌制度亦稍為放寬。 點解香港唔會出現多個電視台? 主因係政府嚴緊既發牌制度,嚴緊之處唔係監管內容, 而係要極大的起始投資金額。另外地理原因為二, 香港地方細所以可以用一個台cover哂, 以台灣為例, 因山多地方較大, 有些地方要靠有線電視提供資訊,變相令細少經營者有生存空間。細少電視台偶有佳作, 成為焦點時時發生。第三原因係香港政黨與管治班子還是處於分割,政黨資源或影響力未致於龐大。所以政黨沒有資源或能力去大力贊助某電視台使其成為喉舌。相比台灣電視百花齊放, 政黨力量在當中推動不少。 睇番香港, 近日電盈(0008.hk)於爭取免費電視頻道傳出不利消息,剩下奇妙電視即有線(0004.hk)及城市電訊(視)與壯大的無線來個三國而立。有線其實係1993年已「有線」, 開台時話投資60億,比城電而家既26億仲多, 點解會攪到而家咁, 唔上唔落呢? 相信最大原因係佢錯信左香港有質素既客戶。話說係開台之初, 有線話要吸引70萬個比得起錢, 想睇唔同野既有質素客戶。另外會播出迎合社會上一小撮人的節目, 做到免費廣播公司做唔到既野。呢班有質素既客戶最後去左買翻版解碼器都唔裝佢。到有線在2009年轉到數碼輸出, 解決老番問題, 班客已經番唔到轉頭, 正所謂慣左唔比錢就唔比錢了…公司無錢番就無錢攪好製作, 無好製作自然就難搵人拍, 無適當既人拍自然就無人睇, 惡性循環。   講開搵人,有線開台早年已誠邀資深傳媒人徐小明入主, 修補老細吳天海於製作執行上之不足。徐至今在有線拍過20多套電影, 在2009年初被削權, 2009年尾離職。於演藝界工作人脈至為重要, 如果唔係o的經理人都唔會發成咁…其實該公司於管理上絕對有問題, 你係網上google打「有線」佢suggest既關鍵字係「有線 投訴」、「cut 有線」等。有線既「取消寬頻服務」亦廣為香港人所詬病。筆者有朋友於有線Customer Service做過, 佢係會明知電話響都唔聽你電話既。   講到呢度你可能會怪吳天海, 不過有線最大既優勢亦在於佢。吳天海係九倉任副執董, 手上項目之多令有線被放埋一邊不足為奇。但吳生可以於有線出事時可即時輸送九倉(0004.hk)既血比佢, 令有線就好似三國之中既東吳咁, 有漁米之鄉亦有寬長的海岸線。

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室