【莫家強】未來幾日既美股部署

簡單講講,我未來幾日既美股部署。 第一,我會睇實邊啲股票最快再創新高。 過去幾日,好多股票都跌咗落嚟。但上堂教過,跌市,其實先係揀股票最好既時間。 留意住有邊啲股票,可以好快咁升返穿呢兩個星期既高位。呢啲,隨時係之後一個大市升浪中,能夠領頭上升既股票。 第二,喺破頂股票中,再做基本因素研究。 我唔會信哂圖表。 圖表可以信七成。睇得用圖表,係可以幫助到好多,但係,亦都唔可以信哂圖表。因為,始終一隻股票既升跌,最後都係要取決於間公司既盈利增長前景。 但做基本分析,你唔會有能力分析到幾百隻股票以上。 一係,你有個團隊,可以分工合作。再唔係,你就要用一啲方法,將個watchlist收窄至幾十隻股票以內,再逐隻研究。用圖表加電腦,呢度就可以幫到手。 所以,有好多朋友都會問我對唔同股票既睇法,但如果我睇完幅股票圖之後,發覺隻股票都無乜長線升值既能力,恕我就唔會太花時間去研究。 我寧願花時間喺一啲有能力上升既股票身上。 好多年前,有位股壇前輩同我講過,你做得呢行,就要每隻股票都識。 「唔通上電視,主持人問你隻股票點睇,你答唔識喇喎?」 但我到今日,都唔係好同意佢既講法。賺錢,唔係鬥識股票多,而係你會唔會揾到,真係值得投資既股票喺邊度?識股票,唔係要多,而係要精。 總之,未來幾日,就睇實既股票既表現啦。好多隻股票,現時都已經係「叫緊糊」。特別係,一啲基本因素靚,而又已經橫行咗幾個月既股票,只要一克服埋頂位既阻力,係好值得追。 有特別發現,再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】有機會出現大調整既市況

我自己,對於有機會出現大調整既市況,會好小心。 但要注意,唔係話到調整出現,先要小心。而係「有跡象」既時候,已經要開始做嘢。 好喇,噚晚美股尾市都算做得唔錯,但始終,投資風險係增加咗,表現唔係咁好既股票,我都會建議減一減貨。 我話走1/3蘋果,有朋友問:「如果走錯咗,咁點算?」 非常好既問題。 答案亦好簡單。只要你set啲好極端既情況落去,答案就顯然而見。 例如:假設,蘋果股價喺短期內大升,由$258直上$500,咁會點? 仍會大賺。只不過係,比起無沽貨賺少咗囉。 又假設,蘋果股價唔單止唔升,仲大插至$150以下,咁又會點? 唔走貨,輸死啦。 走錯咗,最多賺少咗;唔走貨,會輸死人,邊樣嚴重啲? 我仲清楚記得,08年、11年、13年嗰幾次,我自己輸得有幾慘。特別係頭兩次,係輸到麻木,輸到無感覺,輸到覺得「財散人安樂」,係恐怖成咁。 咁多年後,其實個記憶仲係好深刻。所以,我話俾自己知,我唔會再俾自己喺股災輸大錢。 不過又咁講,美股既情況,又未去到咁嚴重。只不過,喺未出現狀況之前,先嚇一嚇大家,將來可以令你走貨走得更果斷。 >>>>>>>>>>>>>>>>>>>>>>> 噚日個post都講咗,其實好多股票,都表現得好硬淨。 MSFT,最後只跌0.16%,跌幅微不足道。V、MA、ADBE、SPGI、CME甚至仲有得升。咁多股票能夠逆市上升,個市真係唔似有大問題。 V、MA兩隻,將近再破頂,呢啲股教過大家點買,自己睇位喇。 美股,審慎地睇好啦。呢兩日如果能夠企穩再上,以上幾隻股又能夠破位,可追。但相反,市況再度轉差,唔單止唔追貨,原有持倉都要再減。 總之,記住順勢而行。 至於港股,恒指跌得唔多,但升跌股票比例肉酸到不堪。執筆之時,只有388隻股票上升,但就有1005隻股票下跌,當然都包括23、390。 造淡,又係自己揾機會啦。 今個星期六,股票班正式開班。希望可以令大家一齊做好部署,2020年賺大錢。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】美股執筆之時,道指跌近350點

