陸羽仁-跟中唔跟美

港股呢期唔興跟住美股走。華爾街跌時佢就呆,華爾街升時仲就跌,呢樣嘢反映投資者重點始終放喺內地,情緒跟住內地走多一點。

內地上月通脹率反彈至1.4%,但工業品出廠價(PPI)未止跌,加上A股本周有新股密集發行,人行雖然再有逆回購放水,A股升一日之後已經無乜力,滬市午後一度倒升,惟升勢隨即回落,上證指數收報3286點,跌16點;深成指收報11556點,漲23點。

內地2月份PPI同比下降4.8%,是連續第三十六個月下降,衰過上月的跌4.3%,亦差於市場預期的下降4.4%。

內地上證綜指跌0.5%,但香港國企指數跌1.4%,香港跌得比內地厲害,比較合理解釋是外資更睇重PPI下降4.8%這個生產價格通縮的數字,認為內地經濟遠未好轉,所以沽國企股。未來國企股還在尋底階段,可能會弱少少。

炒AppleWatch要醒目

中港兩地經濟近日欠缺好消息,形成無乜概念好炒,除咗喪炒的冷門股外,市場話題就係蘋果推出的新產品。

對於呢個新產品,有大行亦嘗試同內地網企拉上關係,高盛發表研究報告指,蘋果公司於AppleWatch發佈會上公佈智能手錶上使用微信社交功能。

高盛認為,騰訊(700)與蘋果合作,將會增加微信全球佔比,以及強化內地領導地位,騰訊成為首批主要的社交網絡,將程式重寫配合智能手錶應用,令到公司有先行優勢,可以令到其他平台的發展取得槓桿,如果AppleWatch發展成功,對微社交廣告產品有正面影響。

該行預計,騰訊遲啲公佈第四季業績,收入按年增長19%,以非通用會計準則計算的純利增長55%,「買入」評級,目標價146元。騰訊昨日跌0.8%,跌幅低過國指。

蘋果由於iPhone6成功,令股價升個不停,市場對AppleWatch寄予厚望。

不過,一個產品要成功唔係咁易,手機同手錶嘅屬性好唔同,手機成功不能簡單移植去手錶市場。

要留意係AppleWatch訂價高昂,唔係普通產品,用家一定要覺得好有實用價值,又或者超級型仔,先至有機會大賣,你走去街上睇睇,除了手機之外,有幾多人手上會有單一用品係接近一萬元、而又係普遍到通街見到?由此可知要複製iPhone6的經驗唔係咁易。

炒股跟紅頂白唔緊要,AppleWatch面世都會有啲股話有關係會借機炒吓,最緊要知自己跟緊乜,甚至買騰訊呢啲咁大隻股票,都要保持三分警覺性!

內險股沽壓大

科網股搶眼球,但大圍形勢仲係麻麻!內地公佈數據後,大市跌穿兩萬四大關,午後連帶100天線亦告失守,恒指收報23896點,跌226點;國企指數收報11507點,跌168點,成交769億元。

中移動(941)跌出「紅底股」之列,全日跌2元,造99.8元。內地保險股沽壓亦大,財險(2328)、太保(2601)雙雙成為國企指數成份股表現最差頭兩位。

濠賭股繼周一被摩通劈價逾25%後,德銀亦削賭業股目標價,瑞信都話濠賭股估值過高,多隻澳門博彩股再創52周低位,包括金沙(1928)、銀娛(027、永利(1128)、美高梅(2282)、澳博(880)及新濠(200)。

陸羽仁一早講,濠賭股在過年前係炒農曆新年概念係最好嘅出貨機會,當時唔走依家就要唯有捱沽。

陸羽仁

http://news.stheadline.com/dailynews/headline_news_detail_columnist.asp?id=322527&section_name=wtt&kw=4











本網站所包含或提供的資料或材料僅為提供信息,並根本不打算令閣下根據這資料來作交易或投資之用。
對於網站上傳輸的任何資料或材料的正確性、實用性或可獲得性,本網站不承擔任何責任。
對於任何基於此類資料或材料所作的交易或投資決定,本網站也不承擔任何責任。

承印人:Home Concept Group Limited

地址:尖沙咀金巴利道35號金巴利中心13樓03室