【莫家強】投資要順勢而行

美股好強,呢樣嘢都唔使多講。 投資要順勢而行,要買升既股票,睇得呢個專頁既朋友,基本上都知道應該要咁做。 但我明白,到落盤既時候,見到隻股票之前已經升咗咁多,決定入市既時候,始終硬係會有啲唔自在。 今日,講吓一個可能幫到大家既處理方法。 第一, 隻股票可能本身你預計要買10萬蚊既,照買,但可能就只買3萬幾蚊,即係原本入市金額既1/3。 我唔點樣去解釋,但心態就係咁。如果你一蚊都唔買,當隻股票繼續升上去,你走咗寶,慢慢你就會唔鍾意隻股票,之後你都唔會再買。 但只要你有買少少,佢升上去,你都會開心,仲要加埋嗰種「早知買多啲」既諗法,下次再有入市機會,你自然就會買。 第二, 同時間,你可以喺低位部署Short Put。 即係,你個策略會變成Short Put + 少量股票。 Short Put 既作用,就係等可以一邊賺住時間值,一邊等適合既機會喺低位買貨。詳細行使價、月份點揀,恕我唔會喺度教。但Short Put + 股票的確係一個相當唔錯既策略。 第三,分散投資,唔好買死一隻股票。 分開幾隻股票去買,但就要make sure隻隻都係好股票。適當地分散投資,對我哋散戶投資者嚟講,非常重要。有機會再講。 第四, 股價轉勢,都要識得離場。 一般朋友成日會覺得隻股票「升咗咁多先買」,風險會好大。但我想講,你買升既股票,風險先唔高。 特別係一啲長跌既股票,通常都係一啲質素差既公司,其實仲衰。 而且,升開既股票,一旦轉為跌勢,會相當覺眼,你肯走一定走到。 希望以上既分享,會令大家更加識得點樣去買上升既股票。 美股,波動會有,但我會睇到能夠繼續破頂既可能性好大。揀啱股票,做啱策略,未來幾個月我哋能夠繼續贏錢既可能性好大。 總之,他日個市轉勢,我哋可以察覺得到,識得走人,就唔會有問題。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】成個美股市場有返重回正軌既跡象

昨日既升市,令我最開心既係,成個美股市場有返重回正軌既跡象。 之前沉寂咗幾日既強勢股,絕大部份都已經重拾強勢。當然,其中包括Microsoft。呢隻,應該係繼蘋果之後,最多朋友有揸住既股票,股價現已升至188.70元。 策略,同之前講既一樣,繼續升就要繼續揸,絕對唔好因為佢升得多就覺得佢貴。大家要知道,如果Microsoft 既業績發展理想,喺往後幾年,隨著雲端愈變普及,佢既生意係可以比現時做大好多倍。 至於蘋果,短期升勢的確減弱。呢樣無辨法,喺內地疫情失控既情況下,佢既收入難免會受影響。 我又唔會睇淡佢,但既然升勢減弱,大家不妨慢慢換碼至其他強勢股。 另外,又講一講RingCentral (RNG)。 事先講明,大家唔好直接將RNG 同Microsoft、蘋果比較。 RNG,市值只係17.84B美金,即係大概係千幾億港紙,而蘋果既市值係1.41T美金,即係大概11萬億港紙,size完全係兩回事。 咁size細,有好有唔好。唔好既係,我唔會建議大家訓哂身去買,要計好注碼先入市。但好既係,以中長線而言,如果RNG既業績繼續做得理想,佢既規模要較現時再升10倍,都唔係無可能。 RNG,剛出完業績,勝預期,股價喺場外再升3.71%。 收入,繼續高增長,但我必須講明,呢間公司係仲未做到有穩定盈利。我要畀返個合理期望大家。 當然,向好既方面諗,未有盈利啲股價都已經升得咁勁,他日如能做到有盈利穩定上升,呢隻股會升至去咩價位,我就真係唔知喇。 冒得起風險既朋友,呢隻股票,值得坐。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】真正學識點用MetaStock,起碼要一段時間