美股大跌,少少update。 執筆之時,道指跌近350點,係連續第二日出現較大跌幅。大市風險明顯增加,幾隻經常提及既股票,講講點做。 蘋果,現跌2.32%,報258.04,我會建議,減1/3貨。如果係240蚊樓下已經買貨既朋友,減貨後,基本上已可肯定封蝕本門。呢隻股,中長線仍然睇好,但假如短期市況太差,都無辨法唔走。餘下2/3持貨,睇多日再update。 Microsoft,跌幅較細,現報148.02,只跌1.02%。對於能夠企穩既股票,信心我會較大,暫不用減貨,明日再視乎市況決定去留。 Nextera屬於公用股,所以今日仍能上升。節目講過,組合如有優質公用股,係可以好有效減低風險。再者,就算最後個市真係要步入股災,呢啲靚既公用股,通常都會比個市遲起碼一兩個月先跌,到時,大把時間走。暫時,可以繼續keep。 Sony,繼續升。呢隻,唔係好關中美貿易戰事,影響較細。但無論如何,逆市能夠上升既靚股,我都會建議繼續keep。 AMT,做5G基建,節目都有同大家講,中美關係愈差,佢就愈升。短期會睇好,但風險唔細,因只要中美傾得掂數,佢就有機會落,要自己衡量風險。 其餘股票,如果有揸,普遍都係跌2%以內,跌幅都唔算太大。如果貨多,都建議先走1/3。 不過,同時間,都可以睇吓一啲今日表現唔差既股票。 暫時,CME、NDAQ、SPGI都有得升,V、MA、GOOG都只係好輕微下跌,如市況轉好後,呢啲股票既表現繼續對辦,將有機會成為下一浪升勢既火車頭。 今日唔會買貨住,但呢啲股,值得睇實。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】因為個市唔再係升市

上堂嗰陣我都分享過,初初玩投資嗰幾年,我既成績相當理想。 當然,係有啲技巧既。但最重要係另外兩個因素:第一,後生,唔識死,敢訓身;第二,個市根本就一直都係大漲小回,一啲都唔難玩。 無架,總之就係一路買升,見調整就加注,加上自己揀股又唔差,最後總算叫做贏到人生第一桶金,唔算好多,但都有七位數字。 不過,2008年,輸清光啦。 而最大件事係,之後重投股市,我突然發覺好多之前一直好work,賺過大錢既方法,幾乎係完全失靈。 點解會失靈? 當時我其實都唔知點解。但過咗咁多年,我可以好簡單咁話俾你知,就係因為個市唔再係升市。 大家睇返咁幅恒指走勢圖就會明白,喺過去8年,除咗話喺2016-17年個市叫得係做升市之外,其餘年份都只係浮浮沉沉。 喺呢度,我想同大家分享一個好重要,有關投資賺錢既道理。 ***** 如果個市要你估升跌,賺錢就會變得困難。 ***** 一個容易賺錢既市,應該係你根本唔使估升跌,例如係2003至07年既港股,以及近十年既美股,by default,個市就係會升。 我哋要做既,就只係要睇住,萬一跌穿咩位就要走一走貨,同埋識得點樣揀啲好股票,咁就已經OK。 早幾個月,已經開始玩美股既朋友,應該好清楚感受到呢樣嘢。當你揾啱個市,揀啱股票,賺錢就係好容易既事。如果再識得一啲期權方法的話,贏面就會更高。 噚晚美股出現咗叫做較大既跌幅,道指跌咗0.96%,標普500指數跌咗0.86%,有朋友問要點做。 我既做法好簡單。通常美股既指數,如果有一日跌深咗,只要第二日就能夠企穩,後市通常就無問題。留意住今晚個市,指數唔使升得多,只要有得微升,我就已經收貨,啲股繼續揸就可以。 但如果今晚個市仲係麻麻,貨多既朋友,可以走1/3貨,等個市企穩後先再追返。 不過,中長線而言,我仍然係十分睇好美股。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】恒指雖然反彈,但東亞(0023)卻再次破底

