【莫家強】呢一刻,上升既股票500隻都

先講港股。 升跌股票比例繼續肉酸。呢一刻,上升既股票500隻都無,但下跌股票卻有近千隻。大戶既意圖,非常明顯。 對於港股,中長線嚟講,我真係唔會樂觀。過去幾次都係,短線挾咗上嚟,無耐就會開始行橫行市嚟散貨,散夠,就突然急跌。 唔知散貨要散幾耐,但只要個市升勢不再,港股就再無睇升既值博率。最簡單既分法,就係每隔兩三日,只要個市唔升,就減少少貨,直接減哂為止。 照睇情況,如東亞呢啲弱勢股,再穿底既日子未必太遠。弱勢股,如期權開價OK,你又識點做的話,不妨部署吓淡倉。 >>>>>>>>>>>>>>>>>>>>>>>>>>>>>>>>>>>>> 至於美股,Trump Trump 被彈劾,對股市差不多全無影響。咁梗係啦,大家都知過唔到,叫做「做場戲」 但亦都咁講,亦顯示美股都仲好穩陣。大家都明,如果大戶想個市跌,就求其一原因,都可以令個市向下炒。但以美股既反應,可以睇到大戶無將個市向下炒既意圖。 反而,留意住年尾股市會否有window dressing挾高股價。喺一個破哂頂既股市中,絕對有機會出現呢樣嘢,因為佢真係關乎啲金融從業員既bonus。 >>>>>>>>>>>>>>>>>>>>>>>>>>>>>>>>>>>>>>>>>> 另外,今日聽到有專家話,美股估值高,資金有機會從美股流至其他股市。真係會咩? 美股估值,一定唔算平,呢樣毫無疑問。牛市三期,咁梗係估值唔平啦,但咁樣,唔代表個市就唔會升。 牛市三期,有兩個好重要既元素,第一,投資者要有錢。第二,投資者要對個股市有信心。美股投資者,兩樣都有,可想而知,好既股票,估值一定無可能太平。 但算唔算好貴,去到泡沫級數呢?咁就有排都未到啦。2020年,我講過,就係要買泡沫形成,然後,當個市由高位回落,就食糊唔玩。咁樣,你避到股災既機會最大。 其實好簡單,我當蘋果真係升到去400蚊以上,然後唔對路地回跌至380蚊,你肯走就走到架喇。一隻好股票,走勢轉差,係好易被察覺。但如果你走去買啲持續下跌既衰股,你先係最難走,風險先最高。我舊時,就係俾呢啲成日叫你買「估值低」股票既言論害得好慘。 所以,我先不斷叫大家,唔好走去買啲估值低既股票,而係去買啲好既股票,將你呢錢交俾一啲有能力同有誠信既人,幫你打理。最起碼,蘋果同Microsoft既管理層,係唔會謀咗你啲錢。好多估值低、質素差既公司既管理層,就好難講。 仲有,資金唔係一個實數。當股市好、經濟好,資金會被倍大。相反,股市差、經濟差,整個資金規模係會縮小。 如果到時美股出現冧市、股災,真係會有資金流入落後市場?唔會囉。 唔好再對落後市場有憧憬喇。反而,專注揸好既股票,到高位回落時,穿咗個止賺位你就肯走哂佢,咁你就唔會怕股災。 不經不覺,又寫到成千字。 最後,多謝大家支持。美股期權免費教學已經有450+朋友參加,有興趣既朋友,請喺星期六晚前加入,之後我就轉返做私人群組,下星期一會開始教學。 呢個專頁既置頂post有連結。學好方法,希望2020年,一齊大賺。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】恒指今日表現無力

