事先張揚0318-股市嘅兩個新風險(唔係肺炎,唔係經濟衰退)

話我死硬派都好,我始終唔相信,如果只係疫症,美股唔會咁跌法。即使計及
種種活動停擺,經濟衰退,企業盈利大減,有公司倒閉,似乎都唔應該咁跌法
。而家大家似乎擔心更嚴重兩樣嘅東西。本文稍後會講。但首先跟進返上次講
嘅嘢。

 

上次同大家提嘅三樣「救市法寶」,暫時一樣都冇出現。不過,只係兩日咋喎!正
係如此!明明只係兩日,但好似捱咗好耐咁。

上次冇睇嘅,介紹返,聯儲局緊急減息,仲重啟QE,但股市明顯唔BUY。仲有
乜可以做到?我認為嘅三大股市嘅定海神針:美國減關稅,美國政府直接入市
買股票,畢菲特大手撈底。排名不分先後。

我認為短期比較近磅嘅,可能係美國政府入市買股票。聯儲局星期二晚做過嘅
,就係入市買商業票據,commercial paper,市場定住一陣,但似乎仲未放心。
政府入市買股票,其他國家有先例,美國就要國會授權,但我估問題不太大。
只係侵侵想唔想:唔少人以為佢最關心/擔心股市,但睇近嚟嘅行動,又未必係
。合理嘅,流動性同銀行安全為先,股市後話。

至於畢菲特大手買貨,當然都有機會。2008金融海嘯時,畢菲特在紐約時報出
咗個好著名嘅Op-Ed(https://nyti.ms/2x24gt4)。標題只得一句:Buy American, I
Am。但近期睇佢講嘢,我唔認為佢覺得股市好吸引。

最難見到嘅,應該係減關稅,亦係今日我想講嘅新風險之一:中美交惡。大家見
到G7出嚟聯手聲明,都係講例牌嘢,但有冇留意爭咗乜?唔再係G20,爭咗其
他國家,最重要係,爭咗中國。我相信2008年金融海嘯,背後危險比今次更大
,但股市都快手穩住咗,唔多唔少因為所有國家出嚟齊心。但而家我睇到嘅,
中國美國冇打算合作,甚至更加借呢個機會攻擊對方。互相趕記者又好
,twitter口水戰又好,咩都好,我見到嘅就係兩方完全冇打算齊心,敵意甚至
比年頭更重—呢個先係最大風險。What if,唔係減關稅,係加關稅?You heard it
first from Ivan

第二個新風險,就係流動性,即係,冇錢,銀行系統出事。你話,減晒息放晒
水都咁?好似都係咁,大家都好驚,似乎侵侵要做啲嘢。起初我低估咗今次股
市跌幅,因為我認為係疫情,係經濟衰退,講真呢啲都唔死得人,之前又唔係
未衰退過,大鑊得過金融海嘯?但如果最後變成銀行間嘅問題,就可以大件事
過金融海嘯了。

(美國緊急減息後,香港銀行同業拆息反而勁升三日)

而點解我越嚟越擔心?因為你見到美國勁減息都好,美金啲拆息都唔係好跌,
香港拆息甚至升上去。我唔敢質疑金管局阿頭唔識嘢,但余偉文話係因為新股
(http://bit.ly/2U01td6),我就實在有啲懷疑,可能佢唔想市場恐慌。新股?呢
期都仲有人抽新股?係有嘅,但,丁屎咁細咋喎,唔係阿里巴巴,點會夾高拆
息?況且,新股招股鎖錢,十日八日,點會搞到一個月三個月拆息都升?似乎
係銀行都唔多敢拆借。呢種信心如果一路唔返嚟,可以好大件事。

(彭博的圖,港股廿年最平了)

 

睇估值,美股我唔敢講,但正如我在《明報》專欄講,你睇price to book,1倍都冇
,清盤價,已經跌破「海嘯價」同埋「融斷價」。照計係可以分段買,但留心以上兩
個風險。

使用諗Sir獨家按揭進階計算機,Powerteam成交實例請到:https://buyhouse.com.hk

wtsapp icon top