今日,恒指雖然反彈,但東亞(0023)卻再次破底。 睇開呢度既朋友,肯定都知道,我係長期睇淡東亞。原因,係我根本就睇唔到,佢究竟做咗啲咩,去逆轉佢正在惡化既業務,同公司狀況。 當然,我成日都話,喺香港既股市入面,東亞都未算最差,只不過,有好多差過佢既股票,係無理想既投資工具造淡。 例如,翠華(1314),前景肯定比東亞仲差。你睇佢既股價,由2013年尾開始跌,已經跌足6年。之前都講過,如果呢隻有期權,而開價又開得好既話,攞嚟造淡就真係perfect。 但用恒指造淡又得唔得? 唔係咁好。只要你睇下三者既股票圖,就會明白。 東亞,穩步下跌。翠華,穩步下跌。但恒指,走勢我只會形容為「亂七八糟」,而並非真係好淡。 而重點係,前兩者,你可以好容易就預測得到佢哋既股價前景。至於恒指,要估半年後會點,唔係咁易。 永遠都係,玩有趨勢既嘢,順勢而行,賺錢會最容易。 至於睇升,大股之中,我會繼續睇好兩隻美國大股蘋果同Microsoft。呢兩隻股,從基本面去睇,前景非常亮麗。至於股價走勢,亦都好靚,根本無特別事發生,佢哋既股價就會by default 繼續上升。 所以買呢啲股票,賺錢既竅門就係,「無特別事發生」就繼續揸啦。過一段時間,你就會發覺,回報其實相當理想。 >>>>>>>>>>>>>>>>>>>>>>>>>>>>>>>>>>> 揾東亞、翠華,同蘋果、Microsoft比較,就係要同大家講一個道理。衰既股票,幾平都唔好買,你寧願買返啲「看似好貴」,但質素好,有前景既公司,咁樣,你先會賺到錢。 如果你既投資回報一直唔理想,試吓改返啱啲投資觀念,表現就必有改善。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】有朋友問小米點睇?

有朋友問小米點睇? 呢隻股,生意做得好唔好,都係其次。因為,就算佢生意做得好,你諗住佢既股價就會上升?Sorry,你可能諗多咗。 就算一間公司有錢賺,佢既管理層,要唔想同投資者分享利益,有好多方法。最肉酸既,就係運用財技,自己分錢畀自己。無咁明顯既,例如只要佢喺一啲業務上,自己「揾人」做返supplier,收貴自己,咁啲利潤就好容易可以去到自己想去既地方。 講返小米,公司做到成績,分花紅畀員工,唔係壞事。但你喺隻股票跌成咁既時侯,仲分錢,就唔係太講得通。仲要係,收錢既主要只係特定既380個員工,合共分咗1.63億人民幣,咁既做法,我就得覺得真係相當肉酸。 要避開呢啲股票,畀兩個方向大家留意。第一,睇派息。 派息係對投資者最實在既回報,因為呢啲錢真係真金白銀派入投資者既袋。一隻長期做到穩定派息既股票,古惑嘢會少好多。 第二,長期股價走勢。一隻好股票,係唔會長期下跌。同樣地,一隻長期下跌既股票,都好少係好股票。 特別係,喺現今資訊咁發達既時代,你要博佢係「滄海遺珠」,無人知佢好,得你知佢好,機會唔大。 正正經經買一啲生意做得好,管理層有誠信,股價又長期向上既股票,賺錢會容易好多。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。      