  先講港股。 升咗咁多日,恒指今日表現無力。但我認為更加值得大家留意既係,恒指其實無乜點跌,但上升下跌股票既比例就超級肉酸。 恒指,半日只跌21點,基本上只可叫做打平,唔算直係跌,但上升股票只有518隻,下跌股票就有915隻,明顯好多股票跌。大戶托高完指數,派弱勢股出街既意圖,非常明顯。 唔好買落後股,呢個係我一直俾大家既建議。 至於指數,未必表現太差。因為,如果大戶想一路派貨,佢會一直托住指數,而我哋就會見到,日日指數都唔係點跌,但下跌股票數目就日日高企。 而呢樣嘢,亦都形成咗之前好幾次,指數一升到高位就橫行。 指數既策略,跟返之前講既一樣,每三日個指數唔係點升,就減一減貨,慢慢減,直至減哂為止。指數唔再係挾倉形態,就再無太大既看升空間。 過去幾次就係,橫行咗一排之後,就突然急跌。到時你想走,都未必走得切。 有信心揀到強勢股既,可以繼續玩,但我自己,寧願玩美股。 >>>>>>>>>>>>>>>>>>>>>>>>>>>>>>>>>> 蘋果,已經升到去$280.41。老實講,我都無諗過佢咁強。但總之,有貨既,隻股一路升,就要一路揸。之前我話蘋果明年有機會升到上400蚊以上,如果美股真係出現牛三最後升浪,呢個估算可能都保守咗。 不過,點都好,我無水晶球,低位已經跟住揸蘋果既朋友,一早都已經封哂蝕本門,跟策略做就得喇。市場畀我哋賺幾多,我哋就賺幾多。但要貪心啲,唔好係佢畀你賺,你都賺唔到大錢。 其餘好多股票,都真係好靚。香港既友邦(1299),質素好好。但喺美國,都有唔少好靚既保險金融公司。分散吓投資,絕對無壞。 #件波衫幾靚 #圖文不符? 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】好多專家都掛喺口邊話「環球經濟好差」

今日早少少出post。 大概過半月前,當出面好多專家都掛喺口邊話「環球經濟好差」,我就同你講,其實好多股市都破緊頂。除左美國,日本、台灣、加拿大、德國、法國、比利時、意大利、愛爾蘭、以色列、俄羅斯等等既MSCI 指數,喺上月都曾經創過一年新高。 「股市先行於經濟數據」,近日,我哋終於開始聽到啲專家話,經濟數據有所好轉。 呢個就係問題。如果你係靠睇經濟數據去買賣股票,我話俾你聽下一步會點。 「你有機會喺下一個股災中,輸大錢」。 美股,之前一直都講,將會步入牛三最後升浪,2020年,會升到你唔信。幾個月前我開始講呢樣嘢嗰陣,唔知大家點諗。但今日,呢樣嘢,正在一步一步實驗。 只要你揸啱股票,下年,你會賺到好好既回報。但之後點?美股會出現泡沫,然後爆破。所以,你要識走股票。 唔好再聽新聞炒股票喇。聽新聞炒股票,係「令你變得目光短淺既最佳訓練」。日日分析新聞,你中股災既機會就會增加。 要睇big picture。 如果我既估計準確,下年,我哋將會先再賺一舊大錢。然後,就要睇住一啲泡沫爆破既跡象。有既話,就開始走股票。走完,食完糊,最重要一步,就係頭也不回,暫停玩股票一年。呢啲,到時再講。 >>>>>>>>>>>>>>>>>>>>>>>>> 好喇,最強既兩隻大股,蘋果同Microsoft,繼續揸就可以。 如果倉位,可以再分散少少,就更好。上個月派過一篇文章,講過5隻升勢最穩定既股票,表現都唔錯。 兩隻信用評級股,都繼續睇好,希望升勢未來可以加速。 仲有好多我叫「C餐」既股票,同學都可以博下。 總之記住一樣嘢,唔好怕追強勢股。只要隻股轉勢時,你有策略去走,就唔會有危險。相反,買落後衰股,仲危險得多。 都係未理解到既話,問自己一條問題。做蘋果定TVB既股東,邊樣先係危險啲? 今年,喺美股既表現相當滿意。明年,若然真係估中行牛三最後升浪,就只會更好。大家,要做好準備,去把握呢個機會喇。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】好慣常係急升、橫得、急跌

