^^【期權教室】莫家強期權教室 (2016/01/05)

咁夜出post,因為機會可能一開市就出現,聽日先講會太遲:

 

1) 未上過我堂既朋友,記住,最重要既一點,個策略一定要係「有限風險」。例如,沽期指係無限風險,如果估錯市既話,輸幾多都得,唔好做。相反,有限風險既方法,最多輸五千就五千,一萬就一萬,入市前已經可以預計得到,用呢類既策略,好處係你會容易啲坐得穩,贏面先會高。

 

2) 點講都好,我地都係逆市睇淡。逆市,就要預左挨價,預左個市仲會升多啲。今次睇跌,我有信心,但你既信心未必夠我咁大。信心唔夠,就會有機會俾人chok 走,就算最後個市真係跌,你都會賺唔到錢。

 

3) 如果今次真係不幸輸左,我會肉痛,會唔開心幾日,但一定唔會有大礙。我呢兩三個月「估市」真係幾準,不過,唔好因為咁就信哂我,訓身黎做。我上堂教過,Long Call、Long Put 要賺大錢,唔係靠訓身,係靠過關。

 

4) 我腦海有諗過,好彩既話,我呢次LP賺完錢之後,會可以反手LC揸返上黎。連埋之前睇升既一下,個回報就會好勁。呢啲就係我所講既過關。要賺大錢又安全,以下三樣嘢,缺一不可:細細注開始+方法+運氣。

 

5) 呢種睇淡,我地係要同大眾做相反。出面愈多人睇好,我地就愈要睇淡。決定左做,就要預左同報紙、雜誌既意見唔同。所以,入市要做好心理準備,計好風險、注碼,一㩒完掣,就唔好再理人地點睇。

 

6) 最後,策略。最穩陣既方法,係22600點以上,再等陰燭先入市。但我自己都唔會咁等。今日,我已經做左少少LP。聽日如果期指高開多過100點,我會直接博陰燭,所以一開始就可以揾位LP。Take profit方面,有50%利潤,我會先獲利1/3,其餘2/3睇長啲。入市前,check 清楚,買既Put 引伸波幅唔好高過14.5%。

 

唔好意思,唔覺唔覺,寫到咁長。

 

埋尾總結,少少我既投資哲學:玩一鋪,唔會有人可以贏硬;玩一千鋪,贏既就肯定會係有實力既人。

 

大家努力!Good Luck!

 

風險聲明:筆者為證監會持牌人。以上內容屬筆者個人意見,不構成投資建議,並不代表本網站意見。投資者於投資前必須充分了解產品風險,自己的財務狀況及投資目標,並諮詢專業顧問。




本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室