Read more

【莫家強】企後一步,睇返件事

咁講真,我明白,好多朋友都會覺得揸蘋果、Microsoft「回報好慢」。比著舊陣時既我,都會咁諗。 不過,有啲時候,我哋都真係要識得跳出嚟,企後一步,睇返件事。 你嫌回報慢,但你又係咪真係賺得比我多先? 當然,一定會有人賺得比我多。但唔會係多數人囉。大部份玩港股既投資者,唔好話要鬥賺得多,過去半年,真係唔使輸都已經偷笑。咁講真,大家睇吓幅恒指既走勢圖,就會明白,過去半年,恒指既走勢根本上就係亂七八糟。你仲話要估佢升跌?點估? >>>>>>>>>>>>>>>>>>>>>>>>>>>>>>>>>>>>>>>>> 早前都有朋友問我:「點解見你好似已經淨係玩美股?」 好簡單,我同大家一樣,都係睇住回報做人。邊度賺到錢,就玩邊度。你見我玩美股,好似好容易。講真,真係唔難,當你識得個方法,花一啲時間去做功課,回報就自然唔錯。 玩港股,我都有玩少少,因為點都要keep住個感覺,但我想講,真係完全係兩回事。 比較易玩,咪東亞、中鐵嗰啲囉。不過,唔係買,而係用嚟造淡。兩隻股票,照睇,好快又會再破底。 >>>>>>>>>>>>>>>>>>>>>>>>>>>>>>>>>>>>>>>>> 上堂時,耐唔耐都會有朋友同我講:「美股我未玩過喎,唔識玩。」 我真係會好直咁講,唔識玩,咪學囉。 最重要係,美國好多股票,質素真係比港股好好多。幾年後,你係可以睇到間公司可以發展成點。 淨係講蘋果,當5G開始盛行,你會預計到佢真係會變成你生活既一部份。打機、睇戲、聽音樂、揸車、開會、開燈、開冷氣、食飯畀錢,樣樣佢都賺到你錢。 當你能夠揾到十隻呢啲前景亮麗既股票,適當地分散投資,再萬一出現股災,你又識避既話,點會唔贏? 我既投資就係咁簡單,由揀好股票開始,再做好個投資策略。今年玩美股既成績唔錯,明年,我相信會更好。 美股既睇法,我之前都分享過。如果同我睇法相同既,咁就真係要認真諗吓,呢個牛三最後階段,要點樣去部署策略。 最後,講座報咗名既朋友,聽日見。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】回報梗係做得唔靚

喺我認識既朋友當中,好多時,大家面對既最大問題,並非話唔知要買咩股票。 事實上,你上網,只要你識得揾啲真係有質素既分析員,佢哋就會話到畀你知,有邊啲股票應該買,邊啲股票唔應該買。 但咁最大問題係咩? 係有啲朋友捉到鹿都唔識脫角。 明明已經揀中隻好股票,但最後就只係賺得雞碎咁多。咁樣,回報梗係做得唔靚。 >>>>>>>>>>>>>>>>>>>>>>>>>>>>>>>>>>> 有朋友都同我講過,睇你網頁,好似成日都淨係講嗰幾隻股票。 係架。因為,我相信咁樣先係最容易,能夠令大家可以賺到錢。 例如係之前既Visa、Mastercard,依家既蘋果、Microsoft,呢啲都係一啲我最睇好,而又好穩陣既股票。 Visa、Mastercard,我知有唔少朋友都跟咗我買,而且仲係揸咗幾個月以上。買過既就會記得,我當時都係不斷同大家講,「隻股票升,就要繼續揸」。 有跟住玩既朋友,嗰次都賺得相當唔錯。 其實蘋果、Microsoft都係,跟住玩既朋友,我相信下年我哋會有好大機會,可以再次賺到好理想既回報。 我買股票既理念其實好簡單,我相信,只要你買到一隻好股票,之後你真係無必要再轉嚟轉去。總之隻股票一路升,你就一路持有,咁你既回報就已經會好好。 而且,呢種玩法既另一好處,就係所有參與者,都可以一齊贏錢。因為,呢個已經唔係一個「零和」既遊戲,係一個可以俾所有人一齊贏錢既真正投資方法。 >>>>>>>>>>>>>>>>>>>>>>>>>>>>>>>>>> 下年,我睇美股會升得好勁,升完,就有機會變為熊市。 應落好似好驚? 但有聽過我詳細分析既朋友,就應該會知道點解我就話:「更加要睇升。」 堂上,我會同大家分享我既部署方法。 熊市,其實唔難避。 要避開熊市,今日起你要做到一樣嘢,就係要避免將來會出現一種fear of missing out既感覺。即係話,個市升到高位既時候,你先覺得自己賺得太少。 低位一路無貨,高位先覺得自己賺得少既人,係最容易會喺熊市輸大錢。 相反,一路升,一路都賺得唔錯既朋友,到時你只要肯係高位回落時收割,熊市蝕大錢既風險就會大減。 星期六既講座,我會再講多啲。報咗名既朋友,到時見。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】有無朋友揾過你夾錢做生意?