港股,策略上星期都講咗,假如見大市升幅減弱,就逐步減倉啦。每三個交易日,如果見個市都唔係好升得起,就沽啲貨,慢慢沽,真至沽清為止。 講指數,過去大半年,好慣常係急升、橫得、急跌。 所以,如果個市繼續升,啲貨可以繼續揸。但係,一變成係橫行或窄幅上落走勢,走吓貨絕無壞。 中美貿易戰,大家都明白,唔會咁快打完。中美既貿易爭拗,係一定會一直持續落去。如果因為呢兩日既升市,就諗到港股可以徹底轉跌為升,咁可能真係有啲天真。 >>>>>>>>>>>>>>>>>>>>>>>>>> 另外,真係唔好再買落後股喇。今日,港股既下跌股票數目,又再多返。好多弱勢股,都再度下跌。 我明白,啲升既股票,大家可能會覺得股價貴,未必敢買。但點都好,真係唔好因為咁而走去買落後股。因為,呢啲股價長期下跌既股票,背後好多時都係一啲完全無前景既公司 例如係,TVB。 上堂講過,我非常睇淡TVB既前景。今日簡單講講。 睇TVB呢隻股票,可以用2013年為界。2013年前,TVB係一間非常唔錯既公司。2013年後,持續崩壞。 記住一個特點,TVB係營運緊一門好燒錢既生意。生意好嗰陣,當然無問題,但生意一差,兩個情況會出現。第一,會死得好快;第二,一錯過咗某個時機,就好難再救。 TVB,以往賴以成功,係佢既壟斷優勢。但睇有無壟斷,記住,唔可以就咁睇市場份額,係要睇佢既效果。大家可以用以下呢句說話去分辨:「如果佢做得差,係咪啲客戶仲要畀錢你賺?」 TVB既客戶,從來都唔係觀眾,而係要落廣告既公司。所以條問題可以咁問:「如果TVB做得差,係咪啲公司仲要喺TVB落廣告?」 好多年前係,但近年已經唔係。我可以講,TVB既壟斷優勢已經所剩無幾,以佢咁燒錢既營運模式去睇,我相信已神仙難救。 「咁隻股票已經跌咗咁多,會唔會已經抵買?」 我諗當你睇完佢幅股票圖,見到佢既股價跌足6年,呢條問題你應該都知答案。 >>>>>>>>>>>>>>>>>>>>>>>>>> 衰既公司,只要盤生意一直營運得衰差,咁佢既股價要跌幾多,跌幾耐都得。同樣地,好既公司,只要盤生意一直營運得好,佢既股價亦都係要升幾多,升幾耐都得。 既然講開壟斷,又講下Microsoft。 淨係一樣嘢,就算你唔鍾意Microsoft,你又可唔可以真係完全唔用Microsoft既產品?你買電腦,同埋你公司部電腦,又可唔可人完全避哂用Microsoft? 無幾多人得喇掛。呢啲,就係壟斷優勢。 你睇隻Microsoft既股價,繼續破緊頂。如無意外,仲有排升,揸住既,繼續揸就可以。 總之,買返啲好既股票,你賺錢會容易好多。 最後,今晚期權課堂既免費介紹班,會講下年我哋啲期權要點樣部署。留意返以下地址,報咗名既朋友,今晚見。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】升咗上嚟,下一步點做

今日集中講吓,升咗上嚟,下一步點做。 先講港股。 噚日講咗,恒指阻力位喺27800點水平左右。如嚟緊無特別壞既消息傳出,恒指有機會升至呢個水平。但要企穩,兼突破,好睇去到嗰個位置後,成交能否繼續增加。到時再update。 另外,都係噚日所講,港股今年好興行一個pattern,就係趁好消息急升,然後挾到高位就橫行,再過一段時間,就跌返落嚟。 好喇,咁策略點做? 繼續升,就繼續睇好。但如果見到個升勢開始減弱,其實再睇升就已經無乜值博率,好倉可以逐步落車。每隔3個交易日,個市都唔係點升,就減少少貨,直至減哂為止。 另外,真係唔好追落後。 今早,恒指升成咁,都仲有612隻股票要跌,933隻股票無升跌。呢啲股票當中,如果有啲係之前升得好好,今日只係稍為整固,咁問題都不大。 但如果係之前一路都處於弱勢,而去到今日都仲升唔起既股票,你仲應該對佢抱有期望嗎? 若有專家叫你買呢啲落後股,買之前,真係要諗清楚。 >>>>>>>>>>>>>>>>>>>>>>>>>>>>>>>>>>>>> 至於美股,開始多咗評論擔心,個市升咗咁多,開始有評論擔心,後市升幅會有限。 其實呢樣嘢呢幾個月都開始發生緊,好多之前好強勢既股票,喺7月後都已經無得點升。只係有個別強勢既期權股帶動住,個指數先仲係升得咁好。 但呢個,正正係牛市三期趨近尾段既正常情況。 一啲大戶認為質素無咁好,又或者,到時無容易甩到身既股票,去到牛市尾段,一般都唔會點跟升。相反,一啲強勢既股票,就會「升到你唔信」,直至最尾,泡沫爆破,個市就玩完。 同樣情況,2016-17年,喺港股都出現過。嗰兩年,例如啲騰訊、吉利、瑞聲都升到癲哂,但如果你走去買中移動、利豐、TVB,咁成個升市就唔關你事。 後尾嗰幾隻股票,一路股價都無升過,但唔代表你買咗佢就會賺錢。如果個市有勢,始終都係,買強勢股先係賺錢法門。只要,當啲強勢股走勢轉弱,而你識落車,咁就無問題。 最後,下星期一既講座,地址改咗去「尖沙咀柯士甸路22-26號好兆年行603室」,敬請注意。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】資金湧入既情況,可以維持幾耐

