【莫家強】ETF一週評論 (20210224)

以上兩幅圖,其實已經講咗近日美股嘅情況。過去三年升得最好嘅板塊,過去一週被大洗倉。首先,係潔淨能源同太陽能類,基本上都係大瀉。然後,ARK Invest 系嘅ETF,亦都難逃跌勢。

 

 

 

 

ICLN、TAN 等嘅ETF,都已經相繼跌穿止蝕位,所以都應該要離場。將來再有升勢,可能會重新入市,但最少喺現時走勢轉差,未知情況,風險增加嘅情況下,如有持貨,我覺得都要先行離場。

 

再分享多少少經歷。我喺08年、11年、13年,試過三次喺大跌市入面輸大錢。仲記得,當年除咗輸錢,仲承受住好大壓力。特別係13年,有兩個星期,直頭係兩個星期都訓唔到覺。但攪到咁嘅原因,係因為我當時好鍾意逆勢而行。跌市,唔單止唔識走,仲走去買貨。

 

而成件事好簡單,最重要就係你嘅第一步點做。如果你係個市轉差嘅時候,第一步諗嘅係入市買貨,好自然當個市再輸得差啲,你就自然會走去再買貨。假如真係出現大跌市的話,你自然就會避唔到。我嗰幾次,就係咁樣中招。

 

但之後,學精咗。每逢我感覺到個市有危險,我諗嘅就會係走貨。好自然地,如果個市再轉差,我就會再走。就係咁樣,近幾年嘅大跌市,我都無再輸過大錢。呢個轉變,令我長遠嘅投資回報好咗好多。

 

今次呢啲強勢板塊轉弱,暫時未知係短線,定係會令大市從此步入大調整。呢樣嘢,我仲要再觀察。之後如果啲股票繼續跌,就唔好買貨住。但假如升返,我會買返。咁樣聽落,或者好似有啲蝕底。但你肯蝕呢個底,最多都只係賺少咗。相反,有危險唔走照買貨,一錯,隨時會輸身家。

 

過去嘅股災,大部份大藍籌股由頂到底,可以跌6至8成。而最危險嘅做法,就係當你喺啲股票跌緊一兩成嘅時候,就走去買貨。所以暫時,最好多係忍一忍手。

 

使用諗Sir獨家按揭進階計算機,Powerteam成交實例請到:https://buyhouse.com.hk

wtsapp icon top