我唔知大家有無朋友揾過你夾錢做生意? 有的話,你考慮是否應承,會因為乜嘢因素? 會唔會諗你朋友係咪信得過?會唔會睇佢過往做生意既往績?會唔會真係睇吓盤生意有無得做? 樣樣都無問題,咪夾囉,夾多少少都無問題。 但係,如果個朋友都唔係好信得過,盤生意你又睇唔通,你又會唔會夾錢先? 問題就係咁。如果你係用「夾份做生意」既心態去投資股票,其實好自然,你就會有個心去揀好既股票嚟買。 識唔識揀,係另一回事,但起碼你會嘗試去揀啲好既股票。 但偏偏,香港咁多年來既投資教育,就係刻意將呢啲股票模糊成為一啲「冧把」,扭曲哂大家既投資概念。 升既股票,就話貴,唔好買,叫你去買啲跌既股票。一隻衰既股票,跌價一成,就會有專家同你講「價值顯現」,叫你去買。最衰,甚至係有啲明顯係呃人既公司,只要包裝得好,都會有人願意成幅身家買落去。 呢啲遊戲,拆穿,就係少數人做出嚟,想贏大家錢既玩意。你係高手,贏到錢,無問題,你咪去玩囉。但大部份投資者,如果你唔自覺被人帶咗入呢啲遊戲裡面,長遠,其實你會輸多贏少。 想賺錢容易,就要買返一啲好既股票,將自己帶返入一個可以全部人一齊贏錢既遊戲。 對於班上既同學,我既建議好簡單,分散買入3至8隻好既股票,長線贏面就會好高。風險得到分散,你亦會揸得好舒服。只要呢啲公司繼續可以賺到錢,你作為投資者,就可以分享到利潤。賺錢,就係咁簡單。 如果你之前既投資成績一直都唔好,係時候要諗吓,你既投資出現咗啲咩問題。 最後,美股我一直都話,將會出現牛三最後升浪,2020年,我相信個市好大機會係會升到癲哂,但升完就無架喇。如果你睇法相同既話,呢個機會,就要諗吓可以點樣把握。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】蘋果、Microsoft,繼續走強

蘋果、Microsoft,繼續走強。另外,上星期如果有攞文章,你會睇到隻Adobe,呢隻股既走勢都好靚,近期升勢基本上無停步,一直咁升。 講講Adobe。 大家對佢最熟識既產品,可能係Adobe Acrobat,即係睇pdf既程式,又或者係Photoshop。但除此之外,佢哋既製作影片軟片 Adobe Premiere Pro,好多商業級既製作都會用到。 Adobe,可以講,係喺佢既範疇入面,一間好top 既軟件公司。 但點解我會鍾意呢隻股票。其中一個主因,係佢有好多既軟件,你係唔可以買斷,你要用,就要最個月或者每年keep 住畀錢。 你可能會諗,咁有咩咁緊要? 上堂教過,一間公司,點樣收錢,係可以決定佢既存亡,或者係盈利增長既前景。 你諗吓就會明白。如果佢既軟件,係可以畀一次錢,就用一世,咁佢今年收咗你錢之後,下年賺咩?佢咪要每年都繼續sell你,不斷推出啲update,希望你會轉用新既版本。但係,你會唔會咁易轉先? 仲有,要做呢啲跑數式既sales,又或者marketing,其實好貴。就算賣到貨,支出都好大,會影響公司利潤。 但假如,佢已經令你autopay,每月或每年定期畀錢佢,情況就會唔同。 基本上,佢已經唔使再sell你,只要佢繼續做好售後支援,你用得開心,就會繼續畀錢。維持舊客,永遠都比揾新客花費更少,呢個係做生意既金科玉律。 唔使再成日煩揾新客,只要做好自己,客戶基礎就會好自然地不斷增長,咁公司既經營前景,就會更平坦、亮麗。一隻股票,股價能夠長久平穩上升,唔係無原因。 事實上,我自己都係,會好主力投資喺呢啲公司身上。你都識揾呢啲股票既話,中長線而言,佢哋會為你帶嚟好好既回報。 投資股票,賺錢其實唔難,只要你識得分辨邊啲係有前景既公司。 提一提大家,上星期既講座,改咗去今晚,我會講更多買美股投資既重點。報咗名既朋友,今晚見。 另外,星期六有加場,今年最後一次,有興趣可於以下連結報名。    

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室