今日,港股咁勁,先講港股。 第一樣要留意既,就係成交。今早,大市成交有486億元,喺近期嚟講,係超高。同早兩日比較,當時港股朝早成交只有279億元,爭一大截。加上今日港匯轉強,非常明顯地,係有資金湧入,挾高港股。 好喇,要考慮既問題就係,呢個資金湧入既情況,可以維持幾耐? 當然,要假設中美談判唔會出現問題。底線,係起碼要繼續有得傾。但呢樣嘢,邊有得估,所以要做定風險管理。一陣講。 如果今個weekend 無事,今年好興既一個形態,就係挾上高位,就橫行。所以就係,繼續升,可以繼續博,到橫行出現,看升唔上,就逐步落車。 至於淡倉,暫時恒指強勢,就唔好做住喇。等升到高位,大市無力再上,又會係另一個入市機會。 畀多個阻力大家參考。恒指既較大阻力位大概喺27800點左右。如無乜壞消息出現,有機會反彈到呢個位。但要突破再上,就真係要keep住大成交先得。 >>>>>>>>>>>>>>>>>>>>>>>>>>>>>>> 至於美股,繼續睇好。 大股之中,Apple、Microsoft、S&P Global等都係我比較睇好。 呢三隻股票,各有長線上升既條件,而且係基本因素好穩健既股票,只要股價無乜太異常既表現,長期揸住就會賺到錢。 至於Visa 同Mastercard,其實走勢都正在轉強。兩隻股票,由7月起到依家,都無乜點樣升過。但只要再現上升動力,又有可能一升就升幾個月以上。始終,呢兩隻都係好靚既股票,值得留意住。 >>>>>>>>>>>>>>>>>>>>>>>>>>>>> 最後,兩邊股市都係,要博大升,可以博Long Call。 Long Call,係一個有機會可以賺到大錢既策略,而且,如果你識得玩既話,又並非大家想像中咁高風險。 趕緊篇文,會教大家幾個關於Long Call既口訣,背咗呢幾句口訣之後,你就會更加知道Long Call 可以點樣去博。 今日稍後時間,留意呢度索取文章既公佈。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。    

Read more

【莫家強】今年,我叫咗好多身邊既朋友轉玩美股

今年,我叫咗好多身邊既朋友轉玩美股。 而其中一個令我深刻既feedback,係一位朋友同我講:「美股比港股正氣好多。」 咩叫做正氣? 就係只要你肯做功課,揾一啲好既公司出嚟,buy and hold,你就已經會賺到錢。根本上,你就唔使攪咁多嘢。只要間公司繼續做好本份,有錢賺,佢就會好公正咁分返畀你。根本,投資股票,本身就應該係咁。 相對而言,喺香港,幾年前已經有人講buy and hold 策略已不可行,長線持有股票再唔係賺錢法門。 我想講,唔係buy and hold 不可行,而係普遍港股,唔再適合長期持有。 林少陽先生喺2018年有篇專欄,我覺得寫得好好。而結尾,其中有一段係咁寫: 「Buy & Hold的策略亦不是已死,只是近年港股值得長線持倉的股份數量太少,令包括筆者在內的不少行家,都要在海外市場找機會。今年已超額完成的醫護及教育行業股份,下半年是否繼續領放,我當然不知道最後答案。不過,醫護行業是少數值得中長線買入並持有的股份。如果只因股價短暫升得過快而沽貨,這種殺雞取卵的手法,反而令我懷疑是否真正的價值投資。」 https://hk.finance.appledaily.com/…/artic…/20180605/58276906 我仍然相信有好股票,你仍然係要長期持有,先會賺到理想既回報。但你真係要識得分邊啲係好股票。如果香港無,你亦可以去外國揾,喺美國股市有好多。 蘋果、Microsoft、S&P Global,通通都係好好既公司。 講講Microsoft。最近我哋同學群組有朋友,約咗Microsoft既員工上公司,去介紹佢套Dynamics 365。我唔係IT人,費事班門弄斧,但朋友覺得,只要佢套system 收得唔貴,未來係會有好多公司相繼轉用。 呢套系統,又係行subscription,即係要每月或每年keep住畀錢先有得用。 Subscription 產品,我成日都話,只要個頭開得好,佢就會變成一隻生金蛋既鵝。之後,你只要繼續「養好佢」,咁佢長線就會幫你賺好多錢。 好喇,買呢啲股票,如果再加上間公司既管理層係有誠信,有呢啲「金蛋」,佢哋係會公正地分畀所有投資者,咁我哋長遠能夠賺錢,就係理所當然既事。 但我成日都講「長遠」呢兩個字,因為就算你隻股票係好,持續盈利增加,但仍然係有機會係6至18個月股價唔上升。 其中一個解決方法,係你可以用期權,喺呢啲時間照樣做到有錢賺。遲吓再講。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】揀啲最強勢既股票嚟玩

