真係唔好生女,真係….(平權者慎入、環保L請入)#1771

有關買樓選擇,有兩個新樓,同樣係樓花

一個係深水埗AVA 228

一個係土瓜灣瑧尚

 

我同太太有一個小朋友,一個工人,而家租家人地方屋住,大概月租5000

 

我同太太月入大概6萬元

本人支出如下 家用5000 租金5000

工人人工4410 生活費4000 保險+還款4000

太太最多應該可以用15000

現在外母借150萬比我同太太買樓投資,因為向外母借,分20年還每月大概6000

 

而家我有個問題想請教諗sir

如果AVA228 同瑧尚應該點選擇 AVA 228 入場價280萬-388萬 可一成首期,呎155-203

瑧尚 未出價單,但我地最多只能買600萬以下,呎最少300 我唔知AVA228入唔入得過?

 

一來深水埗區唔熟,二來怕155呎新樓無乜人租,最怕就係如果樓市升左唔知有無人會買400萬以上155呎單位

 

瑧尚其實我睇中土瓜灣區,因為沙中線,未來發展應該有潛力,離土瓜灣出口只有1分半鐘,而且又大型發展商,所以我都想入會 一個納米單位,但可以9成上會,唔知租唔租得出同賣唔賣得出,怕太高價無人接 但就供款還款會輕鬆好多,亦有機會有正現金流

 

一個300呎,8成上會,地鐵站開左相信都有人會租,但係8成上會供30年,月供1萬8千左右,加上還外母借首期6000 每月支出差不多2萬4千元,亦覺得會吃力 我想請教諗sir比細佬一點意見

 

ANSWER:

我地為左鼓勵年輕人上進,做下野每日維持呼吸咁,所以筆者先講呢個讀者同佢太太平均每人三萬人工,係好好同埋對得住社會。另外佢地無諗過減人工去抽公屋,無濫用社會資源,在此代表TVbuddy,太平紳士,及何生多謝讀者咁幫手。筆者下方撰文只想指出「有人如要用父母錢,可以更謹慎的做好事前調查,搵錢真係好辛苦,筆者睇完真係好為有人的媽媽心痛」。另外如果睇完唔開心,唔好出律師信呀,亦記住保持呼吸,至多筆者唔寫就係。

 

先講而家做老豆老母真係好L煩,好彩諗sir自己夠克制控制到唔生女(這個國技可以開班教~)。我驚我女婿第時問我借百幾萬買樓,借比佢無問題,但我擔心我仲有命借多幾多次比我個女?預先將錢過哂比佢又知佢肯定比人呃鬼哂,睇住佢比人呃真係連我死都唔眼閉。

 

生仔起碼,佢無用只可以怪自己,有幾可男人搵唔到錢會怪佢老豆留唔夠比佢先? 就算心想都唔夠膽大聲講。睇黎而家生女要養佢之餘,仲要提供埋婚後佢十幾廿年「保養期」。買樓用外父錢唔緊要、遲下買床用外父錢都算,但起碼有落街做過下分析先。 所以養女既你,好快d黎上堂學好投資,除了錢,你仲要教女婿點投資。

 

要知單位租唔租得出,首先可以上property.hk及中原數據睇下近排有冇租務成交,另外你可以扮客去地產鋪搵下該地段有冇盤放,如果你發現該屋苑/該條街放黎放去只係某1-2個盤,加上該2個盤放價正常又冇異樣,你要懷疑該地域流通性頗低,買左恐怕租唔出或放唔到。留意有一條好廢既問題,就係租客問經紀:「呢類盤易唔易租出?」唔通你想個經紀答:「呢類盤十世都租唔出咩?」如果咁答,個經紀應該係諗sir。一個人要正常,係要自己諗野,唔係聽人講野,拜託。

 

點睇一間屋有冇異樣? 靠睇樓及查冊。兩項做法細節係收費課-買樓001教,或者你每星期去睇樓又間唔中買一兩間樓試下,你唔黎上堂都識既。你叫經紀教你睇樓亦可一試,筆者都想知經紀會點教客睇樓,尤其睇新盤個陣。睇樓之前亦應計好自己借貸力多少,做法可由本BLOG其他CASE留意。

 

至於鐵路盤是否無得輸? 可輕輕參考下生果報【跌市檢閱】?????????鐵路盤全軍覆沒 邊個跌得最甘?

https://bit.ly/2NbqRHJ

 

由於生果報做的統計很偏頗,或者抽數據時有「特別程序」,所以睇下算數。然而2018全年有鐵路盤跑輸比大市是肯定的。至於將有站的土瓜灣係咪好? 如果只係你知道有土瓜灣站,就可以的。亦可參考加剛有鐵路到的黃埔花園,呎價有冇升到阿爺都唔認得? 二係試下問一個香港人同內地人,會否因住在土瓜灣而有優越感。三參考政府數據,睇下啟德區的細單位供應是否「天量」。如果未來啟德有好多一房供應,咁點呀? 咁會落雨囉…係咪!?

 

留意肯還唔代表筆錢就係屬於你,諗sir都肯月月還60萬,係咪入匯豐可先拎一億五先? 當然不少人熱心於市面提供免費答案,閣下大可關閉本blog,去你喜歡的地方。








本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室