有朋友提議我攪一個MetaStock美股分析班,教點樣去寫程式研究股票。 坦白講,成事機會唔大。 因為,首先要真正學識點用MetaStock,起碼要一段時間,仲要你肯花好多心機去實習,先有機會學得識。其次,軟件加每月數據費,其實都唔平,你想知幾錢,可以自己上去metastock.com睇睇。 但當然,你問我MetaStock有無用,我會話畀你聽「超有用」。 好直接講,我一直揀出嚟嗰啲股票嘅表現,大家應該都睇到。再者,上年喺好多專家都話美股估值已經過高,應該要沽貨嘅時候,我就同大家講啲強勢股要繼續揸,因為我見到全世界好多地方嘅股市都破緊頂,啲資金係一直湧緊入去全球唔同股市。 到依家過咗幾個月,有繼續揸住呢啲股票嘅朋友,相信都賺到唔錯嘅回報。 如果你真係可以識得運用電腦程式,去幫你睇哂環球股市發生嘅事,我可以好肯定同你講,你對於一般投資者而言,將會擁有極大嘅優勢。 MetaStock美股分析班,我暫時就唔會考慮攪㗎喇。但如果換個模式,我幫大家scan埋股票,寫埋研究報告,分享埋策略部署,再有個Q&A渠道畀大家問問題,傍住大家玩美股,咁樣我覺得會更加貼近大家需要嘅嘢。 不過,現實啲講,始終都要有一定人數參加先可以成事。 我見坊間好多較有質素嘅投資專欄服務,都要收到$500 – $800一個月。但如果我話喺呢個服務推出嘅初期,我可以做一個超大嘅discount,唔知有幾多朋友會有興趣?

Read more

【莫家強】呢四日港股既表現都相當唔錯

過去四日,市場每日成峧都達到1千3百億元以上,而呢四日港股既表現都相當唔錯。 但今日,成交明顥地縮返落嚟,除咗指數要跌之外,升跌股票數目亦都非常肉酸。執筆之時,上升股票不足500隻,但下跌股票就有過千隻。 假若未來港股的成交額繼續減少,整個港股既走勢將會進一步轉弱。 但之前有唔少朋友問,可唔可以做Long Put。 大家要知道,Long Put好講時機,就算你估中方向,只係跌遲啲,贏面就已經細好多。 Debit Put Spread 相對而言,只要喺你兩張期權到期前,指數或股票可以跌到你預計既水平,咁就唔會有時間值損秏。 你有無一個短期下跌既「時限」,就係你揀選邊個策略去做既關鍵。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】介紹個網站畀大家

首先介紹個網站畀大家,可能有啲朋友已經知道,叫做Finviz,非常好用。 https://finviz.com/map.ashx 點解要講呢個網站? 事源係,美股昨日雖然大升,但我會見到好多之前強勢既股票,反而表現麻麻。呢個情況,並唔常用,美股有啲正在「洗牌」既跡象,資金開始流去唔同股票。 從兩幅圖,你細心睇就會睇到,一啲喺過去一個月做得最好既股票,昨日反而做得唔好,但好多喺之前做得唔好既股票,昨日反而能夠大升。 有朋友問點解會咁? 呢個就係我未來一兩日要觀察既嘢。或者最重要都唔係知點解,而係要知啲資金會流去邊,同埋會否令呢啲股票出現下一浪長期升勢。 過兩日,睇吓有咩發現,再update大家。希望又可以再次捉中啲靚既股票。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

Read more

【莫家強】兩日嘅港股表現都相當唔錯

過去半年,港股單日最大成交係1366.7億元,日期係2020年2月3日,即係前日。 單日第二大成交係1358.6億元,日期係2020年2月4日,即係噚日。無獨有偶,兩日嘅港股表現都相當唔錯。 純粹睇今早港股嘅成交,751.9億元,亦大概都係前兩日嘅水平,而有趣嘅係,呢幾日恒指連日內嘅走勢,都異常類似。 先講恒指見頂時間。 三日都係,恒指喺開市後好快就被挾高,而全日高位前日係出現喺10:01分、昨日係10:00分、今日就暫時係10:07分。 然後,10點至11點,走勢好似就會free flow 少少,到11點後,如果個市跌得深咗,往後都會托返上嚟,但就唔會升得太勁,總之就只係一直企穩,直到收市。 大家可以自己睇下三日嘅恒指即市圖,睇吓似唔似。 「無形之手」呢啲嘢,不嬲都係信就有,唔信就無,如果覺得係機會,大家就自己去把握啦。 但我自已嘅睇法係,港股短線既然明顯地有資金湧入,咁我就當然唔會硬頸睇淡。但中長線,我認為恒指會跌嘅機會超高。坦白講,如果個市短期可以挾高啲,我覺得仲好。 再講少少期權。未到大跌時刻,唔好做咁多Long Put。 大家要明白呢種策略嘅特性。Long Put好講時機,好經唔起時間考驗,我當你就算估中個市會跌,但如果係拖咗一排先跌,你嘅獲利機會都將會大減。 期權策略,真係要識做先好做,唔係就會好容易出現「你以為估中方向但要輸錢」嘅情況。 至於美股,整體仍然好強。 但如果大家睇到美股嘅引伸波幅,長期高企,你就知個市場嘅「避險情緒」仍然高漲。 總之,暫時都係望實上星期一大跌時啲股票低位先啦,邊隻跌穿就先走一半。但既然低位有哂防線,一啲仍然升緊嘅強勢股咪放心揸囉。 暫時講到呢度,有特別情況再update大家。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】美股係咪要走?