玩港股,如果你係識得揀啲最強勢既股票嚟玩,都可以既。 好喇,玩指數,雖然都係無乜力升,但起碼走勢都唔算太差。但有兩樣嘢,真係要小心。第一,追買落後股。第二,玩啲無基本因素支持既細價股。 今日,講一講呢方面港股既情況。 以下既圖,係今早cap 既。當時,恒指都無乜點升跌,但下跌股票數目卻遠超上升股票。上升股票只得520隻,但下跌股票就有891隻。 呢個情況,唔係今日先發生,而係成為咗常態,就算喺升市既日子,好多時都仲係跌既股票多過升。喺呢個市,仲要買落後股,想贏真係唔易。 另一樣嘢,係極多股票係無升跌,今早,就有超過一千隻。而呢啲無升跌既股票,主要係啲市值較細既股票。 正常一隻股票,好少會完全無升跌。呢啲股票,之所以無升跌,係因為佢哋係無「真實」既成交,根本就無投資者去買賣。而當呢啲無升跌既股票,佔整體股票比例超過四成,其實係反映整個香港股市係出現咗好大問題。 特別係啲中細價股,除非你真係識點玩,否則,真係不宜沾手。 至於美股,繼續大漲小回格。 昨日提過既SPGI,自己睇住位做嘢啦。 節目提過,SPGI,即係標普環球,係信用評級公司。呢個行業,全球嚟計,基本上係三間公司玩哂。第大兩間,標普同穆廸,已佔全球市場份額約8成。加埋第三位既歐洲公司惠譽,共佔市場份額約9成半,即係幾乎玩哂。 好多年前,時任中國央行行長周小川,已經「炮轟」呢樣嘢,仲話要發展內地既評級機構。但咁多年嚟,唔好話要同「三大」競爭,就連要打入市場,都有困難。 呢個行業既龍頭,壟斷優勢極穩固。有壟斷,生意就易做,大家睇吓SPGI 同MCO既股價走勢,就會明白。 分散少少啦,之前好多股票都無力,就無辨法。但呢排咁多股票重新發力再上,就無必要買哂蘋果。 蘋果係好股,中長線我相信仲有排升。但都無謂將所有雞蛋放哂喺同一個籃。 但總之,全部雞蛋,你都揀哂係靚雞蛋,長線贏錢既機會就會好高。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】強者愈強、弱者愈弱

