【莫家強】今日想講三樣嘢

今日想講三樣嘢。1) 美股、2) 又有新股發盈警、3) 港股前景。

先講美股。

你覺得係咪好大件事,其實好視乎你啲股票係幾時買。如果你係兩三個月前已經上車,股票已有兩三成以上回報,噚日既跌市,根本唔算啲咩。

道指,跌333點,聽落好似好多,但以百份比計,只係1.23%。大部份藍籌股,跌幅都只係介乎0.5% – 3%,都唔算啲咩。

反而,重點係,往後既策略點做。以下,兩樣嘢要注意:
1) 美股好少喺指數跌多於1%後,翌日無反彈。如出現此情況,後市通常偏淡。
2) 升市,我會叫大家啲強勢股要一直揸,但跌市,要識走。

我既策略好簡單,今日只要個市可以反彈、企穩,就乜都唔使做。唔使升得多,有少少升,我已經收貨。但如果連少少都無得升,倉位內1/3貨我會食糊走人。到遲啲,確認到個市能夠再續升勢時,會再上車。

美股,升咗咁耐,的確有機會有調整。但如果策略做得好,呢個會係一個機會。

>>>>>>>>>>>>>>>>>>>>>>>>>>>>>>>>

噚日,香港又有新股發盈警。

新股上市無耐就發盈警,我主觀會認為,係有人唔老實。邊隻股,大家知就算喇,佢另一半咁識法律,我廢事開名。最重要係,大家要知發生緊咩事,將來再有同類事件發生,唔好中招。

盈警中提及,「預期」截至6月底止,公司中期純利按年大幅減少。

咩叫預期6月底止?6月底之前既數,根本就唔係預期。上市前,點會唔知。照樣上市,根本就係擺明知道,香港既上市制度把唔到關。

再成件事睇一次。

上市前,將公司既錢,先分哂畀自己人。主席話,呢啲係佢哋應該享有既利益。然後上市,被揭股權高度集中,主席話,好多股票都係咁。股權高度集中,即係股價可以任佢哋舞高弄低,大家睇返幅股票圖,隻股上市除咗第一日大升之外,其後就一直跌,件事係點,好清楚。

係咪騙案?邊個有責任?我唔知,但大家有眼睇。港股,呢幾年,就係俾呢啲人攪衰哂。

>>>>>>>>>>>>>>>>>>>>>>>>>>>>>>>>>>>

至於港股前景,關鍵係香港政府點做。

早幾日,睇咗一段內地媒體對香港近日政局既睇法。當然,內地講既,一定係讉責香港有人想破壞一國兩制。但當中,佢有唔少觀點,實在值得大家深思。

點解會有一國兩制?

係因為上世紀八、九十年代,內地領導層都意識到,香港於經濟、管治同法治,水平都遠高於內地,如果硬要將香港變成中國,亦唔符合國家利益,所以要給予香港可以港人治港、高度自治,等香港可以繼續繁榮、穩定地發展。

以上觀點,係內地媒體講,我覺得好make sense,要香港好,就係要咁。

但當件事開始變質,香港對於中國既優點,就會消失。

香港,過去之所以能成為國際金融中心,我認為有幾項優勢係好決定性。第一,貨幣穩定;第二,健全法制;第三,廉潔。但今日,除咗貨幣穩定仲算守到,其餘兩樣,已經不保。

香港,唔係政局平穩就會好轉。

暴力,一定唔係解決問題既方法,但要消除暴力,都一定唔係靠水炮車。政府高官們,唔知近月既資金流走,關唔關你哋事。但點都好,係時候要諗一樣嘢,維持一國兩制,同對香港人公平,中間係有好大既重疊空間。有好多嘢,你哋係可以做。

係真心為港人既,就唔好等「適合時機」到民意逆轉先走出嚟。你每拖一日,香港就被傷害多一日。

香港,已經分裂到連屋企人講政治都會嗌大交,唔好再要香港咁喇,政府。

風險聲明:筆者為證監會持牌人。以上內容並不構成投資建議。投資者於投資前必須充分了解產品風險,自己的財務狀況及投資目標,並諮詢專業顧問。

 






本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室