Weekend我收到最多嘅問題就係「美股係咪要走?」 你見我一直都話,睇埋星期一先算啦。 原因好簡單,我唔係嗰啲有水晶球可以預知未來嘅人,我係要靠觀察,做研究,先會知道下一步應該點做。 點解要睇埋今日?因為美股實在試過太多次,一大跌完好快就反彈。要確認美股喺咪轉跌,最低限度要今日個市企唔穩。呢個,係我研究做出嚟嘅結果。 咁今次,除非個市即日大插啦(touch wood),否則,我認為短期危機已經解除。 玩美股,就係有呢樣好處,會令你擔心嘅時間通常都好短。 好喇,下步點做? 開始要睇吓有邊啲股票可能轉弱,就轉去啲強勢嘅股票之上。 今日,喺我個list上面,幾乎所有股票都係上升嘅,即係你話真係變得好弱勢嘅股票又無嘅。 但隻蘋果,唔知係咪同中國嘅生意受影響有關,走勢係轉弱咗少少。呢樣嘢要開始睇實。 AON,NDAQ 呢兩隻,道指跌600點佢又唔跌,今日又有得升嘅,當然要揸實。仲有好多好股,恕呢度不能盡錄。 有朋友問可唔可以加注?我覺得,why not?總之,揀啱股票,順勢而行,以上星期一低位做止蝕,你計過數OK就入市啦。 好彩的話,用正股賺完呢浸錢,到引伸波幅回落,而個市又繼續靚的話,大家識做啦。 最後,1月28號呢度出過幅圖,話過去4次全球出現疫情,都無令到美股嘅升勢停步。今次,我相信都係一樣。 當然,中港股票,就另作別論。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】美股,道指期貨反彈

今日又早少少出post。 美股,道指期貨反彈,到依家都仲keep到百幾點升幅。但港股,恒指已曾倒跌,呢個就係兩地股票強弱既差距。 唔知道內地仲會唔會繼續托市。但如果佢哋真仲繼續托,然後又限制呢樣,限制嗰樣,做埋啲治標唔治本既嘢,之後個市只會跌得更深。 唔好話2003年既教訓佢哋收唔到,就連2015年大時代後出現既股災,只係四年幾前既慘痛經歷,可能佢地都已經忘記得一乾二淨。 總之,唔好對中港股市有任何期望。如果你仲繼續喺度輕視呢個疫情,認為港股已經跌咗好多可以撈底的話,我真係祝你好運。 至於美股,以現時期貨既表現去睇,已經係明顯強於港股。今晚,睇完美股開市後既表現,我再update大家個情況係點。 再提一提大家,原本今晚既課堂因疫情關係會延至3月,詳情會再通知大家,不便之處請見諒。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】我好唔想見到大家再輸股災