股票投資,我自己好相信既係「強者愈強、弱者愈弱」。特別係,我好鍾意買一啲能夠長年上升既股票。 點解? 好簡單。一隻股票,若能夠長年上升,會無原因嗎?如果唔係能夠愈賺愈多錢,股價又會一直上升嗎? 同樣地,一隻股價長年下跌既股票,會有好嘢嗎?真係咁好,股價跌到低位,會無人買? 例如東亞(0023)、利豐(0494)、電視廣播(0511)、翠華(1314),隻隻呢幾年都股價都跌咗好多,但真係值得買嗎? 長期弱勢既股票,好多都有佢哋既問題,唔容易逆轉。經常習慣買弱勢股票既朋友,可能會買到成手都係有問題既公司,其實唔係咁著數。 >>>>>>>>>>>>>>>>>>>>>>>>>>>>>>>>> 相反嚟講,如果你揸既全部都係好公司,只要呢啲公司既可以一路賺到錢,咁我哋就自然可以分享到盈利,賺錢亦會容易好多。 但要記住一點,好公司係唔會無端端平賣俾你。你要買到高既公司,就唔好怕喺稍高既位置去股票。 如果你都係落唔到手,就諗返一句說話「平嘢無好,好嘢無平」,咁你更容易敢落手去買一啲上升緊既股票。 蘋果,股價已破頂,危機解除。減咗倉既朋友,可以伺機分散一下投資。 Microsoft,睇住近日走勢。內地政府下令3年內要所有政府關將所有電腦同軟件轉哂用國貨。呢樣,對Microsoft嚟講,無疑係壞消息。但假如佢既股票仲可以不跌反升,呢隻股票就更加要買。 另外,睇好SPGI同MCO。兩間評級機構,享有非常穩固既壟斷優勢,長遠前景睇好。 >>>>>>>>>>>>>>>>>>>>>>>>>>>>>>>>> 近個月前,我講美股2020年會行牛市最後升浪,可能有啲朋友仲會係半信半疑。但我相信,大家睇到現時美股既走勢,應該會睇到呢樣嘢絕對有機會出現。 下年,絕對係一個好大既機會。識玩期權,潛在回報會更大。 但唔好等到個升勢再變得更「明顯」先準備,部署策略,依家就要開始。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】你首先要知自己想點

今日,講多少少期權策略。 玩期權,特別係對於初學者,我成日都講,你首先要知自己想點。 好簡單,你係想: A) 穩穩定定,每個月賺錢?定係; B) 以小博大,贏咗要贏幾倍,甚至十倍以上回報? 係2揀1。揀好咗,我再教大家點做。 >>>>>>>>>>>>>>>>>>>>>>>>>>>>>>>>> 揀A,你可以專注做一啲有時間值收既策略。好處係,賺錢會「好容易」。 你識得玩既話,甚至可以將贏面推到9成以上,即係話你玩10鋪,會可以贏到9鋪。用呢個玩法,賺錢的確係好容易。 「咁容易賺錢,就無窮人啦?」重點唔係呢度。 玩呢係方法,贏輸既關鍵,係在於第10鋪。你要識得喺呢一鋪入面,唔可以俾自己輸大錢。做到,長遠就會贏。 但做唔到,最嚴重情況,係輸幾多都得。 呢個玩法,係「容易贏,但高風險」。 >>>>>>>>>>>>>>>>>>>>>>>>>>>>>>>>> 揀B,就係我哋成日講嗰啲刀仔剧大樹既方法。好處有兩個。 第一, 有限風險,你擺幾多錢出去,最多就係輸嗰舊錢,唔會再有手尾跟。 第二, 有槓桿,個市行單邊,而你又估中方向的話,要賺幾多倍回報都得。 畀多少少貼士大家。平時係唔容易玩,但一到啲大單邊市出現,實會有啲人發到達。 例如喺2017年,我身邊都有朋友,靠騰訊Long Call賺7位數字。你識博,你敢博,喺出現單邊市既時候,就會有機會賺大錢。回報,幾多倍都有可能。 但壞處係,唔易贏。普通人,係會成日輸錢。但只要你可以贏到一鋪勁,就會夠你輸好多鋪都得。 而最好博,係喺一啲單邊市況。單邊升,單邊跌,都得。 呢個玩法,係「難贏,但風險低」。只要你唔係訓哂身去玩,風險就唔高。 >>>>>>>>>>>>>>>>>>>>>>>>>>>>>>>>>> 聽過我分析既朋友,會知美股我睇下年會行牛三最後既升浪。升得最癲嗰三、四個月,記住,唔好手軟,做Long Call。最好既做法,係「細注、高槓桿」。錯就輸少少,啱就贏多多。呢個,係最能利用到呢個策略好處既玩法。 而喺未到呢個時間之前,大家可以考慮,盡量用一啲高贏面既方法,賺大個本。用贏返嚟既錢,到時再博,心理上會輕鬆好多,贏面都大啲。 另外,蘋果、Microsoft 危機解除。加多隻SPGI,走勢好靚,有多隻股票畀大家分散吓投資,風險都會低啲。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。   風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室