>>按此看問題
其實驗樓時發現問題已太遲，因賣方只承擔將舊樓之應有原狀賣比你。除非真係好走樣否則你好難踢走單買賣。所以睇樓時就要睇清楚。要注意漏水及嘈吵之鄰居。詳情要另開文再講
家居保險有三大種。火險、家居保及最新出之租務保障(即防租霸保險)。通常都係比一年保費保一年，亦可月繳。火險唔係防火，主要係理賠因該物業之結構損壞而作出賠償。你做得按揭就一定要買。當然有不少讀者係上左會但都唔知咩係火險啦，原因係你幢大廈已有BLOCK POLICY/MASTER POLICY，即管理處幫手買左，銀行CHECK到就唔駛係上會時雙重買。但有銀行係唔承認部份公司提供之coverage的，咁就冇計，焗住比多幾百蚊買多一份。
而家居保範疇為保障購買者所住居所內之財物損失、所引致之法律責任及保障。例如意外水浸引致損毀、跌左隻窗落街、間屋水浸暫時住唔到而要另覓居所當中支出。集合各人問題而注意點為:
滲水唔算，要因意外而爆喉先有得陪
手提電話大部份電子產品都唔包，包既話我個個月都換電話啦
裝修時係冇保障既
有部份保險公司話搬屋時都有保障，但留意係要搵合資格搬屋公司做
好似2012年咁十號風球係天災，大部份保險都係爆哂窗都唔包。就算有得賠都只可用撫恤金形式
至於防租霸保險係新出，每年千餘元保費。買都值得既。但留意係有銀行出租consent未。
保障範圍有
1. 法律支出上之賠償，最高十萬元
2. 物業損毀加上所失租金賠償，最高十萬元
當然防範好過買保險，小心點睇清楚問下個租客。好似有個case，個租客好豪咁交哂一年租，之後業主成年都搵唔到租客。問返緣來此人在另一個單位已攪過事，呢算一年租既錢好可能係上手業主賠比佢既安家費。所以唔好見錢開眼，邊有咁筍既野呀…