我好唔想見到大家再輸股災。因為,我輸過,知道有幾慘。 我可以同你講,要避過股災,其實唔難,你甚至係唔使有好高嘅投資技術,只要喺你腦海入面,唔好有一啲會累死人嘅投資理念就已經可以。 簡單講就係,你要tune返好你嘅投資理念。做到的話,就算嚟緊會出現股災,根本你都唔使擔心,因為你一定唔會有事。 但係如果你嘅理念出咗問題,你會喺股災輸大錢嘅機會就會大增。以下,我會詳細講。 ==================== 第一, 你有無輕視到今次嘅危機? 我唔知大家仲會唔會相信呢次嘅疫情係「可控」? 我唔係醫學專家,我只係一個完全係對政府控制疫情能力失去信心嘅普通市民。 但聽啲人成人講話唔好過份擔心,唔好自亂陣腳。 我想講,就係因為我一早已經好擔心件事,所以我今日先至無亂到陣腳。基本上,我已做足一切我能力範圍以內可做嘅防禦措施。 可能大家聽落有啲誇張,我甚至買咗部小型蒸氣熨斗,出完街又唔可以即洗嘅衫,我會蒸完先掛出露台。 而相反,最初叫大家唔使擔心嘅症府,如今先係亂哂籠。 有句說話,叫做最壞嘅打算,最好嘅準備。你有做到,就能夠減少於危機中受到傷害嘅機會。 ==================== 第二,當危機未能確認之前,你會點做? 我嗰個「過期鮮奶」嘅比喻就係話,如果你雪櫃有盒鮮奶,過咗期只係一日,你打開,又唔係明顯變壞,但聞落又好似有少少怪味,連你自己都唔肯定,咁呢盒奶,你會唔會飲? 咁個市,唔使講都知一定有問題,至於係咪嚴重到會出現股災,無人知,但都唔係完全無機會,咁個市啱啱先跌,你係咪仲會去買貨? ==================== 第三,你知唔知你一直都被貫輸一啲會令你輸大錢嘅投資理念? 點解香港咁多投資者會喺股災中輸大錢?其中一個原因,就係我哋嘅投資教育,一直好提倡大家要「逆勢」。 逆勢呢兩個字,當然唔會講出口,但你諗返啲專家嘅建議,係咪咁先? 佢哋成日會教大家撈底,追落後。調整就叫你去買貨,升得多就會叫你唔好買。升嘅股票就話貴,跌嘅股票就話抵,聽咗咁多年,所有嘢都變得好順耳,好順理成章,但就係因為喺不知不覺間,我哋嘅潛意識就係俾呢啲思想荼毒哂。 講真,要避股災有幾難? 一句說話,君子不立危場下,就係咁簡單。 即係早幾日,港股一開市,如果你已經肯走哂啲貨,而又無再貿然入市買貨,咁依家嘅跌市你有咩好驚? ==================== 最後,唔好急,唔好怕執輸,怕蝕底。呢啲又係會令我哋輸錢嘅心態。 即係啲人成日都話,SARS嗰陣應該買股、買樓。咁事後先講,梗係無錯㗎。 但更重要係,你唔一定要第一時間入市㗎嘛。先講恒指,2003年4月見底,而指數其後反覆上升,要去到2007年10月尾先見頂,其間有四年幾時間俾你賺錢。 樓市仲勁,升咗成十幾年。咁有咩好急? 記住,我哋唔使做第一個睇到跌轉升嘅人。要賺錢,只要到時個市升返,你識得順勢而行就可以。 ==================== 理念攪掂咗,策略講幾句就可以。 星期一,如果美股連一啲反彈都無,個市我會睇淡好多,倉位最少減半,再跌就所有貨都清哂。 之後,我會主力觀察有邊啲股票能夠逆市造好。 但總之,個市一日繼續跌,我都唔會買嘢住。直至等到個市好轉,呢個就係我之前所講,今年嘅最大賺錢機會,亦係我認為入市做Long Call嘅最佳時機。 再講多少少,中外股市都係,最癲嘅升浪,通常都會出現喺好深嘅調整之後。2007年港股嘅817「大奇蹟日」就係最佳例子。恒生指數,兩個半月,升咗接近13000點。你唔信,自己睇返。 但今次港股無㗎喇,因為個根基由2012年起就一直崩壞。要博,博美股啦。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

【莫家強】美股大跌,又講一講點做

美股大跌,又講一講點做。 雖然道指跌超過四百點,好似好多,但其實大部份股票今日都只不過係跌0 – 4%左右。喺我嘅list入面,表現最差嘅係剛出完業績嘅Visa,現跌3.82%。 但例如係近期提及嘅ICE、NDAQ同AON,其實係一啲事都無。後者,仲有得升。 好喇,之後點做? 所有股票,跟返之前所講,如股價跌穿今個星期一低位,持貨一律減半。 咁有啲股票,之前幾日升得好靚,股價已遠高於星期一低位,咁點算? 咁呢啲股票就更加無問題啦。而我會建議睇埋下個星期一。 美股有個特性,就係如果三大指數都跌超過1%,之後嘅一個交易日嘅表現,會有好大啓示性。 下星期一,其實只要個市有少少反彈,唔使多,只係微升,我都會收貨。啲強勢股,未穿位,我都會繼續揸。 相反,下星期一,個市連少少都升唔到,咁後市我會睇返淡啲,強勢股減半,之前已跌穿位嘅股票直頭會清哂佢,就係咁簡單。 唔好同啲股票談戀愛。 Apple、Microsoft,兩隻股票我都好鍾意。但如果個市衰起上嚟,無論你隻股票幾靚都好,都有機會大跌。呢一點,我非常清晰。所以,如果個市有唔對路,我都唔會諗咁多,會即刻減貨。 但就算最後真係要走貨,照計Apple點都沽到300蚊樓上,Microsoft點都沽到160蚊樓上,我仍然會好開心。 而再下一步,就係揸住多多cash,等個市調整後再反彈。期間邊啲股票最強勢,就睇住時機Long Call。 個市會點走,我唔知,我都無水晶球。但以上,就係我嘅策略。兩度防線,今個星期一股價低位,同下星期一大市能否反彈。 美國藍籌股,你肯走,就唔會有好大風險。最後要點做,就視乎個市嘅走勢。 風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。  

Read more

本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室